ភ្នំពេញ៖ ក្នុងរយៈពេល២៥ឆ្នាំ កម្ពុជាបានកម្ទេចគ្រាប់មីននិងយុទ្ធភណ្ឌមិនទាន់ផ្ទុះ បានជាង៣លានគ្រាប់។ អាជ្ញាធរកំចាត់មីនកម្ពុជា បានដាក់ផែនការរំដោះដីដែលសង្ស័យថាគ្របដណ្តប់ដោយសារគ្រាប់មីនឲ្យអស់នៅឆ្នាំ២០២៥។
គិតមកដល់ឆ្នាំ២០១៧នេះ គឺក្នុងរយៈពេល២៥ឆ្នាំ កម្ពុជាបានកម្ទេចគ្រាប់មីននិងយុទ្ធភណ្ឌមិនទាន់ផ្ទុះបានជាង ៣,៧លានតោន។ នេះបើយោងតាមសម្តេចនាយករដ្ឋមន្ត្រី ហ៊ុន សែន ដែលបានថ្លែងក្នុងទិវាជាតិយល់ដឹងពីមីនលើកទី១៨ នៅថ្ងៃសុក្រ ទី២៤ ខែកុម្ភៈ ឆ្នាំ២០៧នេះ។ នៅក្នុងសារលិខិតដែលបានផ្សព្វផ្សាយជាសាធារណៈសម្តេច ហ៊ុន សែន បានបង្ហាញថា ផ្ទៃដីចំនួន ១៥០០គីឡូម៉ែត្រក្រឡា ត្រូវបានរំដោះចេញពីគ្រឿងផ្ទុះទាំងនោះ។
សារលិខិតដដែលបានរៀបរាប់ថា ក្នុងចំណោមគ្រាប់មីនដែលបានកម្ទេច ក្នុងនោះមាន គ្រាប់មីនប្រឆាំងមនុស្សចំនួនជាងមួយលានគ្រាប់ (១.០៣៦.៣៧៦គ្រាប់) គ្រាប់មីនប្រឆាំងរថក្រោះជាង ២ម៉ឺនគ្រាប់(២៤.២៥១គ្រាប់) និងសំណល់ជាតិផ្ទុះពីសង្គ្រាម ជាង ២លានគ្រាប់ (២.៦៦០.៦៣៨គ្រាប់)។ នៅក្នុងនោះដែរជនរងគ្រោះដោយសារតែយុទ្ធភណ្ឌទាំងនេះបានធ្លាក់ចុះពី ៤៣២០នៅឆ្នាំ១៩៩៦ មកត្រឹម ៨៣នាក់ ក្នុងឆ្នាំ២០១៦ កន្លងទៅ។
លោក ហេង រតនា អគ្គនាយកមជ្ឈមមណ្ឌលសកម្មភាពកំចាត់មីននៅកម្ពុជា ហៅកាត់ថា ស៊ីម៉ាក់ បានប្រាប់វិទ្យុស្ត្រីនៅថ្ងៃនេះដែរថា ខេត្តបាត់ដំបូង ប៉ៃលិន និងបណ្តាខេត្តដែលស្ថិតនៅជាប់ព្រំដែនគឺជាខេត្តដែលនៅតែស្ថិតក្រោមការគំរាមកំហែងដោយសារគ្រាប់មីននិងយុទ្ធភណ្ឌមិនទាន់ផ្ទុះនៅឡើយ។
លោក ហេង រតនា បន្តថា បច្ចុប្បន្ន ស៊ីម៉ាក់ កំពុងតែបន្តសកម្មភាពបោសសំអាតនៅតាមបណ្តាខេត្តផ្សេងដែលរកឃើញនៅសេសសល់ ។ «យើងប្រឹងប្រែង ហើយផែនការរបស់យើង គឺយើងនឹងសំអាតគ្រាប់មីនគំរាមកំហែង ដល់ប្រជាពលរដ្ឋអោយអស់នៅត្រឹមឆ្នាំ២០២៥»។
តាមរបាយការណ៍របស់អាជ្ញាធរមីនកម្ពុជា បង្ហាញថា កម្ពុជានៅមានផ្ទៃដីសង្ស័យថា មានមីននិងគ្រាប់យុទ្ធភ័ណ្ឌមិនទាន់ផ្ទុះ ប្រមាណជាង ១៩៤៦គីឡូម៉ែត្រក្រឡាទៀត។ ហើយក្នុងផែនការបោសសំអាតពីឆ្នាំ២០១៧ ដល់ ២០២៥ នឹងត្រូវការថវិកាប្រមាណ ៤០៦លានដុល្លារសហរដ្ឋអាមេរិក៕
