ភ្នំពេញ៖នៅថ្ងៃទី១០ ខែកុម្ភៈនេះ សម្តេចនាយករដ្ឋមន្ត្រី ហ៊ុន សែន បានបន្តចុះមូលដ្ឋានសួរសុខប្រជាជននៅតាមខេត្តក្រុងបន្ទាប់ពីផ្អាកអស់មួយរយៈ។ ក្នុងជំនួបជាមួយមន្ត្រីរាជការ និងសិស្សា នុសិស្សនៅខេត្តព្រៃវែងនៅថ្ងៃនេះ សម្តេច ហ៊ុន សែន បានព្រមាន។
«កុំដូរខ្ញុំណា តិចទៅដូរអាចាស់ឱ្យវាទំនើប តែមិនប្រាកដថាគេរក្សាសន្តិភាព បានសម្រាប់អ្នកគ្រូឯងនៅឈរបង្រៀនកូនសិស្សទេ»។ សម្តេចនាយករដ្ឋមន្ត្រីហ៊ុន សែន បានព្រមានសារជាថ្មីម្តងទៀតនៅថ្ងៃសុក្រទី១០ ខែកុម្ភៈ នេះកុំឲ្យមានការបោះឆ្នោតផ្លាស់ប្តូររូបលោកចេញពីអំណាច ខណៈដែលការបោះឆ្នោតជ្រើសរើសក្រុមប្រឹក្សាឃុំសង្កាត់កាន់តែខិតជិតចូលមកដល់។ ការបោះឆ្នោតមូលដ្ឋាននេះនឹងប្រព្រឹត្តិទៅថ្ងៃទី៤ ខែមិថុនា ឆ្នាំ២០១៧នេះ។
សម្តេចនាយករដ្ឋមន្ត្រីថ្លែងព្រមានដូច្នេះ ក្នុងឱកាសដែលសម្តេច កំពុងជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្សនៅក្នុងខេត្តព្រៃវែង។ សម្តេច ហ៊ុន សែន បានលើកឡើងថា ការសម្រេចចិត្តជ្រើសរើសអ្នកដឹកនាំផ្សេងពីរូបលោកអាចនឹងផ្តល់ឱកាសឲ្យមានការក្រឡាប់ចក្រដូចរបបខ្មែរក្រហម។ «ប្រយ័ត្នតែបោះឱ្យរួចដូចជំនាន់អាពតទៀត។»
ដោយបរិយាយមិនចំពេកសម្តេច ហ៊ុន សែន បានក្រើនរំលឹកដោយប្រយោលកុំឲ្យប្រជាពលរដ្ឋបំភ្លេចអតីតកាល។ អតីតកាលដែលទំនងជាសម្តេចមានប្រសាសន៍សំដៅដល់ថ្ងៃ៧ មករា ដែលជាថ្ងៃប្រវតិ្តសាស្ដ្រនៃការរំដោះប្រទេសឲ្យរួចពីរបបកាប់សម្លាប់របស់ពួកខ្មែរក្រហម។
លោកស្រី មូ សុខហួរ តំណាងរាស្ត្រមកពីគណបក្សសង្គ្រោះជាតិ មានប្រសាសន៍ថា ការលើកឡើង របស់សម្តេចនាយករដ្ឋមន្ត្រី ហ៊ុន សែន ជា «ភាសាគម្រាមកំហែងទៅលើអ្នកបោះឆ្នោត»។ «ភាសាដែលសម្តេចគាត់លើកមកនេះ ហើយនឹងស្ថានការណ៍នេះ គឺស្ថានការណ៍ និងភាសាអ្នកចាញ់ ដូច្នេះអ្នកដែលហ៊ានទៅប្រកួតក្នុងបរិបទអ្នកប្រជាធិបតេយ្យ គេនិយាយលើកទឹកចិត្តអ្នកប្រកួតទាំងអស់គ្នា អ្នកឈ្នះដោយមានកិត្តិយស អ្នកចាញ់ដោយអស់ចិត្ត ហើយបើសិនជាសម្តេចនាយលើកពីចំបាំង ប៉ុលពតមកវិញ តើអ្នកណាអ្នកនាំមក»។
ដោយឡែកលោក សម គន្ទាមី នាយកប្រតិបត្តិអង្គការនិកហ្វិចដែលជាអង្គការឃ្លាំមើលការបោះឆ្នោតមួយនៅកម្ពុជា ក៏យល់ដូចគ្នានេះដែរថាសម្តេចនាយករដ្ឋមន្ត្រី ហ៊ុន សែន បានប្រើសារបំភិតបំភ័យផ្នែកនយោបាយ។
លោកបន្តថា ម្ចាស់ឆ្នោតគួរតែមើលព័ត៌មានឱ្យបានច្រើន ហើយពិចារណាឱ្យច្បាស់ និងមើលពីស្ថានការណ៍សង្គមបច្ចុប្បន្ន ហើយនាំគ្នាទៅបោះឆ្នោតនាពេលខាងមុខឱ្យបានគ្រប់គ្នា។ «ជាសារមួយខ្ញុំគិតថា មិនស្របទៅតាមស្ថានភាពបច្ចុប្បន្នទេ តែធ្វើមិចយើងលើកទឹកចិត្តអ្នកបោះឆ្នោតហ្នឹងកុំឱ្យមាន ការបារម្ភអីទាំងអស់ ឱ្យគាត់ទៅចូលរួមបោះឆ្នោតឱ្យបានគ្រប់គ្នា គាត់លឺប្រសាសន៍របស់សម្តេចអញ្ចឹង គាត់អាចរារែកចិត្ត គាត់បារម្ភ»។
នេះមិនមែនជាលើកទីមួយឡើយ ដែលសម្តេចនាយករដ្ឋមន្ត្រី តែងលើកឡើងពីការកើតសង្គ្រាមជាយថាហេតុ ប្រសិនបើគណបក្សប្រជាជនកម្ពុជារបស់លោកចាញ់ឆ្នោតឆ្នោតនោះ៕
