ភ្នំពេញ៖សហចៅក្រមស៊ើបអង្កេតរបស់សាលាក្តីខ្មែរក្រហមនៅទីបំផុតបានសំរេចលើកលែងការចោទប្រកាន់លើលោកស្រី អ៊ឹម ចែម អតីតចៅហ្វាយស្រុកព្រះនេត្រព្រះ ខេត្តបន្ទាយមាន ជ័យ ដោយសារលោកស្រីត្រូវបានចាត់ទុកថា «មិនមែនជាមេដឹកនាំជាន់ខ្ពស់» នៃរបបខ្មែរ ក្រហម។
សាលាក្តីខ្មែរក្រហមដែលឧបត្ថម្ភដោយអង្គការសហប្រជាជាតិមានគោលដៅចោទប្រកាន់និងនាំខ្លួនយកមកកាត់ទោស ចំពោះអតីតមេដឹកនាំខ្ពស់បំផុតនិងអ្នកទទួលខុសត្រូវខ្ពស់បំផុតនៃរបបកម្ពុជាប្រជាធិបតេយ្យ។ របបនេះដែលត្រូវស្តីបន្ទោសថា បានបង្កឲ្យពលរដ្ឋកម្ពុជាស្លាប់អស់យ៉ាងតិច ១,៧លាននាក់ចន្លោះពីឆ្នាំ១៩៧៥ដល់ឆ្នាំ១៩៧៩។ លោកស្រី អ៊ឹម ចែម បច្ចុប្បន្នជាជំទប់ឃុំម្នាក់ក្នុងស្រុកអន្លង់វែង ខេត្តឧត្តមានជ័យ ត្រូវគេដឹងថា ធ្លាប់មានតួនាទីជាចៅហ្វាយស្រុកព្រះនេត្រព្រះ និងធ្លាប់បានចុះត្រួតពិនិត្យការដ្ឋានទំនប់ត្រពាំងថ្មដែលនៅទីនោះ មនុស្សជាច្រើនម៉ឺននាក់ត្រូវបានសម្លាប់និងបានស្លាប់ក្នុងការធ្វើពលកម្មដោយបង្ខំ។
នៅក្នុងសេចក្តីប្រកាសព័ត៌មាននៅថ្ងៃពុធ ទី២២ ខែកុម្ភៈនេះ សហចៅក្រមស៊ើបអង្កេតបានប្រកាសថាលោកស្រីអ៊ឺម ចែម «មិនស្ថិតនៅក្រោមយុត្តាធិការ» របស់សាលាក្តីនោះទេ។ ជាមួយគ្នានេះដែរសហចៅក្រុមស៊ើបអង្កេតក៏បានសំរេចបដិសេធពាក្យសុំតាំងខ្លួនជាដើមបណ្តឹងរដ្ឋប្បវេណីផងដែរ៕
