ភ្នំពេញ៖ សាលាឧទ្ធរណ៍នៅថ្ងៃទី ២៣ កុម្ភៈ នេះ បានច្រានចោលបណ្តឹង សុំនៅក្រៅឃុំមន្ត្រីការពារសិទ្ធិមនុស្សអាដហុកចំនួនបួនរូបជាថ្មីទៀត ក្នុងសំណុំរឿងអ្នកនាងខុម ចាន់តារ៉ាទី ហៅស្រីមុំ។ មន្ត្រីអាដហុកបានដាក់បណ្តឹងសុំនៅក្រៅឃុំចំនួនបួនដងរួចមកហើយ។ ប៉ុន្តែតុលាការនៅតែរក្សាជំហររក្សាពួកគេនៅក្នុងការឃុំឃាំង។
ចៅក្រមស៊ើបសួរសាលាឧទ្ធរណ៍ នៅព្រឹកថ្ងៃព្រហស្បត្តិ៍ទី ២៣ ខែកុម្ភៈ នេះបានសម្រេចបដិសេធបណ្តឹងសុំនៅក្រៅរបស់មន្ត្រីការពារសិទ្ធិមនុស្សអាហុកចំនួនបួនរូប។ មន្ត្រីសិទ្ធិមនុស្សទាំងបួនរូបដែលជាប់សង្ស័យពីបទសូកប៉ាន់ នាងខុម ចាន់តារាទី ហៅស្រីមុំ។
នាងស្រីមុំ ដែលត្រូវលើកមកចោទថា មានទំនាក់ទំនងស្នេហាលួចលាក់ជាមួយ លោក កឹម សុខា ប្រធានស្តីទី គណបក្សសង្គ្រោះជាតិ។
មេធាវីការពារក្តីឲ្យមន្ត្រីអាដហុក លោក ឡោ ជុនធី បានថ្លែងប្រាប់ក្រុមអ្នករាយការណ៍ព័ត៌មានថាចៅក្រមស៊ើបសួរបដិសេធ ដោយសំអាងហេតុថា ការស៊ើបសួរមិនទាន់បិទបញ្ចប់។ ម្យ៉ាងទៀតចៅក្រមព្រួយបារម្ភថាមន្ត្រីអាដហុកទាំងបួនរូបអាចគេចវេសមិនចូលបំភ្លឺតុលាការ បើទោះបីមេធាវី និង អ្នកការពារសិទ្ធិមនុស្សធានាចំពោះការសង្ស័យពីការរត់គេចខ្លួននេះក៏ដោយ។ «បើតាមផ្លូវច្បាប់ យើងអត់អាចលើកសំអាងហេតុពីបញ្ហាថា បទល្មើសឧក្រិដ្ឋ ដើម្បីធ្វើការឃុំបន្តទេ។ វាប៉ះពាល់ទៅដល់គោលការសន្មតទុកជាមុន។ ខ្លាចពួកយើងមិនចូល ទោះបីខ្លួនយើងធានាឲ្យដក់លិខិតឆ្លង់ដែន ធានាការចូលខ្លួនក៏ដោយ»។
ក្នុងចំណោមមន្ត្រីការពារសិទ្ធិមនុស្សទាំងបួនរូបរួមមានលោកស្រី លឹម មុន្នី លោក នី សុខា លោក ណៃ វ៉ង់ដា និងលោក យី សុខសាន្ត។
លោកស្រី លឹម មុន្នី នៅពេលនគរបាលពន្ធនាគារបណ្តើរចេញពីបន្ទប់សវនការ មានប្រសាសន៍ថា ការសម្រេចនេះគឺជារឿងអយុត្តិធម៌ និងជាការសំរេចដោយហេតុផលនយបាយ។«ជាបញ្ហានយោបាយ ហេតុផលដែលយើងសុំនៅក្រៅឃុំ មានមូលហេតុច្បាស់លាស់ពិតប្រាកដទៅតាមច្បាប់ ក៏ប៉ុន្តែគេនៅតែមិនសម្រេច ឲ្យយើងនៅក្រៅឃុំបាន»។
លោក សំ ចាន់គា អ្នកនាំពាក្យសមាគមអង្គការអាដហុក ដែលទៅឃ្លាំមើលសវនាការ នៅ សាលាឧទ្ធរណ៍នៅថ្ងៃនេះមានប្រសាសន៍ថា ការសម្រេចឃុំខ្លួនសហសេវិករបស់លោកនេះ មិនសមហេតុផលឡើយ។ «យើងគិតថា ហេតុផលបន្តឲ្យមានការឃុំខ្លួន វាមិនសមហេតុសមផលទេ។ ដំណាក់កាលនៃការស៊ើបអង្កេតរបស់ចៅក្រមក៏ដល់ទីបញ្ចប់ដែរ ហើយម្យ៉ាងទៀតយើងអត់មានសម្ពាធទៅដល់ដំណើរនីតិវិធីទេ»។
នៅពេលនគរបាលអនុរក្សពន្ធនាគារបណ្តើរអ្នកការពារសិទ្ធិមនុស្ស ចូលទៅក្នុងរថយន្តឆ្ពោះ ទៅកាន់មន្ទីរឃុំខ្លួនវិញ អ្នកការពារសិទ្ធិមនុស្ស ទាំងនោះបានស្រែករិះគន់ សេចក្តីរបស់តុលាការថា ស្ថិតនៅក្រោមសម្ពាធអ្នកនយោបាយ៕
