មន្ដ្រីការទូតប្រទេសអាល្លឺម៉ង់ បាននិយាយថា ខ្លួនបានទទួលមន្ដ្រីរដ្ឋាភិបាលនិងអ្នកការទូតប្រទេសតួកគី ដែលសុំសិទ្ធិជ្រកកោនចំនួន ១៣៦នាក់ ចាប់តាំងពីការធ្វើរដ្ឋប្រហារខែកក្កដា មិនបានសម្រេច ទម្លាក់ប្រធានាធិបតីរបស់ប្រទេសឥស្លាមមួយនេះ។
បណ្ដាញផ្សាយព័ត៌មានរបស់អាល្លឺម៉ង់ បាននិយាយថា មន្ដ្រីទាំងនោះសុទ្ធតែកាន់លិខិតឆ្លងដែនការទូត ហើយពួកគេចាប់ផ្ដើមសុំសិទ្ធិជ្រកកោននៅអាល្លឺម៉ង់ គឺនៅរវាងខែសីហា ឆ្នាំ២០១៦ ដល់ខែមករា ឆ្នាំ២០១៧។
ស្របពេលនេះដែរបណ្ដាញផ្សាយព័ត៌មាន BBC បានរាយការណ៍ថា រដ្ឋាភិបាលតួកគីបានទទូចឲ្យអាល្លឺម៉ង់កុំផ្ដល់សិទ្ធិជ្រកកោនដល់អ្នកទាំងនោះ។ តែនៅពេលជាមួយគ្នានេះប្រទេសក្រិក ប្រកាសថា ឧត្ដមសេនីយ៍ពីររូបរបស់តួកគី បានរត់ទៅសុំសិទ្ធិជ្រកកោនប្រទេសខ្លួនដែរ ក៏ប៉ុន្ដែពួកគេត្រូវបានអាជ្ញាធរក្រិកចាប់ឃុំខ្លួន។
ការធ្វើរដ្ឋប្រហារមិនបានសម្រេចកាលពីខែកក្កដា ឆ្នាំ២០១៦ នោះ បានបណ្ដាលឲ្យមន្ដ្រីជាច្រើនពាន់នាក់ ដែលសង្ស័យចូលរួមធ្វើរដ្ឋប្រហារនោះ ត្រូវរត់ភៀសខ្លួនចេញពីប្រទេស ខណៈមនុស្សជាច្រើនរយនាក់ត្រូវបានប្រធានាធិបតី តាយ៉ីប អឺឌូហ្គាន់ បញ្ជាឲ្យឃុំខ្លួន៕ប្រភព:BBC
