ភ្នំពេញ៖ក្រសួងអប់រំយុវជន និងកីឡា បានប្រកាសជ្រើសរើស គ្រូកំពុងបង្រៀននៅវិទ្យាល័យ និងអនុវិទ្យាល័យ ដើម្បីចូលរួមកម្មវិធី Teaching Excellence and Achievement Program នៅសហរដ្ឋអាមេរិករយៈពេល៣ខែ។
សេចក្តីជូនដំណឹងរបស់ក្រសួងអប់រំ យុវជន និងកីឡា បានឱ្យដឹងថា ក្រោមកិច្ចសហការរវាងស្ថានទូតអាមេរិកប្រចាំប្រទេសកម្ពុជា និងក្រសួងអប់រំ យុវជន និងកីឡា អាមេរិកនឹងផ្តល់អាហារូបករណ៍ចូលរួមកម្មវិធី Teaching Excellence and Achievement Program ចាប់ពីខែមីនា ឆ្នាំ២០១៨ ឬចាប់ពីខែកញ្ញា ដល់ខែវិច្ឆិកា ឆ្នាំ២០១៨ ហើយកម្មសិក្សានេះនៅសហរដ្ឋអាមេរិក។
លោកគ្រូ អ្នកគ្រូ ដែលអាចដាក់ពាក្យចូលរួមក្នុងកម្មវិធីនេះបាន គឺជាគ្រូដែលកំពុងបង្រៀននៅវិទ្យា ល័យ និងអនុវិទ្យាល័យ ថ្នាក់ទី៧ ដល់ថ្នាក់ទី១២ ដោយមានបទពិសោធន៍បង្រៀនមុខវិជ្ជាណាមួយក្នុងចំណោមមុខវិជ្ជាភាសាអង់គ្លេស សិក្សាសង្គម គណិតវិទ្យា វិទ្យាសាស្ត្រ និងគ្រូអប់រំ ពិសេសបង្រៀនមុខវិជ្ជាទាំងនោះចាប់ពី៥ឆ្នាំឡើងទៅ។ មានចំណេះដឹងភាសអង់គ្លេស ជ្រៅជ្រះនិងមានការប្តេជ្ញាចិត្តបន្តការបង្រៀនក្រោយពីបញ្ចប់កម្មវិធីបណ្តុះបណ្តាល។ កម្មវិធីនេះ នឹងចាប់ផ្ដើមទទួលពាក្យពីថ្ងៃផ្សាយ ដំណឹងនេះរហូតដល់ថ្ងៃទី១៥ ខែមេសា ឆ្នាំ២០១៧៕
