ភ្នំពេញ៖លោក គី តិច មេធាវីតំណាងសម្ដេចនាយករដ្ឋមន្ត្រី នៅព្រឹកថ្ងៃព្រហស្បតិ៍នេះ បានដាក់ពាក្យ បណ្ដឹង លោក គឹម សុខ មួយករណីទៀត បន្ទាប់ពីលោក គឹម សុខ បាននិយាយថា ការគ្រប់គ្រងរដ្ឋាភិបាលបច្ចុប្បន្ន បណ្តោយឱ្យមានប្រព័ន្ធមួយ ដែលមានការសម្លាប់មនុស្សហើយ រកមុខឃាតកមិនឃើញ។
វិធានការនេះដែរ ក្រោយពីអ្នកវិភាគរូបនេះ បានផ្តល់បទសម្ភាសន៍ដល់វិទ្យុអាស៊ីសេរី កាលពីថ្ងៃទី១៣ ខែកុម្ភៈ ជុំវិញជំហររបស់លោក ពាក់ព័ន្ធនឹងបណ្តឹងរបស់សម្តេច ប្តឹងទាសំណងជំងឺចិត្ត ៥០ម៉ឺនដុល្លារ។
លោក គឹម សុខ អ្នកវិភាគនយោបាយមិនសំចៃមាត់ ត្រូវបានសម្តេច ហ៊ុន សែន ប្តឹងតុលាការឱ្យផ្តន្ទោទោសលោកតាមផ្លូវច្បាប់និងទាមទារប្រាក់សំណង ៥០ម៉ឺនដុល្លារ ដែលសម្ដេចចោទថា អ្នកវិភាគរូបនេះនិយាយថា គណបក្សប្រជាជននៅពីក្រោយការសម្លាប់លោក កែម ឡី កាលពីថ្ងៃទី១០ ខែកក្កដា ឆ្នាំ២០១៦។ តែយ៉ាងនេះក្ដីគេមិនដឹងថា សម្ដេចនាយករដ្ឋមន្ដ្រីបានទាមទារជំងឺចិត្ត ប៉ុន្មានម៉ឺន ដុល្លារទៀតទេ ៕
