ក្រសួងអប់រំ យុវជន និងកីឡា នឹងដាក់ឲ្យដំណើរការប្រព័ន្ធពង្រឹងសមត្ថភាព និងតេស្តសមត្ថភាពដោយខ្លួនឯងសម្រាប់សិស្សថ្នាក់ទី១២ លើប្រព័ន្ធអ៊ីនធើណែត។
ផែនការនេះបើកឱកាសឲ្យ ឲ្យសិស្សានុសិស្សថ្នាក់ទី១២ អាចសិក្សានៅក្រៅម៉ោង សិក្សាក្នុងថ្នាក់ ដើម្បីឆ្លើយសំណួរ ឬធ្វើលំហាត់ទៅលើមុខវិទ្យាផ្សេងៗ មានគណិតវិទ្យា រូបវិទ្យា គីមីវិទ្យា ជីវវិទ្យា និង ប្រវត្តិវិទ្យា តាមប្រព័ន្ធអនឡាញ (On-line) ។
នេះបើកយោងតាម ការចុះផ្សាយលើទំព័រហ្វេសប៊ុករបស់ក្រសួងអប់រំដែលបានចុះកាលពីថ្ងៃទី ៨ កុម្ភៈ ឆ្នាំ ២០១៧។
តាមសេចក្ដីជូនដំណឹងនេះសិស្សា នុសិស្ស អាចសិក្សាបានដោយ ប្រើប្រាស់ ទូរស័ព្ទស្មាតហ្វូន Tablet ឬកុំព្យូទ័រ ។ ប្រពន្ធ័នេះមានឈ្មោះថា ប្រព័ន្ធសិក្សាពីចម្ងាយ (E-Learning Management System) ។
ប្រព័ន្ធនេះនឹងជួយពង្រឹងសមត្ថភាពរបស់សិស្សានុសិស្ស មួយកម្រិតថែមទៀត លើចំណេះដឹងដែលទទួលបានពីលោកគ្រូ អ្នកគ្រូនៅក្នុងថ្នាក់រៀន។
ក្រសួងអប់រំ យុវជន និងកីឡា នឹងប្រកាសដាក់ឲ្យប្រើប្រាស់ជាផ្លូវការនូវកម្មវិធីនេះនៅថ្ងៃទី១៣ ខែកុម្ភៈ ឆ្នាំ២០១៧ ។ សិស្សានុសិស្សអាចអនុវត្តកម្មវិធីនេះបានតាមរយៈតំណភ្ជាប់នៅលើគេហទំព័រក្រសួង http://bacii.moeys.gov.kh ៕
