ភ្នំពេញ៖នាយិកាសង្គមស៊ីវិលពីររូប ដែលឆ្លងកាត់បទពិសោធន៍ការងារជាច្រើនឆ្នាំ មានប្រ សាសន៍ថា ថ្វីបើពួកគាត់មិនបានចូលឈរឈ្មោះ ក្នុងគណបក្សនយោបាយក៏ដោយ ក៏ប៉ុន្ដែពួកគាត់ក៏កំពុងធ្វើនយោបាយដែរ គឺការជួយអប់រំយុវជន ស្ដ្រី និងកុមារ ឲ្យយល់ដឹងពីច្បាប់និងសិទ្ធិរបស់ខ្លួនក្នុងសង្គម មិនតែប៉ុណ្ណោះក៏បានអប់រំយុវជនទាំងនោះឲ្យក្លាយជនបង្គោលក្នុងការអភិវឌ្ឍប្រទេសជាតិផងដែរ។
ខណៈការបោះឆ្នោតក្រុមប្រឹក្សាឃុំសង្កាត់ជិតចូលមកដល់ គេសង្កេតឃើញ គណបក្សនយោបាយមួយចំនួន ធ្វើសកម្មភាពយ៉ាងសកម្ម។ មិនថាឡើយសកម្មជនបក្សនយោបាយ សូម្បីពលរដ្ឋមួយចំនួនក៏ចាប់អារម្មណ៍នឹងការបោះឆ្នោតខាងមុខនេះដែរ ព្រោះជាព្រឹត្តិការណ៍ ៥ឆ្នាំមានម្ដង។ អំឡុងនេះស្ត្រីជាសកម្មជនគណបក្សនយោបាយ ក៏បានធ្វើសកម្មភាពគួរឱ្យកត់សំគាល់ដែរ។ តែចំណុចគួរពិចារណា ហេតុអ្វីបានជាស្ត្រីមេដឹកនាំអង្គការសង្គមស៊ីវិល មួយចំនួន ហាក់មិនចាប់អារម្មណ៍ ចូលប្រឡូកក្នុងវិស័យនិយោបាយ។
វិទ្យុស្ត្រីបន្តសាកសួរនាយិកាអង្គការពីររូបទៀត ពីចំណង់ចំណូលចិត្តពួកគាត់ លើវិស័យនយោបាយពេលនេះ។ ក្នុងនោះលោកស្រី ម៉ប់ សូម៉ាយ៉ា នាយិកាអង្គការមិត្ដសម្លាញ់ ដែលធ្វើការងារលើកកម្ពស់សិទ្ធិស្ដ្រី និងកុមារ មានប្រសាសន៍ថា ជាការពិតការងាររបស់លោកស្រីគឺកំពុងតែធ្វើនយោបាយ។ ដែលនយោបាយនេះគឺបណ្ដុះស្មារតីស្ដ្រីនិងកុមារឲ្យមានភាពក្លាហានចូលរួមកិច្ចការសង្គមផ្សេងៗ។
លោកស្រី ម៉ប់ សូម៉ាយ៉ា ឲ្យដឹងថា ការងារផ្នែកនយោបាយ ចំពោះលោកស្ដ្រីពិតជាមានចំណង់ខ្លាំងណាស់ កាលពីវ័យកុមារភាព ប៉ុន្ដែក្ដីស្រម៉ៃរបស់លោកស្រី ត្រូវរលាយបាត់ក្រោមរបបប៉ុលពតដែលសម្លាប់ឪពុក និងស្វាមី។ តែបើទោះជាក្ដីរំពឹងរបស់លោកស្រី មិនបានឈានដល់គោលដៅក៏ពិតមែន ប៉ុន្ដែក្រោយរបបប៉ុលពតបញ្ចប់លោកស្រីបានចូលធ្វើការងារអង្គការ ដែលលើកកម្ពសសិទ្ធិស្ដ្រីនិងកុមារ និងលើកទឹកចិត្ដពួកគាត់ឲ្យចាប់យកក្ដីស្រម៉ៃរបស់ខ្លួន កុំឲ្យបាត់បង់ឱកាសដូចលោកស្រី។ លោកស្រី ម៉ប់ សូម៉ាយ៉ា៖«ខ្ញុំកំពុងធ្វើនយោបាយហ្នឹងឯង នយោបាយរបស់ខ្ញុំ គឺការចូលរួមអភិវឌ្ឍន៍ប្រទេសជាតិ តាមរយៈអភិវឌ្ឍក្រុមកុមារយុវវ័យ និងគ្រួសារដែលបាត់បង់ឱកាស ដើម្បីឲ្យពួកគាត់មានឱកាសចូលរួមអភិវឌ្ឍន៍ប្រទេសជាតិយើងដែរ។»
