យោងតាមសេចក្ដីថ្លែងការណ៍របស់អង្គការ Human Rights Watch តំណាងដោយនាយករងលោក Phil Robertson បានហៅច្បាប់ស្ដីពីគណបក្សនយោបាយកម្ពុជា ដែលត្រូវបានសមាជិកសភាគណបក្សប្រជាជនអនុម័ត ថាដូចជាយកកាំភ្លើងភ្ជង់បេះដូងគណបក្សសង្គ្រោះជាតិ។
សេចក្ដីថ្លែងការណ៍របស់អង្គការ Human Rights Watch បានធ្វើឡើងស្របពេលដែល សមាជិកសភាគណបក្សប្រជាជន កាលពីព្រឹកមិញនេះ បានប្រជុំអនុម័តលើសេចក្ដីស្នើច្បាប់នេះ ដោយសំលេង ៦៦ លើ ៦៦ ហើយក្នុងនោះមានវត្តមានសម្ដេចនាយរដ្ឋមន្ដ្រីដែរ។
សេចក្ដីថ្លែងការណ៍របស់អង្គការ Human Rights Watch បានបញ្ជាក់ថា ច្បាប់ថ្មីនេះ គឺជាការកត់សម្គាល់នៃពង្រឹងអំណាចផ្ដាច់ការ របស់លោកសម្ដេចហ៊ុនសែន និងគណបក្សប្រជាជនកម្ពុជា ហើយជាការបញ្ជាក់នូវជោគជ័យនៃការគ្រប់គ្រងបែបផ្ដាច់ការបើទោះជាកម្ពុជាត្រូវបានការពារសិទ្ធិដោយកិច្ចព្រមព្រៀងទីក្រុងប៉ារីស អោយជាប្រទេសប្រជាធិបតេយ្យពហុបក្សក៏ដោយ។
ក្នុងន័យនេះ Human Rights Watch បានបញ្ចេញនូវពាក្យមួយឃ្លាថា វាមិនមានជាការនិយាយបំផ្លើសអ្វីទេ ការធ្វើវិសោធនកម្មច្បាប់នេះ គឺ ដូចជា យកកាំភ្លើងខ្លីភ្ជង់ចំបេះដូងគណបក្សសង្គ្រោះជាតិ ហើយបន្សល់ទុកនូវការចោទសួរមួយគឺការធ្វើអត្ដឃាតនយោបាយដោយចាប់ផ្ដើមពីច្បាប់ថ្មីនេះតទៅ ។
Human Rights Watch ថា ច្បាប់នេះគឺជាយុត្ដិសាស្ដ្ររបស់នាយករដ្ឋមន្ដ្រី ធ្វើឡើងដើម្បីបំបិទសំលេងក្រុមប្រឆាំង និងសង្គមស៊ីវិលដោយការចាប់ខ្លួនអ្នកការពារសិទ្ធិមនុស្សរួចទៅហើយ។
ជាមួយគ្នានេះ អង្គការ Human Rights Watch មើលឃើញថា បច្ចុប្បន្នកម្ពុជាអនុវត្តការគ្រប់គ្រងប្រទេស អាក្រក់ជាងប្រទេសវៀតណាមដែលកាន់របបកុមុយនីស្ដ ទៅទៀត។ តែបែបនេះក្ដី អ្នកនាំពាក្យទីស្ដីការគណៈរដ្ឋមន្ដ្រី លោក ផៃ ស៊ីផាន បានចាត់ទុកថា អង្គការHuman Rights Watch ជារបស់គណបក្សសង្ក្រោះជាតិ។ លោក មិនចាប់អារម្មណ៍និងសេចក្ដីថ្លែងការណ៍នេះទេ ។
លោក ផៃ ស៊ីផាន បានបញ្ជាក់ថា សេចក្ដីថ្លែងការណ៍របស់អង្គការ Human Rights Watch គ្មានអ្វីគួរអោយចាប់អារម្មណ៍នោះទេ។
លោក ផៃ ស៊ីផាន៖ «ទីមួយខ្ញុំជឿថា Human rights Watch គាត់មិនមានអ្វីជាដុំកំភួនក្នុងការពិសោធន៍រៀបចំសង្គមណាមួយ ទេ គាត់គ្រាន់ចេញសេចក្ដីថ្លែងការណ៍តាមមនោសញ្ចេតនារបស់គាត់។កម្ពុជាធ្វើច្បាប់នឹង គឺ យើងប្រឆាំងនិទណ្ឌភាព យើងចង់បានសង្គមមួយដែលស្អាតស្អំ គឺ យើងអត់មានចង់បានកូនអុក ពួក Human rights Watch នោះទេ ដោយសារ Human rights Watch គេកាន់ជើងកូនអុកដើម្បីបំផ្លាញដល់ភាពសុខសាន្ដរបស់កម្ពុជា ហើយនិតីរដ្ឋកម្ពុជា។ ដូច្នេះមានអ្វីជាការចាប់អារម្មណ៍ គ្មានអ្វីភ្ញាក់ផ្អើល » ។
សេចក្ដីស្នើច្បាប់ស្ដីពីគណបក្សនយោបាយ ដែលសភាបានអនុម័តកាលពីព្រឹកមិញនេះ គឺ បានផ្ដល់សិទ្ធិអំណាចទៅក្រសួងមហាផ្ទៃ ជាស្ថាប័ន មានសិទ្ធិអំណាចផ្អាកសកម្មភាពគណបក្សនយោបាយ ហើយមានសិទ្ធិជាដើមបណ្ដឹងប្ដឹងទៅតុលាការកំពូលដើម្បីអោយរំលាយគណបក្សនយោបាយណាដែលរកឃើញថា បានប្រព្រឹត្តខុសនិងច្បាប់៕
