បើពុំមានការវិនិយោគលើបញ្ហាយេនឌ័រនោះទេ ក្នុងរយៈពេល១៣ឆ្នាំទៀត ស្រ្ដី និងក្មេងស្រី នៅប្រទេសកម្ពុជាអាចនឹងត្រូវផាត់ចេញឆ្ងាយពីសង្គម។ នេះជាការកត់សំគាល់របស់មន្ត្រីអង្គការភ្លែនអន្តរជាតិកម្ពុជា។ ការកត់សំគាល់នេះធ្វើឡើងក្នុងកម្មវិធីប្រកាសដំណើរការថ្នាក់ខេត្តនៃផែនការយុទ្ធសាស្រ្ដប្រចាំប្រទេស ២០១៦- ២០២១ ក្នុងខេត្តសៀមរាប។ កញ្ញា ជាតា ជូនសេចក្តីរាយការណ៍ពីខេត្តសៀមរាប ដូចតទៅ៖
មន្ត្រីជាន់ខ្ពស់របស់អង្គការភ្លែនអន្តរជាតិកម្ពុជាលើកឡើងថា ក្មេងស្រីនិងស្ត្រីរាប់លាននាក់នៅក្នុងប្រទេសកម្ពុជា«នៅតែមិនទទួលបានការយកចិត្ត» ហើយពួកគេនឹងត្រូវផាត់ចេញពីសង្គមនៅត្រឹមឆ្នាំ២០៣០គឺក្នុងរយៈពេល១៣ឆ្នាំទៀត ប្រសិនបើគ្មានការវិនិយោគលើផ្នែកយេនឌ័រទេនោះ។
លោក យី គីមថាន ប្រធានកម្មវិធីជាតិរបស់អង្គការភ្លែនអន្ដរជាតិកម្ពុជា បានអះអាងយ៉ាងដូច្នេះក្នុងកម្មវិធីប្រកាសដំណើរការថ្នាក់ខេត្តនៃផែនការយុទ្ធសាស្ដ្រប្រចាំប្រទេស២០១៦- ២០២១ ក្នុងខេត្តសៀមរាប កាលពីថ្ងៃទី១៧ខែកុម្ភៈ។ ផែនការយុទ្ធសាស្ដ្រនេះស្ថិតក្នុងគម្រោងកិច្ចជួយគាំពារស្ដ្រី និងក្មេងស្រី ឱ្យរួចផុតពីការរំលោភបំពាន និងចាកចេញពីភាពក្រីក្រ។
លោក យី គីមថាន៖«មានក្មេងស្រី និងស្ដ្រីរាប់លាននាក់ រួមទាំងក្មេងស្រី និងស្ដ្រីនៅប្រទេសកម្ពុជាផងដែរនៅតែមិនទទួលបានការយកចិត្តទុកដាក់និងត្រូវបានផាត់ចេញពីសង្គមនៅឆ្នាំ ២០៣០នោះ ប្រសិនបើយើងគ្មានការវិនិយោគដែលផ្ដោតការរយកចិត្តទុកដាក់លើបញ្ហាទាក់ទងនឹងយេនឌ័រ»។
លោក យី គីមថាន កត់សំគាល់ឃើញថា មានគោលដៅអភិវឌ្ឍន៍ប្រកបដោយចីរភាពសំរាប់ស្ត្រី ប៉ុន្តែមិនមានសកម្មភាពជាក់លាក់ណាមួយដែលត្រូវអនុវត្តន៍ដែលអាចជួយដល់ស្ដ្រីនិងក្មេងស្រីឱ្យពួកគាត់ចាកចេញពីភាពក្រីក្រ និងការរំលោភបំពានផ្សេងៗនោះទេ ។
លោក យី គីមថាន បានឱ្យដឹងទៀតថា ស្ដ្រី និងក្មេងស្រី អាចជួបប្រទះបញ្ហាប្រឈមនានានៅក្នុងសង្គមច្រើនជាងបុរស ។
លោក យី គីមថាន ៖ «យើងឃើញថាបញ្ហាច្រើនដែលពាក់ព័ន្ធលើក្មេងស្រី ហើយនិងស្ដ្រី។ យើងមើលតំបន់ប្រតិបត្តិកម្មវិធីយើងមួយចំនួន ទាក់ទងទៅនឹងអត្រាបោះបង់ការសិក្សា យើងឃើញថា ក្មេងស្រី ច្រើនជាងក្មេងប្រុស ការរៀបការវ័យក្មេង ..។ មួយវិញទៀតបើស្ដ្រីមិនបានទទួលនូវការអប់រំឱ្យបានខ្ពស់ទេ ក៏គាត់(ស្ដ្រី) មិនមានសិទ្ធិអំណាចទាក់ទង់នឹងសេដ្ឋកិច្ចក៏ដូចជាការសម្រេចចិត្តនៅក្នុងគ្រួសាររបស់គាត់ដែរ ចឹងជាហេតុធ្វើអោយមានការរំលោភបំពានទៅលើមនុស្សស្រីច្រើនជាងមនុស្សប្រុស»។
