កងទ័ពអាកាសរបស់ប្រទេសអ៊ីរ៉ាក់ បានបើការវាយប្រហារមួយទៅលើក្រុមរដ្ឋឥស្លាម ISIS នៅលើទឹកដីស៊ីរី ដែលជាការសងសឹកតបទៅនឹងការវាយប្រហារបំផ្ទុះគ្រាប់បែកនៅទីក្រុងបាដាដកាលពីសប្ដាហ៍មុន ដែលបណ្ដាលឲ្យប្រជាជនរបស់ប្រទេសអ៊ីរ៉ាក់ស្លាប់និងរបួសជាច្រើននាក់។
តាមបណ្ដាញផ្សាយព័ត៌មាន Reuters ដែលស្រង់សម្ដីរបស់នាយករដ្ឋមន្ដ្រីអ៊ឺរ៉ាក់លោក Haider al-Abadi មកចុះផ្សាយនៅថ្ងៃសៅរ៍ ទី២៥ កុម្ភៈនេះ ឲ្យដឹងថា ការវាយប្រហារនេះធ្វើឡើងក្រោមកិច្ចសហប្រតិ បត្ដិការរវាងកងទ័ពអ៊ីរ៉ាក់និងកងទ័ពទីក្រុងដាម៉ាស់ ទៅលើតំបន់ព្រំដែនជាប់ប្រទេសស៊ីរី និងប្រទេសអ៊ីរ៉ាក់ ដែលទីនោះគឺជាកន្លែងដ៏សំខាន់របស់ពួកសកម្មប្រយុទ្ធរដ្ឋឥស្លាម ISIS។
បើតាមការឲ្យដឹងពីមន្ដ្រីទ័ពអាកាសអ៊ីរ៉ាក់ បញ្ជាក់ថា ការវាយប្រហារនេះ ធ្វើឡើងទៅលើមូលដ្ឋានផលិតគ្រាប់បែកសម្រាប់បំផ្ទុះលើរថយន្តរបស់ពួកសកម្មប្រយុទ្ធរដ្ឋឥស្លាម ISIS នៅតាមខ្សែបន្ទាត់ព្រំដែន ដោយប្រើប្រាស់យន្តហោះទំនើប បំផុតប្រភេទ F16 ក្នុងប្រតិបត្តិការលើកនេះ។
លោក Haider al-Abadi បានថ្លែងក្រោយពីកងទ័ពវាយប្រហារទៅលើមូលដ្ឋានរបស់ពួក ISIS ថា ៖«វីរៈបុរសលើដែនអាកាសរបស់យើង បានបើកការវាយប្រហារសងសឹកទៅលើក្រុមភេរវករ ដោយទទួលបាននូវជោគជ័យដ៏គួរឲ្យភ្ញាក់ផ្អើល»៕ ប្រភព Reuters
