ភ្នំពេញ ៖ជារៀងរាល់ឆ្នាំ គ្រាន់តែថៃ្ងរះភ្លាម គេសង្កេតឃើញនៅខាងមុខខ្លោងទ្វារចូលសាលារៀន ឬ ច្រលចូលសាកលវិទ្យាល័យមួយចំនួន នៅរាជធានីភ្នំពេញ មានដាក់លក់នូវវត្ថុអនុស្សាវរីយ ដូចជាតុក្កតា និង ផ្កាជាដើម។ ប៉ុន្ដែដោយឡែកឆ្នាំនេះ អត្ថន័យនៃថ្ងៃ Valentine ហាក់ដូចជា ត្រូវបានប្ដូរផ្លាស់អត្ថន័យ ។ តើនេះមកពីមូលហេតុអ្វី?
ជាបន្ដសូមអញ្ជើញស្ដាប់បទយកការណ៍ដែលរៀបចំឡើងដោយ កញ្ញា ជុំ ជោគជាតា ដូចតទៅ៖
ផ្កាកូលាប និងរបស់អនុស្សាវរីយ៍ ជារឿយៗគេតែងតែប្រទះឃើញ មានដាក់តាំងលក់នៅក្បែរសាលារៀន និងតាមបណ្ដាមហាវិថីមួយចំនួនក្នុងរាជធានីភ្នំពេញ ជាហូរហែ ។
ជាក់ស្ដែងនៅតាមបណ្ដោយផ្លូវមួយចំនួនក្នុងខណ្ឌ័ទួលគោក ដូចជា វិថី គឹម អ៊ីលស៊ុង ឬនៅតាមបណ្ដោយផ្លូវក្បែរមណ្ឌលពាណិជ្ជកម្មនិងលំនៅដ្ឋានធីខេ (TK) គេសង្កេតឃើញមានការតាំងដាក់លក់នូវវត្ថុអនុស្សាវរីយ៍ ដែលមានដូចជា ផ្កាកូលាបចំរុះពណ៌ និងរូបតុក្កតាតូចធំ ដែលច្រកក្នុងស្បោងផ្លាស្ទីកយ៉ាងស្អាត។
ប៉ុន្តែអ្វីដែលគួរឲ្យកត់សំគាល់នោះ គឺថា ទិវានៃក្តីស្រឡាញ់នៅក្នុងឆ្នាំនេះហាក់ដូចជាមិនដូចឆ្នាំមុនៗនោះទេ។ ផ្នត់គំនិតពលរដ្ឋកម្ពុជាហាក់ដូចជាមានការផ្លាស់ប្តូរ ឬមានការយល់ដឹងខ្ពស់ជាងមុន។
ថ្ងៃនេះទំនងជាមិនមែនជាថ្ងៃបុណ្យសង្សារដូចដែលពួកគេធ្លាប់យល់ច្រឡំដូចមុននោះទេ ប៉ុន្តែគឺជាថ្ងៃបុណ្យនៃក្តីស្រឡាញ់។
កញ្ញា ស្រី ដែន ជាអ្នកលក់ផ្កាមួយរូបនៅក្បែរផ្សារ ៧មករា ខណ្ឌ័ទួលគោក។ នាងកត់សំគាល់ថា អតិថិជនភាគច្រើន គឺជា មនុស្សវ័យកណ្តាល មិនមែនយុវវ័យច្រើនដូចប៉ុន្មានឆ្នាំមុននោះទេ។
ម្យ៉ាងវិញទៀតបើយោងតាមអ្នកលក់ផ្សារវ័យក្មេងរូបនេះ អតិថិជនដែលមកទិញផ្កាភាគច្រើនមិនមែនទិញជូនគូសង្សារនោះទេ ប៉ុន្តែពួកគេទិញជូនមិត្តភក្រ្តនិងសាច់ញាតិ។
កញ្ញា ស្រី ដែន ៖«ឆ្នាំនេះភាគច្រើនអ្នកដែលមកទិញ ចាស់ច្រើនជាងយុវវ័យ ព្រោះភាគច្រើនគាត់ទិញឱ្យមនុស្សជុំវិញខ្លួនរបស់ពួកគាត់ ដូចជាបងប្អូន ពូ មីង របស់គាត់ »។
នៅឆ្ងាយពីនេះបន្តិចកញ្ញា សុ ថានិច គឺជាអ្នកផ្កាផងនិងតុក្កតាផង។ អតិថិជនរបស់នាងមិនមែនមានតែមនុស្សវ័យកណ្តាលទេ។ ប៉ុន្តែមានទាំងជនបរទេសទៀតផង។
