ភ្នំពេញ៖ទីភ្នាក់ងារសហរដ្ឋអាមេរិកសំរាប់ការអភិវឌ្ឍអន្តរជាតិបានផ្តល់គម្រោងអភិវឌ្ឍន៍ឃុំក្នុងខេត្តចំនួនប្រាំមួយ។គម្រោងនេះមានរយៈពេលបីឆ្នាំ ហើយវានឹងជួយពង្រឹងដល់ការចូលរួមពីប្រជាពលរដ្ឋក្នុងកិច្ចអភិវឌ្ឍន៍តាមតំបន់របស់ពួកគេ។
រដ្ឋាភិបាល សង្គមស៊ីវិលជាតិនិងអន្តរជាតិបានបើកសម្ភោធគម្រោង «ឃុំបើកទូលាយរបស់ខ្ញុំ» នៅថ្ងៃពុធទី៨ ខែកុម្ភៈនេះ។ គម្រោងនេះត្រូវបង្កើតឡើងដើម្បីជួយជំរុញការពង្រឹងកិច្ចអវឌ្ឍន៍និងអភិបាលកិច្ចឲ្យកាន់តែប្រសើរឡើងក្នុងរដ្ឋបាលមូលដ្ឋាន។ ជាពិសេស គម្រោងនេះនឹងបង្កើនសម្លេងប្រជាពលរដ្ឋដើម្បស្នើសុំអន្តរាគមន៍ពីរាជរដ្ឋាភិបាល បង្កើនការឆ្លើយតបរបស់រដ្ឋាភិបាលចំពោះការស្នើសុំពីប្រជាពល រដ្ឋ និងបង្កើនការគាំទ្រពីសង្គមស៊ីវិលលើជំនួយដល់រដ្ឋបាលថ្នាក់ក្រោមនេះ។
លោកស្រី ប្រាក់ សុខានី នាយិកាអង្គការភាពជាដៃគូសង្គមស៊ីវិលកម្ពុជា និងអង្គការគ្រប់គ្រងគម្រោង «ឃុំបើកទូលាយរបស់ខ្ញុំ»។ លោកស្រី មានប្រសាសន៍ថា គម្រោងមួយនេះពិតជាមានសារៈសំខាន់ណាស់ក្នុងការចួលរួមពីបណ្តាអង្គការសង្គមស៊ីវិល ដើម្បីធ្វើយ៉ាងណាជួយដល់ប្រជាពលរដ្ឋតាមរយៈការសម្តែងឆន្ទៈនៅក្នុងសិក្ខាសាលាស្តីពីកង្វល់របស់ខ្លួននៅតាមមូលដ្ឋានរៀងៗខ្លួន។ «ក្នុងគោលបំ ណងសំខាន់គឺសំដៅលើកកម្ពស់ ការប្រមូលមតិរបស់ប្រជាពលរដ្ឋជាពិសេសប្រជាពលរដ្ឋដែលងាយរងគ្រោះដើម្បីស្នើទ្បើងទៅស្ថាប័នពាក់ព័ន្ធឱ្យជួយដោះស្រាយនូវកង្វល់ផ្សេងៗដែលកើតមានទ្បើងនៅក្នុងសហគមន៍ និងការចូលរួមរបស់ពួកគាត់ជាអទិភាពសម្រាប់ការអភិវឌ្ឍន៍នានាតាមមូលដ្ឋាន»។ គម្រោង «ឃុំបើកទូលាយរបស់ខ្ញុំ» ផ្តល់មូលនិធិដោយភ្នាក់ងារសហរដ្ឋអាមេរិកសំរាប់ការអភិវឌ្ឍអន្តរ ជាតិ(USAID) ចំនួនប្រមាណ៣៨ម៉ឺនដុល្លារអាមេរិក។
គម្រោងនេះមានរយៈពេល៣ឆ្នាំ ដោយចាប់ផ្តើមពីខែវិច្ឆិកា ឆ្នាំ២០១៦ ដល់ខែ តុលា ឆ្នាំ២០១៨ ហើយ នឹងត្រូវអនុវត្តន៍ក្នុងខេត្តចំនួន៦ ដែលរួមមានឃុំចំនួន ១៨០។ ខេត្តទាំងនោះមានដូចជា ខេត្ត កំពង់ឆ្នាំង បាត់ដំបង បន្ទាយមានជ័យ សៀមរាប កំពង់ធំ និងកំពង់ចាម។
លោកស្រី Polly Dunford តំណាងUSAID ប្រចាំក្រុងភ្នំពេញ មានប្រសាសន៍តាមរយៈអ្នកបកប្រែថាគម្រោងនេះនឹងផ្តល់ចំណេះដឹងបន្ថែមដល់ពលរដ្ឋនៅតាមមូលដ្ឋាន។ «គម្រោងឃុំបើកទូលាយនេះនេះនឹងអនុញ្ញាតិឲ្យពលរដ្ឋបង្ហាញគំនិតរបស់ខ្លួននិងការតស៊ូមតិឲ្យមានការកែទម្រង់ពីមន្ត្រីជាប់ឆ្នោតក៏ដូចជាការផ្លាស់ប្តូរយោបល់គ្នាប្រកបដោយការស្ថាបនារវាងពលរដ្ឋនិងរដ្ឋាភិបាល»។
ដោយឡែកលោក សក់ សេដ្ឋា រដ្ឋលេខាធិការក្រសួងមហាផ្ទៃ បានរំពឹងទុកជាលក្ខណៈវិជ្ជមានអំពីការចូលរួមរបស់អង្គការសង្គមស៊ីវិលក្នុងការអនុវត្តគម្រោង «ឃុំបើកទូលាយរបស់ខ្ញុំ»៕
