ភ្នំពេញ ៖ អតីតសកម្មជនគណបក្សសង្គ្រោះជាតិ កញ្ញា ធី សុវណ្ណថា បានផ្លាស់ប្តូរការទារសំណង់ជំងឺចិត្តពីប្រធានគណបក្សសង្គ្រោះជាតិពីចំនួន ២៥ ម៉ឺនដុល្លារទៅ ៥០ ម៉ឺនដុល្លារវិញ ករណីចោទថា លោក សម រង្ស៊ី បរិហាកេរ្តិ៍ជាសាធារណៈ។
កញ្ញា ធី សុវណ្ណថា អតីតសកម្មជនគណបក្សសង្គ្រោះជាតិ និងជាប្រធានអង្គការយុវជនកិច្ចការសង្គម នៅថ្ងៃទី ០៧ ខែ កុម្ភៈនេះ បានមកបំភ្លឺនៅសាលាដំបូងរាជធានីភ្នំពេញ ជុំវិញករណីប្តឹងបរិហាកេរ្តិ៍ លោក សម រង្ស៊ី ប្រធានគណបក្សសង្គ្រោះជាតិ រឿងសារបង្ហោះនៅលើបណ្តាញសង្គមហ្វេសប៊ុក ដែលចោទកញ្ញាថា ត្រូវបានសម្តេច ហ៊ុន សែន នាយករដ្ឋមន្ត្រី ជួលធ្វើសកម្មភាពបំបែកលោក កឹម សុខា ចេញពីគណបក្សសង្គ្រោះជាតិ។
បន្ទាប់ពីចេញពីបន្ទប់សាកសួរ កញ្ញា ធី សុវណ្ណថា បានប្រាប់អ្នកសារព័ត៌មានថា កញ្ញាបានធ្វើការផ្លាស់ប្តូរ សំណង់ជំងឺចិត្តពី ២៥ ម៉ឺនដុល្លារទៅជា ៥០ ម៉ឺនដុល្លារអាមេរិកវិញ ដោយកញ្ញាអះអាថា ការបរិហាកេរ្តិ៍ជាសាធារណៈនេះ ធ្វើឲ្យខូចកិត្តិយសរបស់កញ្ញាយ៉ាងខ្លាំង។ កញ្ញា ធី សុវណ្ណថា៖«ខ្ញុំត្រូវការភាពស្អាត់ស្អំឲ្យខ្លួនអ្នកណាមានខមមិន(Comment) យ៉ាងម៉េច និងជារឿងរបស់គាត់ ជាយល់ឃើញរបស់គាត់។ ប៉ុន្តែតែហ៊ានខមមិនលើសដូចលោក សម រង្ស៊ី គាត់និយាយចោទប្រកាន់គឺអាចប្រឈមការប្តឹងដូចគ្នា ព្រោះប្រទេសយើងមាននីតិរដ្ឋ មានតុលាការ មានច្បាប់»។
មេធាវីការពារក្តីឲ្យកញ្ញា សុវណ្ណថា លោក លី ច័ន្ទតុលា បានអះអាងថា ដើមបណ្តឹងមានសិទ្ធិផ្លាស់ ប្តូរសំណង់នៅតំណាក់កាលនេះ។ លោកមេធាវីរំពឹងថា កូនក្តីរបស់លោកនឹងទទួលបានសំណង់ចំនួន ៥០ម៉ឺនដុល្លារនេះ ដោយសារកូនក្តីមានភស្តុតាំងដាក់បន្ទុកគ្រប់គ្រាន់។ លោក លី ច័ន្ទតុលា៖«ភស្តុតាំងជាសំខាន់គឺអ្វីជាថ្លែងរបស់លោក សម រង្ស៊ី នៅថ្ងៃទី ១៤ មករា។ ការនិយាយរបស់គាត់យើងហៅជាការនិយាយមួយដែលលក្ខណៈប្រកាចប្រខូចជាចោទប្រកាន់ និយាយព័ត៌មានមិនពិត ហើយបានផ្សព្វផ្សាយជាសាធារណៈ»។
កញ្ញា សុវណ្ណថា បានបដិសេធសារឆ្លើយឆ្លងរវាងកញ្ញាជាមួយ សម្តេចនាយករដ្ឋមន្ត្រី អំពីផែនការរៀបចំបំបែកបំបាក់គណបក្សសង្គ្រោះជាតិ ដែលបែកធ្លាយតាមបណ្តាញសង្គមហ្វេសប៊ុកកាលពីថ្មីៗនេះ ដោយកញ្ញា ថាសារសំឡេងនោះគឺក្រុមចោរបច្ចេកវិទ្យា ឬHacker ជាអ្នកបង្កើតបញ្ហានេះឡើង។
លោក សម រង្ស៊ី ប្រធានគណបក្សសង្គ្រោះជាតិ ត្រូវបានមេធាវីសម្តេច ហ៊ុន សែន ប្តឹងទារជំងឺចិត្តចំនួន ៤ ពាន់លានរៀល ឬ ១ លានដុល្លារអាមេរិក ពីបទបរិហាកេរ្តិ៍ជាសាធារណៈ៕
