ភ្នំពេញ៖កាលពីដើមឡើយវត្តអារាមមិនត្រឹមតែជាកន្លែង អប់រំមនុស្ស និងផ្ដល់ផ្លូវចិត្ត ឲ្យមនុស្សដើរមកផ្លូវត្រូវនោះទេ តែវត្តក៏ជាសាលារៀនដែល ផ្តល់ចំណេះដឹងសម្រាប់កូនចៅខ្មែរប្រុសៗ ដែលបានចូលទៅបួសរៀនសំណាក់ក្រោមព្រះពុទ្ធសាសនា។
បច្ចុប្បន្នកម្ពុជាមានសាលារៀនជាច្រើន ប៉ុន្តែគេនៅតែឃើញវត្តអារាមនៅតែជាថ្នាលបណ្ដុះ បណ្ដាល សិស្ស តូចឬធំក្ដី ឱ្យមានចំណេះដឹងផងដែរ។
ជាមួយគ្នានេះវត្តនៅតែជាទីពឹងសម្រាប់កូនកសិករក្រីក្រមកពីស្រែចម្ការ។ អ្នកសិក្សារៀនសូត្រ ដែលមកតាមបណ្តាខេត្តមួយចំនួន ស្នាក់អាស្រ័យ ដើម្បីបានសិក្សារៀននៅតាមបណ្តាគ្រឹះស្ថានអប់រំផ្សេងៗក្នុងរាជធានីភ្នំពេញ។ ដោយសារហេតុនេះ វត្តអារាមនៅតែមានតួនាទី យ៉ាងសំខាន់ សម្រាប់ សិស្សានុសិស្ស ក្រីក្រ នាសម័យទំនើបនេះ៕
