ភ្នំពេញ៖ ប្រមុខរាជរដ្ឋាភិបាលបញ្ជា ឲ្យប្រព័ន្ធផ្សព្វផ្សាយទាំងអស់ជួយផ្សាយជាប្រចាំ ព័ត៌មានអំពីគ្រឹះស្ថានមីក្រូហិរញ្ញវត្ថុដើម្បីចៀសវាងកុំឲ្យមានការយល់ច្រឡំថាគ្រឹះស្ថានទាំងនោះជាស្ថាប័នរដ្ឋ។ បទបញ្ជាធ្វើឡើងក្នុងកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រ ទី១៧ ខែកុម្ភៈនេះ។
សម្តេចនាយករដ្ឋមន្ត្រី ហ៊ុន សែន បានព្រមានបិទគ្រឹះស្ថានមីក្រូហិរញ្ញវត្ថុនៅក្នុងប្រទេស ប្រសិនបើគ្រឹះស្ថានមីក្រូហិរញ្ញវត្ថុណាមួយ មិនបិទបង្ហាញថា ខ្លួនជាគ្រឹះស្ថានឯកជននោះទេ។ ការព្រមានធ្វើឡើងក្នុងសម័យប្រជុំគណៈរដ្ឋមន្ត្រី ថ្ងៃទី១៧ កុម្ភៈ ឆ្នាំ២០១៧នេះ ខណៈដែលពលរដ្ឋជាច្រើនជំពាក់បំណុលគ្រឹះស្ថានមីក្រូហិរញ្ញវត្ថុ ហើយពលរដ្ឋភាគច្រើនតែងតែយល់ថាខ្លួនជំពាក់បំណុលរដ្ឋ។
នៅក្នុងកិច្ចប្រជុំនោះសម្ដេចបានបញ្ជា ទៅធនាគារជាតិថា ៖«ត្រូវតែសរសេរបិទភ្ជាប់នៅគ្រប់គ្រឹះស្ថានមីក្រូហិរញ្ញវត្ថុទាំងអស់» ថា គ្រឹះស្ថានទាំងនោះជាស្ថាបន័ឯកជន ហើយមិនមែនជាស្ថាប័នអង្គការឬជារបស់រដ្ឋឡើយ។ ម្យ៉ាងវិញទៀតសម្តេចបានបញ្ជាក់យ៉ាងម៉ឺងម៉ាត់ថា ប្រសិនបើគ្រឹះស្ថានមីក្រូហិរញ្ញវត្ថុទាំងនោះមិនព្រមធ្វើតាមទេ គ្រឹះស្ថានទាំងនោះ «នឹងត្រូវបិទទ្វារ»។
អ្នកនាំពាក្យទីស្ដីការគណៈរដ្ឋមន្ដ្រីលោក ផៃ ស៊ីផាន ដែលផ្ដល់បទសម្ភាសន៍ឲ្យវិទ្យុស្ដ្រីតាមខ្សែទូរស័ព្ទ បញ្ជាក់បន្ថែមថា ការដាក់បទបញ្ជារបស់សម្ដេច ហ៊ុន សែន ដូចនេះដោយសារតែកន្លងមកពលរដ្ឋតែង តែយល់ឃើញថា ខ្លួនជំពាក់លុយរដ្ឋ ពីព្រោះតែនៅពេលគ្រឹះស្ថានមីក្រូហិរញ្ញវត្ថុចុះកិច្ចសន្យាខ្ចីប្រាក់ តែងតែមានអាជ្ញាធរមូលដ្ឋានទៅចូលរួមធ្វើសាក្សី ដែលជាហេតុធ្វើឲ្យពលរដ្ឋភ័ន្ដច្រឡំថាខ្លួនត្រូវរដ្ឋរឹបអូសផ្ទះសម្បែង។ លោក ផៃ ស៊ីផាន បញ្ជាក់ថា ការណ៍នេះបង្កឱកាសឲ្យបក្សនយោបាយមួយចំនួនឃោសនាកេញចំណេញផ្នែកនយោបាយ។ «បាទវាអញ្ចឹងមែន (នឹងបិទមីក្រូហិរញ្ញវត្ថុមិនធ្វើតាមការណែនាំសម្ដេច ហ៊ុន សែន) ធនាគារកណ្ដាលរបស់កម្ពុជា ឬក្រសួងហិរញ្ញវត្ថុចាត់វិធានការ នៅក្នុងរឿងនេះដើម្បីឲ្យប្រជាពលរដ្ឋលោកយល់ថាពួកគាត់ខ្ចីលុយពីអ្នកណា? ហើយបើមិនធ្វើតាមវិធានការនេះទេ នឹងត្រូវបិទស្ថាប័ននោះ»។
ស្របពេលដែលសម្តេចស្នើឲ្យប្រព័ន្ធផ្សព្វផ្សាយទាំងអស់ «មិនថាជារបស់រដ្ឋឫឯកជន» ទេ គឺត្រូវផ្សាយជាប្រចាំ ព័ត៌មានអំពីគ្រឹះស្ថានមីក្រូហិរញ្ញវត្ថុទាំងអស់នៅក្នុងប្រទេសកម្ពុជា ហើយបញ្ជាក់ឲ្យច្បាស់ថាគ្រឹះស្ថានទាំងនោះមិនមែនជាស្ថាប័នរដ្ឋ។ ប្រមុខរាជរដ្ឋាភិបាលកម្ពុជា ក៏បានហាមប្រាមផងដែរដល់អាជ្ញាធរមូលដ្ឋានមិន ឲ្យបន្ដធ្វើសាក្សីនៅពេលពលរដ្ឋខ្ចីប្រាក់គ្រឹះស្ថានមីក្រូហិរញ្ញវត្ថុបន្ដទៀតឡើយ។ សម្តេច ហ៊ុន សែន បញ្ជាក់ថា ការធ្វើបែបនេះ «ដើម្បីជាការផ្ដល់តម្លាភាពជួនស្ថាប័នមីក្រូហិរញ្ញវត្ថុនិងប្រជាពលរដ្ឋដែលខ្ចីប្រាក់។»
ក្រៅតែពីការបញ្ជាឲ្យផ្សព្វផ្សាយតាមរយៈទូរទស្សន៍ វិទ្យុ ទាំងជាតិនិងឯកជនហើយសម្ដេច ហ៊ុន សែន ក៏ស្នើដល់គ្រប់ក្រុមហ៊ុនទូរស័ព្ទទាំងអស់ត្រូវចូលរួមផ្សព្វផ្សាយករណីនេះដល់ប្រជាពលរដ្ឋផងដែរ។ យោងតាមរបាយការណ៍របស់ធនាគារជាតិនៃកម្ពុជា គិតមកដល់ពេលបច្ចុប្បន្ននេះ គ្រឹះស្ថានមីក្រូហិ រញ្ញវត្ថុមានចំនួន៥៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើមានចំនួន០៧ ប្រតិបត្តិករមីក្រូហិរញ្ញវត្ថុចំនួន១០៤៕