លោក សង់ រីហា អភិបាលរងខេត្តសៀមរាប បានថ្លែងក្រោយពីពិធីប្រកាសផែនការយុទ្ធសាស្ដ្រខាងលើដោយទទួលស្គាល់ថាកុមារនិងស្ត្រីនៅក្នុងខេត្តរបស់លោកមានសភាពយ៉ាប់យ៉ឺន ជាពិសេសនៅតាមតំបន់ដា់ច់ស្រយាល។
លោកសង់ រីហា ៖ « នៅពេលដែលអង្គការ ភ្លែនចុះជួយចឹងទៅ ដូចជាកុមារីបោះបង់ចោលការសិក្សា អង្គការបានជួយពន្យល់ណែនាំនិងផ្តល់ការឧបត្ថម្ភ គាត់(ស្ត្រី) ដឹងខ្លួនក៏ត្រឡប់ចូលសាលារៀនផង តស៊ូផង ព្យាយាមផង ធ្វើឲ្យគាត់សំរេចបានគោលដៅ»។
បន្ថែមពីនោះ លោកអភិបាលរងខេត្តបញ្ជាក់ថា សាលាខេត្តមានផែនការយុទ្ធសាស្ត្រនិងថវិកាដើម្បីគាំពារដល់ការផ្គត់ផ្គង់ស្ត្រីនិងក្មេងស្រីក្នុងឆ្នាំ២០១៧នេះ។
កញ្ញា សុវណ្ណ ស្រីលីស និស្សិតមកពីសាកលវិទ្យាល័យបៀប្រាយក្នុងក្រុងសៀមរាប និងជាបុគ្គលិកបម្រើការងារនៅសណ្ឋាគារ Lotus Blanc បានរម្លឹករឿងរបស់ខ្លួនកាលនៅរៀនវិទ្យាល័យ ប្រាប់ដល់អ្នកចូលរួមក្នុងកម្មវិធីដែរថា កញ្ញាស្ទើរតែបោះបង់ការសិក្សាចោលដោយសារជីវភាពគ្រួសារដុនដាបខ្លាំងពេក។
កញ្ញា សុវណ្ណ ស្រីលីស ៖ « ពីព្រោះដោយសារតែគ្រួសាររបស់ខ្ញុំមានបញ្ហាខ្វះខាត ហើយនិងមិនត្រឹមណ្ណឹងទេ មាន មីង ពូ ខ្ញុំជាច្រើនគាត់បាននិយាយថា ហ្ហែងនៅដល់ណាទៀត ឱពុកម្ដាយក៏ចាស់ ហើយគ្រួសារក៏ក្រីក្រ ហេតុអីក៏មិនទៅធ្វើការងារដូចជាមួយមិត្តភក្ដិ និងបងប្អូនជីដូនមួយដទៃទៀត បានទៅធ្វើការនៅប្រទេសថៃ ឬក៏ធ្វើការងាររោងចក្រ និងការងារសំណង់ដ៏ទៃទៀត ជួយផ្គត់ផ្គង់គ្រួសារ»។
កាលពីថ្ងៃទី ២៩ ខែវិច្ឆិកា ឆ្នាំ២០១៥ អង្គការលីកាដូ បានបញ្ចេញនូវរបាយការណ៍មួយ ស្ដីពី ៖ «ការរួចខ្លួនពីបទល្មើស៖ ការអនុវត្តច្បាប់ចំពោះបទល្មើសរំលោភសេពសន្ថវៈក្នុងប្រព័ន្ធតុលាការកម្ពុជា»។ របាយការណ៍នោះ បានរកឃើញពីភាពទន់ខ្សោយយ៉ាងធ្ងន់ធ្ងររបស់ប្រព័ន្ធយុត្តិធម៌នៅកម្ពុជាដូចជា កំហុសឆ្គងជាច្រើនពាក់ព័ន្ធនឹងអំពើពុករលួយ អាកប្បកិរិយារើសអើងចំពោះស្ដ្រី និងក្មេងស្រី ការបកស្រាយច្បាប់ខុស។
អង្គការលីកាដូបានបង្ហាញភស្ដុតាង នៃការមិនបានអនុវត្តឲ្យបានត្រឹមត្រួវ នៅក្នុងប្រព័ន្ធតុលាការ ក្នុងការស៊ើបអង្កេត ផ្ដន្ទាទោសឲ្យបានត្រឹមត្រូវ ចំពោះករណីនៃបទល្មើសរំលោភសេពសន្ធវៈ និងប៉ុនប៉ងរំលោភសេពសន្ថវៈជាដើម៕
