អ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ បានឱ្យដឹងថា អ្នកច្បាប់គណៈរដ្ឋមន្ដ្រី និងក្រសួងយុត្ដិធម៌ចាប់ផ្ដើមជួបប្រជុំគ្នាហើយ ដើម្បីធ្វើសេចក្ដីព្រាងលើមាត្រាមួយចំនួនទាក់ទងនឹងច្បាប់ស្ដីពីគណបក្សនយោបាយ។
លោក សុខ ឥសាន្ដ បានបង្ហើបដូចនេះ នៅក្នុងបទសម្ភាសន៍ខ្លីមួយជាមួយវិទ្យុស្ដ្រី កាលពីព្រឹកថ្ងៃចន្ទ ទី០៦ កុម្ភៈ នេះ ។
លោកបានបញ្ជាក់ថា មិនយូរទេយ៉ាងហោចណាស់ គឺ ចុងខែមិនា ឬ ដើមខែ មេសា បន្ថិចច្បាប់នេះនឹងបញ្ចូនទៅកាន់រដ្ឋសភា ដើម្បីឱ្យរដ្ឋសភាពិនិត្យ និងសម្រេចបញ្ចូនទៅកាន់គណៈកម្មាការនីតិកម្ម ហើយសម្រេចបើកកិច្ចប្រជុំដើម្បីពិភាក្សា។
អ្នកនាំពាក្យរូបនេះបានបញ្ជាក់ទៀតថា បើមាត្រាថ្មីដាក់បញ្ចូលក្នុងច្បាប់ស្ដីពីការបោះឆ្នោតត្រូវបានសភាអនុម័ត គឺ អ្នកនយោ បាយណាដែលមានទោសដោយសារតុលាការផ្ដន្ទាទោសគឺ នឹងអស់សិទ្ធិដឹកនាំគណបក្ស ឬមិនអាចធ្វើនយោបាយទៀតឡើយ។
សូមជម្រាបថា អ្វីដែលធ្វើឱ្យអ្នកច្បាប់គណៈរដ្ឋមន្ដ្រី និងក្រសួងយុត្ដិធម៌ ប្រជុំធ្វើវិសោធនកម្មច្បាប់ ស្ដីពី គណបក្សនយោបាយ បន្ទាប់ពីសម្ដេចនាយករដ្ឋមន្ដ្រីហ៊ុន សែន បានបញ្ចេញកំហឹងយ៉ាងខ្លាំងទៅលើលោក សម រង្ស៊ី និងលោក កឹម សុខា ដែលសម្ដេចថា មេដឹកនាំគណកប្សប្រឆាំងនេះ ក្រឡេកក្រឡុច អុកឡុកស្ថានការណ៍នយោបាយ ហើយមិនសមជាអ្នកនយោបាយទៀតឡើយព្រោះជាទណ្ឌិត (លោក សម រង្ស៊ី )៕
