ភ្នំពេញ៖ ក្រសួងធនធានទឹក និងឧតុនិយម បានចេញសេចក្ដីប្រកាសព័ត៌មានមួយ ស្ដីពីអាកាស ធាតុដែលនឹងចុះត្រជាក់ខ្លាំងដល់ ១៧អង្សាសេ ចំពោះរាជធានី ខេត្ដចំនួន១៣ នៅថ្ងៃទី០៧ ខែកុម្ភៈ។
តាមរយៈសេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម ដែលផ្សព្វផ្សាយកាលពីយប់ថ្ងៃទី០៥ ខែកុម្ភៈ ឆ្នាំ២០១៧ បានឲ្យដឹងថា ព្រះរាជាណាចក្រកម្ពុជា ក្នុងរយៈពេលនេះនឹងទទួលរងឥទ្ធិពលជ្រលងសម្ពាធខ្ពស់ ដែលនឹងបណ្ដាលឲ្យ តំបន់វាលទំនាប តំបន់ខ្ពង់រាប និងតំបន់មាត់សមុទ្រ មានសីតុណ្ហភាពអប្បបរមា ចាប់ពី ២០ ទៅ ២២ អង្សាសេ និងកម្រិតសីតុណ្ហភាពអតិបរមាចាប់ពី ២៩ ដល់ ៣១ អង្សាសេ។
ដោយឡែកសេចក្ដីប្រកាសព័ត៌មានរបស់ក្រសួងធនធានទឹកដដែល ក៏ព្រមានដល់ពលរដ្ឋនៅរាជធានី-ខេត្ដចំនួន១៣ ត្រូវមានការប្រុងប្រយ័ត្នឲ្យបានខ្ពស់ នៅថ្ងៃទី០៧ ខែកុម្ភៈ ស្អែកនេះ ដែលរាជាណាចក្រកម្ពុជា នឹងទទួលរងអាកាសធាតុត្រជាក់ក្នុងរង្វង់ពី ១៧ ទៅ ១៩អង្សាសេ។ រាជធានី-ខេត្ដទាំង១៣ រួមមាន រាជធានីភ្នំពេញ ខេត្ដកំពង់ស្ពឺ ឧត្ដរមានជ័យ បន្ទាយមានជ័យ សៀមរាប បាត់ដំបង ប៉ៃលិន តាកែវ កោះកុង កំពង់ឆ្នាំ កំពង់ធំ រតនគិរី និងខេត្ដមណ្ឌលគិរី៕
