ភ្នំពេញ៖ លោក សម រង្ស៊ី ប្រធានគណបក្សសង្គ្រោះជាតិដែលត្រូវបានរដ្ឋាភិបាលកម្ពុជាឃាឃាំងមិនឲ្យចូលប្រទេសវិញ បានបង្ហើបព័ត៌មានឲ្យដឹងថា លោកនឹងប្ដឹងសម្ដេច ហ៊ុន សែន សម្ដេច ហេង សំរិន ទៅតុលាការព្រហ្មទណ្ឌអន្ដរជាតិ ICC នៅពេលដ៏ឆាប់ខាងមុខនេះ ករណីការស្លាប់មនុស្សក្នុងសម័យ ក៥។
លោក សម រង្ស៊ី បានបង្ហោះលើគេហទំព័ររបស់លោកថា អ្នកដែលទទួលខុសត្រូវគឺសម្ដេចនាយករដ្ឋមន្ដ្រី ហ៊ុន សែន សម្ដេច ហេង សំរិន និងមួយផ្នែកទៀតលោកថា ជាយុទ្ធសាស្ដ្ររបស់វៀតណាម។ បើលោក សម រង្ស៊ី សម្រេច ប្ដឹងរឿងនេះ ទៅតុលាការព្រហ្មទណ្ឌអន្ដរជាតិមែន គឺជារឿងភ្ញាក់ផ្ញើលមួយទៀត នៅលើឆាកអន្តរជាតិ ដែលមេដឹកនាំកម្ពុជាមានឈ្មោះមិនល្អ។ ប៉ុន្តែជាចំណោទមួយដែល ត្រូវចោទសួរថាតើនេះជាការបន្ថែមបន្ទុកលើខ្លួនឯង ឬក៏ជាការស្វែងរកតុល្យភាពដើម្បីចរចាឲ្យមានដំណោះស្រាយឆាប់បំផុត។
លោក គឹម សុខ អ្នកវិញភាគបញ្ហាសង្គម ដែលបានផ្ដល់បទសម្ភាសន៍ខ្លីមួយឲ្យវិទ្យុស្ដ្រី លោកមើល ឃើញថា បើមេបក្សប្រឆាំងប្ដឹងគឺជារឿងមួយធ្វើឲ្យមានឥទ្ធិពលខ្លះដែរ ហើយ ចង់មិនចង់ អន្តរជាតិកាន់តែមានលេសគាបបក្សកាន់អំណាចឲ្យទទួលយកការចរចាជាមួយបក្សប្រឆាំងឡើងវិញ ទោះជាកន្លងមកតុលាការអន្តរជាតិនេះ មិនងាយចាត់ការក៏ដោយ។
ក្នុងពេលជាមួយគ្នានេះវិទ្យុស្ដ្រីក៏ទទួលបានការផ្ដល់បទសម្ភាសន៍ខ្លីមួយផងដែរជាមួយលោក សុខ ឥសាន្ដ អ្នកនាំពាក្យគណបក្សប្រជាជនកម្ពុជា។ អ្នកនាំពាក្យរូបនេះបានបញ្ជាក់ថា លោក សម រង្ស៊ី ជាមនុស្សទាល់ច្រកមែនទែនហើយ ដែលលោក ចាត់ការប្ដឹងមេដឹកនាំឯងដូចនេះ។ លោកថា អន្ដរជាតិ គេមិនចាប់អាម្មរណ៍រឿងនេះទេ ហើយបណ្ដឹងនេះក៏គ្មានតុល្យភាពដើម្បីជះឥទ្ធិពលលើសម្ដេច ហ៊ុន សែន ដែរ។ លោកបានបញ្ជាក់ថា គ្មានអន្តរជាតិណា គេលូកដៃចូលកិច្ចការផ្ទៃក្នុងប្រទេសមួយ ដែលមានអធិបតេយ្យពេញលេញនោះទេ។
យ៉ាងណាក៏ដោយសម្ដេចនាយករដ្ឋមន្ដ្រី ហ៊ុន សែន បានរងបណ្ដឹងនៅក្រៅប្រទេសជាច្រើនបណ្ដឹងដែរ ហើយបណ្ដឹងភាគច្រើនប្ដឹងទៅតុលាការព្រហ្មទណ្ឌអន្ដរជាតិនេះ ប្ដឹងដោយមេធាវីអន្ដរជាតិករណីរំលោភសិទ្ធិមនុស្ស ការបណ្ដេញពលរដ្ឋពីលំនៅដ្ឋាន។ ករណីប្ដឹងផ្ដល់គ្នានេះត្រូវបានអ្នកវិភាគមើល ឃើញថា មិនមានផលប្រយោជន៍អ្វីសម្រាប់ជាតិទេ ហើយយកល្អគួរចាប់ដៃគ្នាចរចាដើម្បីរកដំណោះ ស្រាយជូនជាតិ៕
