ក្រុមប្រឹក្សាសន្ដិសុខអង្គការសហប្រជាជាតិកាលពីថ្ងៃចន្ទ ទី១៣ កុម្ភៈ បានថ្កោលទោសយ៉ាងខ្លាំងក្លាទៅលើកូរ៉េខាងជើងដែលបានបាញ់សាកល្បងកាំជ្រួចរំលងទ្វីបជាថ្មីម្ដងទៀតធ្វើឲ្យពិភពលោកមានការព្រួយបារម្ភយ៉ាងខ្លាំង។
របបក្រុងព្យុងយ៉ាងដែលជាសម្ព័ន្ធមិត្ដរបស់មហាអំណាចចិនបានបាញ់សាកល្បងជាថ្មីទៀតកាំជ្រួចរំលងទ្វីបកាលពីថ្ងៃអាទិត្យ ចុងសប្ដាហ៍នេះដោយគ្រាប់កាំជ្រួចនោះបានរត់ប្រហែល ៥០០គីឡូម៉ែត្រទើបធ្លាក់ចូលក្នុងសមុទ្រជប៉ុន។
ខណៈដែលក្រុមប្រឹក្សាសន្ដិសុខថ្កោលទោសយ៉ាងខ្លាំងនេះលោក ដូណាល់ត្រាំ ប្រធានាធិបតីអាមេរិកបានប្ដេជ្ញាថា នឹងឆ្លើយតបយ៉ាងខ្លាំងចំពោះក្រុងព្យុងយ៉ាងនៅពេលណាមួយដោយចាត់ទុកថា ការបាញ់កាំជ្រួចដ៏គ្រោះថ្នាក់នេះគឺជាការបង្ករឿងជាថ្មីទៀត។ ប្រទេសដែលដាក់សម្ពាធឲ្យក្រុមប្រឹក្សាសន្ដិ សុខអង្គការសហប្រជាជាតិថ្កោលទោសយ៉ាងខ្លាំងនោះគឺផ្ដើមដោយប្រទេស ជប៉ុន អាមេរិក និងកូរ៉េខាងត្បូង។ ប្រទេសសម្ព័ន្ធមិត្ដទាំងបីនេះបានសន្យារួមគ្នាថា នឹងមិនអត់ឱនឲ្យក្រុងព្យុងយ៉ាងដាច់ខាតប្រសិនបើសង្គ្រាមកើតឡើងលើឧបទ្ធីបកូរ៉េ៕ប្រភព:CNA
