ភ្នំពេញ ៖ សមាជិករដ្ឋសភាទាំង ៦៦ រូបមកពីគណបក្សប្រជាជនកម្ពុជា នៅព្រឹកថ្ងៃទី ២០ កុម្ភៈ នេះបានបើកកិច្ចប្រជុំវិសាមញ្ញ អនុម័តលើសេចក្តីស្នើច្បាប់ស្តីពីគណបក្សនយោបាយ ដោយមានវត្តមានរបស់សម្ដេចនាយករដ្ឋមន្ត្រីខណៈ សមាជិករដ្ឋសភាបក្សប្រឆាំងមិនចូលរួមប្រជុំ ។
ការរៀបចំសំណើនេះ គឺបន្ទាប់ពីសម្តេច ហ៊ុន សែន បានបញ្ជាឱ្យសភាគណបក្សលោក កាលពីថ្ងៃទី៣១ ខែមករា ឱ្យធ្វើញត្តិទៅប្រធានរដ្ឋសភា ដើម្បីកែប្រែច្បាប់ ស្ដីពីគណបក្សនយោបាយ ដោយបញ្ជូលមាត្រាថ្មីមួយ ឬកឋាខ័ណ្ឌថ្មីដើម្បីដកសិទ្ធិអ្នកនយោបាយ ដែលសម្ដេចថាជាទណ្ឌិតមិនឱ្យធ្វើនយោបាយ ឬ ជាប្រធាន ឬ អនុប្រធាន។
កិច្ចប្រជុំពិសេសនេះ ក៏មានវត្តមានរបស់សម្ដេចនាយករដ្ឋមន្ត្រីផងដែរ។
កាលពីថ្ងៃម្សិលមិញគណបក្សសង្គ្រោះជាតិបានចេញសេចក្តីថ្លែងការណ៍មួយដោយបញ្ជាក់ថា សមាជិករបស់ខ្លួនទាំង ៥៥ រូបសម្រេចមិនចូលរួមប្រជុំលើសំណើសុំធ្វើវិសោធនកម្មលើច្បាប់ ស្តីពីគណបក្សនយោបាយនេះទេ ព្រោះសេចក្ដីព្រាងច្បាប់នេះ នឹងធ្វើអោយមានការបែកបាក់ឯកភាពជាតិធ្ងន់ធ្ងរ ហើយច្បាប់នេះក៏ធ្វើអោយគ្រោះថ្នាក់ដល់ដំណើរការណ៍ប្រជាធិបតេយ្យនៅកម្ពុជា និង ផ្ទុយពីឆន្ទៈរាស្ត្រ។
តែយ៉ាងណាអ្នកនាំពាក្យគណបក្សប្រជាជនកម្ពុជាថា បើទោះបីជាតំណាងរាស្ត្របក្សប្រឆាំងមិនចូលរួមក៏មិនប៉ះពាល់ដល់ដំណើរការពិនិត្យលើសេចក្តីស្នើច្បាប់ស្តីពី វិសោធនកម្មច្បាប់ស្តីពីគណបក្សនយោបាយនេះដែរ។
ច្បាប់ស្តីពីគណបក្សនយោបាយមាន ១១ ជំពូក និង ៤៥ មាត្រា។ មាត្រាចំនួន ២៧ នឹងត្រូវបានធ្វើវិសោធនកម្ម ហើយបន្ថែមពីនោះនឹងមានការបញ្ចូលមាត្រាចំនួនប្រាំបន្ថែមទៀត។
ប្រសិនបើច្បាប់នេះចូលជាធរមាន នោះលោក សម រង្ស៊ី នឹងក្លាយជាគោលដៅនៃការរារាំងមិនឲ្យធ្វើជាប្រធានគណបក្ស និងជាគោលដៅនៃហេតុ ផលនៃការរំលាយគណបក្សសង្គ្រោះជាតិដូចដែលមានចែងក្នុងមាត្រា ៣៨ថ្មី និងមាត្រា៤៥ថ្មី៕
