សភា៖ ច្បាប់ស្ដីពីគណបក្សនយោបាយដែលឈានដល់ការរំលាយគណបក្សណាប្រព្រឹត្តអំពើខុសច្បាប់ ត្រូវបានសភាមកពីគណបក្សកាន់អំណាច អនុម័តទាំងស្រុងដោយសំលេង ៦៦ លើ ៦៦ សំលេង ទោះជាគណបក្សប្រឆាំងមិនគាំទ្រក៏ដោយ។
យោងតាមអ្នករាយការណ៍ព័ត៌មានរបស់វិទ្យុស្ដ្រីកិច្ចប្រជុំសភាព្រឹកមិញនេះ ប្រព្រឹត្តទៅដោយមានវត្តមានសម្ដេចនាយករដ្ឋមន្ដ្រី ហ៊ុន សែន ។
របៀបវារៈនៃកិច្ចប្រជុំនេះ ផ្ដោតទៅលើវិសោធនកម្ម ច្បាប់ស្ដីពីបក្សនយោបាយដែលច្បាប់នេះត្រូវបានមើលឃើញថា ដាក់កំហិតទៅលើបក្សនយោបាយណាដែលប្រព្រឹត្តខុសនឹងច្បាប់របស់ប្រទេស ហើយឈានដល់ការរំលាយបក្សនោះទៀតផង បើវាជាកំហុសរបស់ថ្នាក់ដឹកនាំ។
ទោះយ៉ាងណាក៏ដោយ សមាជិកសភាមកពីគណបក្សប្រជាជនកម្ពុជាទាំង ៦៦រូបបានអនុម័តឱ្យច្បាប់នេះ ត្រូវបានយកទៅប្រើប្រាស់ដោយឆ្លងកាត់ការអនុម័តពីព្រឹទ្ធសភា និងការឡាយព្រះហស្ថលេខាដោយព្រះមហាក្សត្រ។
នៅក្នុងកិច្ចប្រជុំសភាព្រឹកមិញនេះ សម្ដេចនាយករដ្ឋមន្ដ្រីពុំបានឡើងថ្លែងដូចលើកមុននោះទេ។ ចំពោះច្បាប់នេះ ក៏ធ្វើឱ្យមានការភ្ញាក់ផ្អើលដល់សហគមន៍អន្ដរជាតិ និងអង្គការសិទ្ធិមនុស្សអន្ដរជាតិផងដែរ ដោយគេគិតថា ប៉ះពាល់ធ្ងន់ធ្ងរដល់លទ្ធិប្រជាធិបតេយ្យកម្ពុជា ៕