Gambia ៖អតីតប្រធានាធិបតីនៃប្រទេស Gambia លោក Yahya Jammeh ដែលបានកាន់អំណាច ២២ឆ្នាំ បានបង្កឱ្យប្រទេសតូចមួយនេះ ជំពាក់បំណុលបរទេស ជាង ១ពាន់លានដុល្លារ ខណៈលោកត្រូវគេចោទលួចលុយមូលនិធិ ៥០លានដុល្លារ។
អតីតជនផ្ដាច់ការរូបនេះ បានបាត់បង់អំណាចដោយសារការបោះឆ្នោត កាលពីខែធ្នូ ឆ្នាំ ២០១១ ។
លោកត្រូវបណ្ដេញចេញពីអំណាច និងបង្ខំឱ្យនិរទ្ទេសខ្លួនទៅក្រៅប្រទេស។ ប៉ុន្ដែ លោកត្រូវបានរាយការណ៍មកថា បានលួចលុយមូលនិធិមនុស្សធម៌ជួយកាត់បន្ថយភាពក្រីក្រ ប្រមាណជា ៥០លានដុល្លារអាមេរិក។
ក្រៅពីនេះ គឺរកឃើញ យន្ដហោះមួយគ្រឿងរបស់លោក ទើបទិញថ្មី មានតម្លៃ ៤ លាន ៥ សែនដុល្លារ ដែលជាលុយមូលនិធិមនុស្សធម៌ ។
ជាមួយគ្នានេះទៀត លោក មានឡាន Hummer ដែលមានតម្លៃរាប់សែនដុល្លារ ហើយ ឡាននេះ ត្រូវគេរាយការណ៍មកថា លោក បានបញ្ជាឱ្យអង្គរក្សបើគេចយកទុកឱ្យលោកពេលលោកភៀសខ្លួនទៅនៅប្រទេស គីនេ ។
បច្ចុប្បន្នប្រទេស Gambia ដែលមានប្រជាជន ជាង ២លាននាក់បន្ថិច គឺ ជិត ៤០% រស់នៅក្បែរបន្ទាត់ក្រីក្រ និងជាង ២០% រស់លើបន្ទាត់ក្រីក្រ។ ក្រោយពី លោក Jammeh អស់អំណាចភ្លាម សហគមន៍អន្ដរជាតិ ចាប់ផ្ដើមផ្ដល់ជំនួយទៅឱ្យប្រទេសតូចមួយនេះ ។
កាលពីសប្ដាហ៍មុន សហភាពអឺរ៉ុបបានផ្ដល់ជំនួយ ៣៤០លានដុល្លារជាជំនួយសង្គ្រោះបន្ទាន់ ដោយសារតែ ឃ្លាំងប្រាក់របស់ប្រទេសនេះ អស់លុយរលីង។
យោងតាមប្រភពព័ត៌មានរបស់ Freedom News Paper ឃ្លាំងប្រាក់សល់ប្រាក់ជាង ១០លានដុល្លារត្រូវបានលោក Jammeh លួចយកតាមខ្លួនទៅនៅប្រទេស គីនេ៕ Freedom News Paper