យ៉ាងណាលោកស្រី ម៉ប់ សូម៉ាយ៉ា ក៏ទូទចឲ្យស្ដ្រីត្រូវតែហ៊ានឈោងចាប់ក្ដីស្រម៉ៃរបស់ខ្លួននៅពេលដែលមានឱកាស និងបង្កើតក្ដីស្រម៉ៃរបស់ខ្លួនឲ្យបានជាក់លាក់។ ចំណែកគណបក្សនយោបាយត្រូវតែធ្វើយ៉ាងណាផ្ដល់ភាពយុត្ដិធម៌ដល់ស្ដ្រីដើម្បីចូលរួមកិច្ចការនយោបាយដោយស្នើភាពជាមួយបុរស។
ចំណែកលោកស្រី ធីតា ឃឹះ នាយិកាអង្គការសីលការដែលធ្វើការងារលើកកម្ពស់សិទ្ធិស្ដ្រីមានប្រសាសន៍ថា ប្រសិនលោកស្រីស្ថិតនៅវ័យក្មេងគឺលោកស្រីនឹងឈរឈ្មោះជាបេក្ខជនក្នុងគណបក្សនយោបាយដែរ ដើម្បីចូលរួមការអភិវឌ្ឍប្រទេសនិងបង្ហាញពីសមត្ថភាពរបស់ស្ដ្រីឲ្យបុរសបានឃើញថាស្ដ្រីក៏មានសមត្ថភាពមិនចាញ់ក្រុមបុរសដែរ។ តែដោយសារបច្ចុប្បន្ននេះ វ័យរបស់លោកស្រីមិនសមស្របទើបលោកស្រីនៅតែបន្ដការងារជាប្រធានអង្គការដែលជួយគាំពារស្ដ្រី និងលើកទឹកចិត្ដស្ដ្រី ដើម្បីឲ្យពួកគាត់មានភាពក្លាហាន ក្នុងការចូលរួមការងារទាំងផ្នែកសង្គមនិងវិស័យនយោបាយ។ តែយ៉ាងនេះក្ដី លោកស្រីអំពាវនាវដល់គ្រប់គណបក្សនយោបាយត្រូវផ្ដល់ភាពអាទិភាពសម្រាប់ ស្រី្ត។ ជាងនេះលោកស្រីសង្កត់ធ្ងន់ថា រាជរដ្ឋាភិបាគឺជាស្ថាប័នទីមួយដែលត្រូវរៀបចំកិច្ចការកំណត់ឲ្យគណបក្សនយោបាយមានតម្លាភាពចំពោះស្ដ្រីក្នុងវិស័យនយោបាយ។ លោកស្រី ធីតា ឃឹះ៖«ដូចខ្ញុំនិយាយអញ្ចឹងរដ្ឋាភិបាលគួរតែមានកម្រិតដាក់ទៅគណបក្សនយោបាយដើម្បីឲ្យគាត់មានវិធានការពិសេស ហើយគណបក្សនយោបាយក៏ត្រូវតែមានឆន្ទៈនយោបាយដោយយកចិត្ដទុកដាក់ បំរើសេវាទៅប្រជាពលរដ្ឋ ហើយអ្នកនយោបាយត្រូវគិតដែរថា បើគាត់មានស្ដ្រីច្រើនជួយធ្វើការគាត់ នោះការងារនឹងល្អប្រសើរ។»
ដោយឡែកនាយិកាអង្គការ បីរូបទៀតដែលវិទ្យុស្រ្ដីបានសាកសួរដែរគឺលោកស្រី រស់ សុភាព នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា លោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា និង លោកស្រី អុក ឆាយ៉ាវី ប្រធានសមាគមគ្រូបង្រៀកម្ពុជាឯករាជ្យ ក៏បាននិយាយថា ពួកគាត់ក៏មិនប្រឡូកក្នុងវិស័យនយោបាយដែរ ដោយសារតែពួកគាត់មើលឃើញថា បញ្ហាសង្គម និង បញ្ហាស្ត្រីនៅតែត្រូវការ អង្គការសង្គមស៊ីវិលជួយពួកគាត់បន្តទៀត៕