កញ្ញា សុ ថានិច ៖ « ភាគច្រើនគេទិញទៅជូនពួកម៉ាក ជូនម៉ាក់ប៉ា បើសង្សារមួយៗ អត់សូវមានប៉ុន្មានទេ»។
វាយជន្ទល់ម៉ូតូភ្លាម យុវជន ផាន់ ណាត បានដើរសំដៅទៅរកតុផ្កានិងតុក្កតា ដែលត្រូវបានវេចខ្ចប់រួចជាស្រេចនៅលើកំណាត់វិថីគឹម អ៊ីល ស៊ុង។
គាត់បានរើសយកផ្កាកូលាបមួយកញ្ចប់ដែលមានពណ៌ចំរុះក្រហម លឿង។
យុវជន ផាន់ ណាត៖ « ការទិញផ្កានេះ ចង់បញ្ជាក់ពីក្ដីស្រឡាញ់ ហើយនិងការដឹងគុណព្រោះគាត់ធ្លាប់បានទៅ »។
នៅលើវិថីនេះដែរ លោក រស្មី ចុះពីលើរថយន្តLexus ពណ៌ខ្មៅរលើបមួយគ្រឿងឆ្ពោះទៅកាន់កន្លែងលក់ផ្កាដែលមិនសូវសំបូរអតិថិជននោះទេ។
លោក រស្មី បានរើសដោយសំរិតសំរាំងដោយកែវភ្នែកសំឡឹងយកចិត្តទុកដាក់។ ទីបំផុត លោកបានសម្រេចចិត្តជ្រើសរើសយកផ្កាកូលាបព័ណ៌លឿង និងក្រហម ។ ហើយលោកបានស្នើឲ្យអ្នកលក់វេចខ្ចប់ភ្លាមៗហាក់ដូចជាប្រញាប់ប្រញាល់។
លោក រស្មី ៖ «និយាយទៅថ្ងៃនេះជាថ្ងៃនៃក្ដីស្រឡាញ់ គ្រាន់តែចង់បង្ហាញថា យើងជូនផ្កាឱ្យគាត់លក្ខណៈមិត្តរួមការងារ »។
ទិវានៃក្តីស្រឡាញ់ធ្វើឡើងរៀងរាល់ឆ្នាំនៅថ្ងៃទី ១៤ ខែកុម្ភៈ។ ថ្ងៃបុណ្យនេះ បានហូរចូលកម្ពុជានៅប៉ុន្មានឆ្នាំចុងក្រោយនេះ។ ថ្ងៃបុណ្យនេះ បានទាក់ទាញយុវជនកម្ពុជាយ៉ាងខ្លាំងក្រោមការយល់ច្រឡំថា គឺជា ថ្ងៃបុណ្យសង្សារ។ ហើយពេលខ្លះបង្កឱ្យយុវជនមានការប៉ះទង្គិចគ្នាទៀតផង នៅពេលដែលពួកគេជូនផ្កា ឬ វត្ថុអនុស្សាវរីយជាន់ដៃគូគ្នា។ បន្ថែមលើនេះ Valentine day ១៤ កុម្ភៈ បានទាញ់ទារឱ្យយុវតីភ្លេចគេចពីសេចក្ដីថ្លៃថ្នូររបស់ខ្លួន ជាស្ត្រីតំណាងឱ្យភាពស្អាតស្អំ តំណាងឱ្យគ្រួសារ និងសង្គមខ្មែរដោយសម្រេចចាប់ដៃគូ ឬដើរខុសពីទំនៀមទម្លាប់ ដោយភ្លេចពីអ្វីជាភាពបរិសុទ្ធរបស់ស្ត្រី។
ដោយឡែកក្នុងទិដ្ឋភាពថ្ងៃបុណ្យនៃក្តីស្រឡាញ់ឆ្នាំនេះ ហាក់ដូចជាមានការផ្លាស់ប្តូរការយល់ដឹងរបស់ក្រុមយុវជនយ៉ាងច្រើន។យុវជនពិសិដ្ឋ គឺជាសក្សីនៃការផ្លាស់ប្តូរនេះ។ លោកទិញផ្ការមួយបាច់ជូនឱពុកម្តាយរបស់លោកនៅថ្ងៃបុណ្យនៃក្តីស្រឡាញ់នេះ
យុវជនពិសិដ្ឋ ៖«យើងទិញផ្កាជូននេះ ជាលក្ខណៈ ថា បន្ទាប់បន្សំទេ ប៉ុន្ដែនៅពេលដែលយើងចង់ឱ្យគាត់សប្បាយចិត្ត ឬចង់បង្ហាញពីក្ដីស្រឡាញ់ គឺ យើងត្រូវខំប្រឹងរៀនខ្លួនឯង ហើយយើងជួយគាត់ កុំអោយពិបាកចិត្ត »៕
