ភ្នំពេញ៖មិនអាចពន្យាពេលបានទេ ប៉ុន្តែអ្នកវិភាគ គឹម សុខ ត្រូវតែចូលបំភ្លឺតុលាការនៅថ្ងៃស្អែកដូចបានកំណត់។ នេះគឺជាការសម្រេចរបស់ព្រះរាជអាជ្ញារងសាលាដំបូងរាជធានីភ្នំពេញ។ បន្ថែមពីនោះអ្នកវិភាគរូបនេះទទួលបណ្តឹងមួយថ្មីថែមទៀតពីមេធាវីរបស់សម្តេ ហ៊ុន សែន។
សាលាដំបូងរាជធានីភ្នំពេញនៅថ្ងៃព្រហស្បតិ៍ ទី១៦ ខែកុម្ភៈនេះបានច្រានចោលសំណើសុំពន្យាពេលចូលបំភ្លឺរបស់ជាអ្នកវិភាគនយោបាយមិនសំចៃមាត់លោក គឹម សុខ។ ការច្រានចោលធ្វើឡើងភ្លាមក្រោយពី អ្នកឃ្លាំមើលការអភិវឌ្ឍសង្គមនិងជាអ្នកវិភាគនយោបាយរូបនេះបានចូលទៅកាន់តុលាការនៅថ្ងៃនេះដើម្បីដាក់លិខិតស្នើសុំការពន្យាពេលចូលបំភ្លឺដល់តុលាការ។ តាមគម្រោងតុលាការត្រូវសាកសួរឲ្យលោក គឹម សុខ បំភ្លឺនៅថ្ងៃសុក្រ ទី១៧ កុម្ភៈស្អែកនេះ។ ប៉ុន្តែលោក គឹម សុខ ដែលសម្តេចនាយករដ្ឋមន្ត្រី ហ៊ុន សែន បញ្ជាឲ្យក្រុមសមត្ថកិច្ចតាមឃ្លាំមើលដើម្បីកុំឲ្យរូបលោករត់គេចចេញក្រៅប្រទេសនោះ (លោកគឹម សុខ) បានស្នើសុំពន្យាពេលដោយសារលោកនៅមិនទាន់មានមេធាវីការពារក្តីនៅឡើយ។
លោក សៀង សុខ ព្រះរាជអាជ្ញារងសាលាដំបូងរាជធានីភ្នំពេញបានចារលើលិខិតសុំពន្យាពេលរបស់លោក គឹម សុខ បានច្រានចោលការស្នើសុំរបស់លោក គឹម សុខ។ លោកព្រះរាជអជ្ញាសរសេរយ៉ាងដូច្នេះថា ៖«យើងសៀង សុខ មិនអនុញ្ញាតលើការស្នើសុំនេះ។ សាមីខ្លួនត្រូវចូលមកកាន់អយ្យការតាមការកំណត់។»
លោក គឹម សុខ បានបង្ហាញការស្តោងស្តាយដែលអយ្យការបដិសេធការស្នើសុំរបស់លោក ដោយលោកហាក់ដូចជាស្ទាក់ស្ទើរក្នុងការចូលខ្លួននៅថ្ងៃស្អែកនេះ។ «ខ្ញុំកំពុងពិចារណាថា ទៅឬអត់ អាចទៅឬក៏អាចមិនទៅ តែខ្ញុំមិនរត់គេចឡើយ»។
មេធាវីសម្តេច ហ៊ុន សែន គឺ លោក គី តិច បានប្តឹងលោក គឹម សុខ ទាមទារសំណងជំងឺចិត្ត ៥០ម៉ឺនដុល្លារ ពីបទបរិហារកេរ្តិ៍ គណបក្សប្រជាជននៅពីក្រោយការសម្លាប់លោក កែម ឡី កាលពីថ្ងៃទី១០ ខែកក្កដា ឆ្នាំ២០១៦។ នៅថ្ងៃនេះដែរលោក គី តិច មេធាវីរបស់សម្តេច ហ៊ុន សែន បានប្តឹងលោក គឹម សុខ មួយករណីទៀត ទាក់ទងទៅនិងការអត្ថាធិប្បាយរបស់លោកថា ការគ្រប់គ្រងរដ្ឋាភិបាលបច្ចុប្បន្ន បណ្តោយឱ្យមានប្រព័ន្ធមួយ ដែលមានការសម្លាប់មនុស្សហើយរកមុខឃាតកមិនឃើញ។ ក្នុងបណ្តឹងនេះលោកមេធាវី គី តិច ទារសំណងជំងឺចិត្តចំនួន ១០លានរៀល។ មេធាវីរបស់សម្តេច បានអះអាងទៀតថា ការអត្ថាធិប្បាយរបស់លោក គឹម សុខ បានធ្វើឲ្យប៉ះពាល់ដល់កិត្ដិយសប្រមុខរដ្ឋាភិបាល៕
