ភ្នំពេញ៖មជ្ឈមណ្ឌលជាតិផ្តល់ឈាមនៃក្រសួងសុខាភិបាល អំពាវនាវឲ្យយុវជនជួយផ្តល់ឈាមដែលគេហៅថា ផ្តល់ឈាមផ្ដល់ក្តីស្រឡាញ់នៅថ្ងៃទី១៤ កុម្ភៈ ចំថ្ងៃទិវានៃក្តីស្រឡាញ់គឺជាព្រឹត្តិ ការណ៍ពេញនិយមរបស់យុវវ័យនាសម័យនេះ។
ការប្រកាសជាសាធារណៈនេះ ធ្វើឡើងនៅក្នុងសន្និសីទសារព័ត៌មាននៅមជ្ឈមណ្ឌលជាតិផ្តល់ឈាម កាលពីព្រឹកថ្ងៃទី១០ ខែកុម្ភៈ។ តាមប្រធានមជ្ឈមណ្ឌលជាតិផ្តល់ឈាមលោកវេជ្ជបណ្ឌិត ហុក គីមចេង បញ្ហាប្រឈមបច្ចុប្បន្នរបស់មជ្ឈមណ្ឌលជាតិផ្តល់ឈាម គឺចំនួននៃអ្នកស្ម័គ្រចិត្តបរិច្ចាគឈាមនៅទាបនៅឡើយ គឺប្រមាណជា ៣០ភាគរយនៃតម្រូវការនៃការប្រើប្រាស់ប៉ុណ្ណោះ។ ដូច្នេះគ្រួសារនៃអ្នកជំងឺត្រូវទទួលបន្ទុកក្នុងការចូលរួមបរិច្ចាគឈាម ដើម្បីសង្គ្រោះជីវិតអ្នកជំងឺ។ លោកបន្តថា យុទ្ធនាការនេះធ្វើឡើងក្នុងគោលបំណងអប់រំផ្សព្វផ្សាយពីការបរិច្ចាគឈាមក្នុងស្រទាប់យុវវ័យក្នុងគោលបំណងទទួលយកអំណោយឈាមពីសាធារណជនដោយការស្ម័គ្រចិត្ត។
វេជ្ជបណ្ឌិត ហុក គីមចេង បានឱ្យដឹងថា តម្រូវការនៃការប្រើប្រាស់ឈាមក្នុងឆ្នាំ២០១៧ អាចនឹងមានការកើនឡើងជាង ២០ភាគរយ បើប្រៀបធៀបនឹងតម្រូវការនៅក្នុងឆ្នាំ២០១៦។ ក្នុងឆ្នាំ២០១៦ មជ្ឈមណ្ឌលជាតិផ្តល់ឈាមនៃក្រសួងសុខាភិបាលទទួលបានឈាមប្រហែល ៦ម៉ឺន ៣ពាន់ប្លោក ដោយត្រូវបានប្រើប្រាស់ជាមធ្យមឈាម ១៥០ប្លោក ជារៀងរាល់ថ្ងៃ។ នៅមន្ទីរពេទ្យរុស្ស៊ី គឺកន្លែងទទួលការបរិចាកឈាម សម្រាប់នៅរាជធានីភ្នំពេញ៕
