Gambia ៖ ប្រធានាធិបតីថ្មីនៃប្រទេសGambia លោក Aadama Barrow បាននិយាយថា លោកចាប់ផ្ដើមហៅអ្នកជំនាញខាងច្បាប់មកពិភាក្សាគ្នា ដើម្បីកែទម្រង់ប្រព័ន្ធយុត្ដិធម៌នៅប្រទេស Gambia ឡើងវិញ។
ការថ្លែងរបស់លោក Aadama Barrow ធ្វើឡើងនៅពេលលោកធ្វើពិធីស្បថចូលកាន់តំណែងជាផ្លូវការ កាលពីថ្ងៃអាទិត្យ ទី ១៩ កុម្ភៈ ។
ថ្លែងក្នុងពិធីនោះ លោក Aadama Barrow បានចាត់ទុកប្រព័ន្ធតុលាការដែលស្ថិតនៅក្រោមការគ្រប់គ្រងរបស់អតីតប្រធានាធិបតី Yaya Jammeh ថា មិនបានបម្រើពលរដ្ឋទូទៅនោះទេ ហើយស្ថិតនៅក្រោមឥទ្ធិពលរបស់លោក Jammeh ។
លោក សន្យាថា ក្នុងខណៈលោកជាប្រធានាធិបតី គឺ តុលាការត្រូវតែអព្យាក្រឹត្យ ឯករាជ្យ និងកាត់ក្ដីដោយយុត្ដិធម៌ ។
ស្របពេលនេះ មានសេចក្ដីរាយការណ៍ថា ចៅក្រមភាគច្រើនដែលមាននិន្នាការទៅរកលោក Jammeh បានបោះបង់ចោលតួនាទីរបស់ខ្លួន។
ពេលជាមួយគ្នានេះ ឧត្ដមសេនីយ៍មួយចំនួនជាសាច់ញាតិរបស់លោក Jammeh ក៏បានរត់ភៀសខ្លួនចេញពីប្រទេសនេះផងដែរ ខណៈមនុស្ស ៥៣នាក់ ដែលគេរកឃើញថា បង្កើតក្រុមប្រដាប់អាវុធឱ្យលោក Jammeh ត្រូវបានចាប់ឃុំខ្លួន។
Gambia ជាប្រទេសតូចមួយនៅភាគខាងលិចនៃទ្វីបអាហ្វ្រិច ។ ប្រទេសនេះ បានស្ថិតនៅក្រោមការដឹកនាំដោយអំណាចផ្ដាច់ការរបស់លោក Jammeh អស់រយៈពេល ២២ឆ្នាំ ៕ ប្រភព: Vanguard
