ភ្នំពេញ ៖ ការិយាល័យសហចៅក្រមស៊ើបអង្កេតបានលើកលែងការចោទប្រកាន់ អតីតចៅហ្វាយស្រុកម្នាក់នៃរបបខ្មែរក្រហម នៅថ្ងៃពុធនេះ។
មេធាវីការពារជនរងគ្រោះបានហៅការលើកលែងការចោទប្រកាន់នេះថាជាការសម្រេច«យ៉ាងអយុត្តិធម៌»។
នៅក្នុងសេចក្តីប្រកាសព័ត៌មានរបស់ខ្លួះនៅថ្ងៃពុធទី២២ កុម្ភៈនេះ សហចៅក្រមស៊ើបអង្កេតបានគូសបញ្ជាក់ថាលោកស្រីអ៊ឹម ចែម អាយុ៦៧ ឆ្នាំ«មិនមែនជាមេដឹកនាំជាន់ខ្ពស់»នៃរបបខ្មែរក្រហមដូច្នេះលោកស្រី«មិនស្ថិតនៅក្រោមយុត្តាធិការ»របស់សាលាក្តីនោះទេ។
សាលាក្តីខ្មែរក្រហមដែលឧបត្ថម្ភដោយអង្គការសហប្រជាជាតិមានគោលដៅចោទប្រកាន់និងនាំខ្លួនយកមកកាត់ទោសចំពោះអតីតមេដឹកនាំខ្ពស់បំផុតនិងអ្នកទទួលខុសត្រូវខ្ពស់បំផុតនៃរបបកម្ពុជាប្រជាធិបតេយ្យ។របបនេះដែលត្រូវស្តីបន្ទោសថាបានបង្កឲ្យពលរដ្ឋកម្ពុជាស្លាប់អស់យ៉ាងតិច១,៧លាននាក់ចន្លោះពីឆ្នាំ១៩៧៥ ដល់ឆ្នាំ ១៩៧៩។
លោកស្រី អ៊ឹម ចែម បច្ចុប្បន្នជាជំទប់ឃុំម្នាក់ក្នុងស្រុកអន្លង់វែង ខេត្តឧត្តមានជ័យ ត្រូវគេដឹងថាធ្លាប់មានតួនាទីជាចៅហ្វាយស្រុកព្រះនេត្រព្រះ និងធ្លាប់បានចុះត្រួតពិនិត្យការដ្ឋានទំនប់ត្រពាំងថ្មដែលនៅទីនោះ មនុស្សជាច្រើនម៉ឺននាក់ត្រូវបានសម្លាប់និងបានស្លាប់ក្នុងការធ្វើពលកម្មដោយបង្ខំ។
លោកស្រីត្រូវដាក់ឲ្យស្ថិតក្រោមការត្រួតពិនិត្យរបស់តុលាការដោយកំបាំងមុខចាប់តាំងពីខែមិនា ឆ្នាំ២០១៥ ក្រោមបទសង្ស័យទាក់ទងនឹងឧក្រិដ្ឋ កម្មប្រឆាំងមនុស្សជាតិ និងអំពើមនុស្សឃាត ប្រព្រឹត្តិនីមន្ទីរសន្តិសុខឃុំទ្រយោង និងការដ្ឋានស្ពានស្រែង។ ប៉ុន្តែលោកស្រីបានបដិសេធជាបន្តបន្ទាប់ថាលោកស្រីមិនជាប់ពាក់ពន្ធ័នឹងបទឧក្រិដ្ឋទាំងនោះទេ។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានប្រាប់វិទ្យុស្ត្រីនៅថ្ងៃនេះដែរថា ការសម្រេចលើកលែងការចោទប្រកាន់លើ លោកស្រីអ៊ឹម ចែម បន្ទាប់ចៅក្រមជាតិ និងអន្តរជាតិ បានវាយតម្លៃទៅលើភស្តុតាង ដែលបានប្រមូលក្នុងអំឡុងស៊ើបសួរ។ «គឺចៅក្រមស៊ើបអង្កេតជាតិ និងអន្តរជាតិ គាត់ធ្វើការងារដោយលើវិជ្ជាជីវៈជាចៅក្រមហើយនឹងការអនុវត្តតាមផ្លូវច្បាប់ ហើយការសម្រេចលើកលែងការចោទប្រកាន់នេះ គឺឈរលើមូលដ្ឋានមួយ ថាភស្តុតាងដែលយើងស៊ើបអង្កេតនាពេលកន្លងទៅ ប្រឆាំងទៅនឹងជនសង្ស័យ អ៊ឹម ចែម នេះ ចុងក្រោយទៅរកឃើញថា លោកស្រីអ៊ឹម ចែម មិនស្ថិតនៅក្រោមយុត្ថាធិការ ដែលត្រូវជម្រះទេ»។
រាជរដ្ឋាភិបាលកម្ពុជាធ្លាប់បានបង្ហាញចេតនាប្រឆាំងនឹងការពង្រីកការស៊ើបអង្កេតបន្ថែមលើអតីតមេដឹកនាំនិងអ្នកទទួលខុសត្រូវខ្ពស់បំផុតនៃរបបខ្មែរក្រហមដោយរដ្ឋាភិបាលព្រមានថាការណ៍នេះអាចនឹងបង្កឲ្យកើតសង្គ្រាមស៊ីវិលឡើងវិញ។ការទុបស្កាត់នេះដែលត្រូវមតិរិះគន់ជាច្រើនថារដ្ឋាភិបាលបានជ្រៀតជ្រែកផ្នែកនយោបាយលើសាលាក្តីខ្មែរក្រហម។
យ៉ាងណាក៏ដោយលោក នេត្រ ភក្ត្រា បានអះអាងថាការសម្រេចចិត្តរបស់សហចៅក្រមស៊ើបអង្កេតនៅថ្ងៃនេះ មិនពាក់ពន្ធ័នឹងរឿងនយោបាយណាមួយនោះទេ។
លោក ហុង គឹមសួន មេធាវីតំណាងឲ្យដើមបណ្តឹរដ្ឋប្បវេណីនិងជាអតីតកងយុវជននៅការដ្ឋានត្រពាំងថ្ម នៃស្រុកព្រះនេត្រព្រះ ខេត្តបន្ទាយមាន ជ័យ។ លោកចាត់ទុកថាការសម្រេចរបស់សហចៅក្រមស៊ើបអង្កេតមានលក្ខណ«អយុត្តិធម៌»សំរាប់ជនរងគ្រោះ។ «ចំពោះការលើកលែងយាយចែម មួយខ្ញុំបារម្ភទៅដល់បីបួននាក់ទៀត តាទិត តាអាន ឬក៏ស៊ូ ម៉េត អីណាទៀតហ្ន.. វាលើសពីអយុត្តិធម៌ទៅទៀតចំពោះជាគំនិតរបស់ខ្ញុំ ខ្ញុំនិយាយ ក្នុងនាមខ្ញុំជាជនរង គ្រោះវិញ វាអយុត្តិធម៌ណាស់ចំពោះខ្ញុំ ហើយយើងជាមេធាវីរបស់ជនរងគ្រោះ យើងក៏ជាជនរង គ្រោះ ដែរ យើងជាមេធាវីជនរងគ្រោះដើមបណ្តឹងទៀត យើងដឹងយើងយល់យើងឃើញជាក់ ច្បាស់»។
ទោះជាបែបនេះក្តីលោកនេត្រ ភក្ត្រា អ្នកនាំពាក្យសាលាក្តីខ្មែរក្រហមបញ្ជាក់ថាភាគីដែលមិនយល់ស្របអាចនឹងប្តឹងសារទុក្ខបាន៕
