ភ្នំពេញ៖រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង បានប្រកាសថា អ្នកដឹកនាំបាតុកម្មកម្មករដែលបិទផ្លូវសាធារណៈនឹងប្រឈមនឹងបណ្តឹងតាមផ្លូវច្បាប់។ ប៉ុន្តែក្រុមសហជីពកម្មករយល់ថា ការដាក់កំហិតបែបនេះមិនមែនជាដំណោះស្រាយសំរាប់ក្រុមកម្មករទេ។
អ្នកនាំដឹកនាំកម្មករឲ្យធ្វើបាតុកម្មតវ៉ាដោយបិទផ្លូវនឹងទទួលរងពាក្យបណ្តឹងទៅកាន់តុលាការ។ នេះគឺជាការព្រមានរបស់រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈនៅថ្ងៃពុធ ទី១៥ កុម្ភៈនេះ។ ការព្រ មានធ្វើឡើងក្រោយពីពិធីបើកសន្និបាទបូកសរុបការងារប្រចាំឆ្នាំ២០១៦ មួយថ្ងៃបន្ទាប់ពីមានបាតុកម្មបិទផ្លូវរបស់ក្រុមកម្មកររោងចក្រជុងហ្វៃប្រមាណជាង ១០០ នាក់ នៅសង្កាត់ចាក់អង្រែក្រោម ខណ្ឌ័មានជ័យ រាជធានីភ្នំពេញ។ បាតុកម្មដោយសារតែថៅកែរោងចក្រមិនបានបើកប្រាក់ខែឲ្យពួកគេដោយយកលេសថារោងចក្រក្ស័យធន។
លោក អ៊ិត សំហេង បានថ្លែងថាកម្មករនិយោជិតមានសិទ្ធិសេរីភាពពេញលេញ ក្នុងការតវ៉ាជាមួយថៅកែរោងចក្រនៅពេលដែលថៅកែនោះមិនគោរពតាមច្បាប់ស្តីពីសិទ្ធិការងាររបស់កម្មករ តែការតវ៉ានោះត្រូវគោរពតាមច្បាប់។ ផ្ទុយទៅវិញបើ អ្នកដែលដឹកនាំធ្វើបាតុកម្មរហូតដល់មានការបិទផ្លូវជាដើមត្រូវទទួលទោសតាមច្បាប់។ «រឿងបិទផ្លូវជាកំហុសព្រហ្មទណ្ឌអញ្ចឹងអ្នកដែលជាមេដឹកនាំបង្កើតនាំឱ្យមានរឿងបិទផ្លូវគឺត្រូវទទួលខុសត្រូវតាមក្រមព្រហ្មទណ្ឌខ្ញុំអំពាវនាវតទៅមុខទៀតបិទផ្លូវមិនមែនជាជម្រើសទេក្មួយៗកម្មករកម្មការិនីគឺត្រូវតែវចង្អុលបង្ហាញថាតើអ្នកណាញុះញុងក្មួយៗឱ្យបិទផ្លូវហើយក្រសួងនឹងមានរង្វាន់ជូនអ្នកណាដែលចង្អុរវប្រាប់ថាជនណាដែលនាំឱ្យមានការបិទផ្លូវ»។
ជាមួយគ្នានេះលោករដ្ឋមន្ត្រី អ៊ិត សំហេង ក៏បានស្នើឲ្យមានការវែកមុខអ្នកដែលដឹកនាំឲ្យមានការបិទផ្លូវក្នុងបាតុកម្មកម្មករកាលពីថ្ងៃអង្គារម្សិលមិញនេះដើម្បីចាប់ខ្លួនពួកគេយកមកផ្តន្ទាទោស។ ឆ្លើយតបនឹងការលើកទ្បើងនេះ ប្រធានសហព័ន្ធសហជីពចលនាកម្មករ លោក ប៉ាវ ស៊ីណា យល់ឃើញថា ក្រសួងការងារគួរតែពន្លឿនការដោះស្រាយសំណើរបស់កម្មករជាជាងចំណាយពេលតាមរកជនដែលនៅពីក្រោយដឹកនាំធ្វើបាតុកម្មបិទផ្លូវ។ ទោះបីជាយ៉ាងនេះក្តី លោក ប៉ាវ ស៊ីណា ថា លោកមិនគាំទ្រឱ្យកម្មករធ្វើបាតុកម្មបិទផ្លូវនោះទេព្រោះវា បង្ករឱ្យប៉ះពាល់ដល់សណ្តាប់ធ្នាប់សាធារណៈ។ «អ្វីដែលសំខាន់គឺមន្ត្រីដែលទទួលបន្ទុកនៅក្នុងការដោះស្រាយត្រូវពន្លឿនក្នុងការដោះស្រាយឱ្យបានឆាប់ដើម្បីឆ្លើយតបនូវអ្វីដែលជាតម្រូវការរបស់បងប្អូនកម្មករជាជាងការស្វែងរកអ្នកដែលបញ្ជាឬក៏សហជីពណាដែលនៅពីក្រោយខ្នងរឿងនេះអីខ្ញុំយល់ថាវាមិនចាំបាច់នោះទេបាទ»។
លោក អាត់ ធន់ ប្រធានសហភាពការងារកម្ពុជា លើកទ្បើងស្រដៀងគ្នានេះដែរថា កត្តាចំបាច់ដែលក្រសួងសាមីត្រូវដោះស្រាយជាបន្ទាន់នៅពេលនេះ គឺត្រូវស្វែងរកដំណោះស្រាយជូនកម្មករមិនមែនស្វែងរកជនដែលដឹកនាំធ្វើបាតុកម្មបិទផ្លូវនោះទេ។ លោកគូសបញ្ជាក់ទៀតថា មូលហេតុដែលនាំឱ្យកម្មករបាតុកម្មបិទផ្លូវដោយសារតែក្រសួងមិនពន្លឿនការដោះស្រាយជូនពួកគេ។ «វាជាការពិតការរំលោភកើតទ្បើង ការកេងប្រវ័ញ្ចកើតទ្បើងនឹងការបោកប្រាស់កើតទ្បើងគឺអត់មានអ្នកជួយដោះស្រាយគាត់ជាពិសេសអំទ្បុងពេលចុងក្រោយនេះថៅកែបិទរោងចក្រមួយទៅបើកមួយ កេងប្រវ័ញ្ចលុយកម្មករដល់អញ្ចឹងគាត់ម៉េចទ្រាំបានអត់ដោះស្រាយហ្នឹងស្រាយបានធ្វើឱ្យមានបញ្ហាហ្នឹង អញ្ចឹងក្រសួងត្រូវធ្វើរឿងហ្នឹងប្រសើរជាងចាត់វិធានការទៅលើកម្មករធ្វើ»។
សូមបញ្ជាក់ថា ក្នុងកិច្ចប្រជុំការងារប្រចាំឆ្នាំនេះក្រសួងការងារនឹងរៀបចំសេចក្តីព្រាងច្បាប់មួយស្តីពីប្រាក់ឈ្នួលអប្បរមារបស់កម្មករនិងសេចក្តីព្រាងច្បាប់ស្តីពីវិធីដោះស្រាយវិវាទ។ សេចក្តីព្រាងច្បាប់ទាំងពីរដែលរដ្ឋមន្ត្រីក្រសួងការងារអះអាងថា ធ្វើឡើងក្នុងគោលដៅកាត់បន្ថយបាតុភាពនិងការតវ៉ារបស់ក្រុមកម្មករ៕
