ភ្នំពេញ ៖ រាជរដ្ឋាភិបាលកម្ពុជាបានសុំសើរើកិច្ចព្រមព្រៀងមួយ ជាមួយសហរដ្ឋអាមេរិក ពាក់ព័ន្ធនឹងការចាប់បញ្ជូនពលរដ្ឋខ្មែរ ល្មើសច្បាប់ឱ្យត្រឡប់មកកម្ពុជាវិញ។ យ៉ាងណាអ្នកនាំពាក្យស្ថានទូតអាមេរិកប្រចាំនៅកម្ពុជាតបថា ការស្នើនេះកំពុងស្ថិតនៅក្នុងការពិភាក្សា តែសហរដ្ឋអា មេរិកនៅបន្តសហប្រតិបត្តិធ្វើមាតុភូមិនិវត្តន៍នេះជាមួយកម្ពុជា។
លោកជេ រ៉ាមេន បានប្រាប់វិទ្យុស្ត្រីតាមសារអេឡិចត្រូនិច ឬអ៊ីម៉ែលនៅថ្ងៃសុក្រទី១០ខែកុម្ភៈនេះថា៖«រដ្ឋាភិបាលកម្ពុជា បានជូនដំណឹងមកកាន់ស្ថានទូតអាមេរិករឿងនេះ ដើម្បីធ្វើការចរចាឱ្យ មានអនុសារណ យោគយល់គ្នាមួយ ផ្តោតទៅលើកម្មវិធីធ្វើមាតុភូមិនិវត្តន៍របស់ពលរដ្ឋកម្ពុជាដែលជាប់ចោទពីបទឧក្រិដ្ឋនៅសហរដ្ឋអាមេរិក។»
ក៏ប៉ុន្តែមន្ត្រីអ្នកនាំពាក្យដដែលមិនបានលំអិតព័ត៌មានថា រដ្ឋាភិបាលកម្ពុជាបានបញ្ជូនសំណើរនោះនៅពេលណានោះទេ។
អ្នកនាំពាក្យក្រសួងមហាផ្ទៃលោកនាយឧត្តមសេនីយ៍ ខៀវ សុភគ័ មិនអាចទាក់ទងបានទេនៅថ្ងៃនេះ។ ក៏ប៉ុន្តែលោកត្រូវស្រង់សំដីដោយសារព័ត៌ មាន Fresh News ថា៖«កម្ពុជាចង់បាននៅក្នុងកិច្ចព្រមព្រៀងថ្មីនោះ គឺស្នើឱ្យអាមេរិកធ្វើការចាប់បញ្ជូនពលរដ្ឋខ្មែរដែលប្រព្រឹត្តល្មើស ឱ្យឈរលើគោលការណ៍ស្ម័គ្រចិត្តមិនមានការបង្ខិតបង្ខំ។»
លោក ខៀវ សុភ័គ បានលើកឡើងថា៖«កន្លងមកសហរដ្ឋអាមេរិកបានចាប់ពលរដ្ឋខ្មែរ ដែលមានរឿងរ៉ាវបន្តិចបន្តួចឱ្យត្រឡប់មកកម្ពុជាវិញ ដោយការបង្ខិតបង្ខំ ធ្វើឱ្យពួកគេមិនសប្បាយចិត្ត បែកពីប្រពន្ធកូន។»
រាជរដ្ឋាភិបាលកម្ពុជា និងរដ្ឋាភិបាលអាមេរិក បានចុះកិច្ចព្រមព្រៀងបញ្ជូន និងទទួលយកពលរដ្ឋខ្មែរ កាលពីឆ្នាំ ២០០២។ យោងតាមកិច្ចព្រម ព្រៀងនេះ រដ្ឋាភិបាលសហរដ្ឋអាមេរិក នឹងបញ្ជូនពលរដ្ឋខ្មែរណាដែលប្រព្រឹត្តល្មើស ឱ្យត្រឡប់មកមាតុភូមិវិញ។
អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាលោកលោក ជេ រ៉ាមេន(Jay Raman) បញ្ជាក់បន្ថែមថា៖«សហរដ្ឋអាមរិកជឿថា ប្រទេសនិមួយៗ មានភារកិច្ចអនុវត្តបច្បាប់អន្តរជាតិ ដើម្បីទទួលយកជនជាតិ របស់ខ្លួនមកកាន់ប្រទេសកំណើតវិញ ព្រោះពួកគេពុំមានសិទ្ធិបន្តរស់នៅសហរដ្ឋអាមរិក និងប្រទេស ផ្សេងទៀតឡើយ។ សហរដ្ឋអាមរិកបាន សហប្រតិបត្តិការរឿងនេះ ជាមួយរដ្ឋាភិបាល ប្រទេស ជាច្រើន ហើយ ហើយប្រទេសទាំងនោះបានសម្រេចទទួលយកពលរដ្ឋពួកគេវិញ។»
រហូតដល់ពេលនេះ សហរដ្ឋអាមេរិក បានបញ្ជូនពលរដ្ឋខ្មែរដែលត្រូវចោទប្រកាន់ថាបានប្រព្រឹត្តិខុសច្បាប់នៅសហរដ្ឋអាមេរិចំនួនជាង៥០០នាក់ហើយ ឱ្យត្រឡប់មកប្រទេសកម្ពុជា ចាប់តាំងពីឆ្នាំ២០០២មក៕
