ភ្នំពេញ ៖ តាមរយៈលទ្ធផលបោះឆ្នោតក្នុងឆ្នាំ ២០១៣ ធ្វើឱ្យគណបក្សប្រជាជនកម្ពុជាភ័យស្លន់ស្លោ ហើយកំពុងរៀបចំផែនការរកលេសកម្ទេចគណបក្សសង្គ្រោះជាតិពីសង្វៀនប្រកួត។ នេះជាការលើកឡើងរបស់លោក សម រង្ស៊ី ប្រធានគណបក្សសង្គ្រោះជាតិ។ តែមន្ត្រីគណបក្សកាន់ អំណាចថា ការលើកឡើងរបស់លោក សម រង្ស៊ី កំពុងតែនិយាយផ្ទុយពីការពិត។
លោក សម រង្ស៊ី ប្រធានគណបក្សសង្គ្រោះជាតិ បានសរសេរនៅលើទំព័រហ្វេសប៊ុករបស់លោក កាលពីរាត្រីថ្ងៃទី ០៤ កុម្ភៈ ម្សិលមិញ ក្នុងសម្តីដើមយ៉ាងដូច្នេះថា៖«លទ្ធផលនៃការបោះឆ្នោតឆ្នាំ ២០១៣ បានធ្វើឲ្យលោក ហ៊ុន សែន ធ្លាក់ទឹកចិត្តយ៉ាងខ្លាំង។ លោក ហ៊ុន សែន ដឹងថា គាត់មិនអាចឈ្នះគណបក្សសង្គ្រោះជាតិបានទេ ក្នុងការបោះឆ្នោតណាមួយ ដែលគណបក្សប្រជាជន ត្រូវប្រកួតជាមួយគណបក្សសង្គ្រោះជាតិ។ យ៉ាងដូច្នេះហើយ បានជាគាត់កំពុងតែរកលេសដើម្បីរំលាយគណបក្សសង្គ្រោះជាតិ»។
ក្នុងសម័យប្រជុំសភាកាលពីថ្ងៃទី៣១ មករា សម្តេច ហ៊ុន សែន បានប្រតិកម្មដោយបញ្ជាប្រាប់ទៅសភាគណបក្សប្រជាជនរបស់លោក ឱ្យធ្វើញត្តិទៅប្រធានរដ្ឋសភា ដើម្បីកែប្រែច្បាប់ ស្តីពីគណបក្សនយោបាយ ដោយបញ្ជូលមាត្រាថ្មីមួយ ឬកថាខ័ណ្ឌថ្មីដើម្បីដកសិទ្ធិអ្នកនយោបាយ ដែលសម្តេចថាជាទណ្ឌិតមិនឱ្យធ្វើនយោបាយ។ លោកនាយករដ្ឋមន្ត្រីថា គេមិនដែលទុកឱ្យអ្នកមានទោសមានសិទ្ធិធ្វើនយោបាយនោះទេ ដែលសម្តេចថា សូម្បីតែប្រទេសថៃគេក៏រំលាយគណបក្សនយោបាយផងដែរ ប្រសិបបើមេបក្សមានកំហុសព្រហ្មទណ្ឌ។
ជុំវិញការវាយប្រហាររបស់លោក សម រង្ស៊ី នេះ លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា លើកឡើងថា វោហាស័ព្ទរបស់មេបក្សប្រឆាំងនេះ គឺមិនត្រឹមត្រូវតាមបរិបទនយោបាយកម្ពុជានោះទេ ហើយថាសម្តីដេលលើកឡើងនេះ ផ្ទុយពីការពិតទាំងស្រុង។ លោក សុខ ឥសាន្ត ថាបើទោះបីជាបក្សកាន់អំណាចស្រក់សំឡេងគាំទ្រកាលពីឆ្នាំ ២០១៣ក្តី តែលោកថា លទ្ធផលឆ្នោតនៅឆ្នាំ ២០១៨ អាចប្រហាក់ប្រហែលនឹងលទ្ធផលកាលពីឆ្នាំ ២០១៣ ដែលនាំឱ្យគណបក្សប្រជាជនឈ្នះការបោះឆ្នោតនាពេលខាងមុខនេះ។ លោក សុខ ឥសាន្ត៖«ហើយចំនួនតួលេខអ្នកគាំទ្រនៅតែប្រហាក់ប្រហែលមុនដែរ ដែលវាអត់មានស្រុឌចុះខ្លាំងទេ អាហ្នឹងវាជាការមួយដែលយើងវៃតម្លៃថា នៅមានចំណុចខ្វះខាតដែលយើងបានកែលំអ។ អញ្ចឹងទេរដ្ឋាភិបាលលោកបានដាក់នូវយុទ្ធសាស្ត្រ និងយុទ្ធវិធីក្នុងការធ្វើកំណែទម្រង់ស៊ីជម្រៅលើគ្រប់វិស័យ អញ្ចឹងផ្អែកទៅលើមូលដ្ឋាននៃលទ្ធផលជាជ័យជំនះលើគ្រប់វិស័យនេះ យើងយល់ថាប្រជាប្រិយភាពរបស់គណបក្សប្រជាជននឹងកើនឡើងវិញ»។
ដំណើរនយោបាយឆ្ពោះទៅរកការបោះឆ្នោតឃុំសង្កាត់ ឆ្នាំ ២០១៧ និងបោះឆ្នោតជាតិឆ្នាំ ២០១៨ ខាងមុខនេះ លោក គឹម សុខ អ្នកសិក្សាស្រាវ ជ្រាវសង្គម និងនយោបាយកម្ពុជាលើកឡើងថា គណបក្សប្រជាជនកម្ពុជាទំនងមិនរៀបចំយុទ្ធសាស្ត្រឆ្ពោះទៅរកការបោះឆ្នោតនោះទេ គឺគណ បក្សប្រជាជនកម្ពុជាទំនងកំពុងតែត្រៀមរៀបចំយុទ្ធសាស្ត្រទៅបន្តអំណាចទៅវិញ។ លោក គឹម សុខ៖«ប្រសិនបើត្រៀមខ្លួនទៅរៀបចំការបោះឆ្នោត ច្បាស់ជាយល់ចិត្តរាស្ត្រហើយ ច្បាស់ជាដោះស្រាយបញ្ហាអយុត្តិធម៌សង្គមដែលប្រជាពលរដ្ឋកំពុងទាមទារនោះហើយ ច្បាស់ជាដោះស្រាយបញ្ហានៅមូលដ្ឋានហើយ ច្បាស់ជាដោះស្រាយបញ្ហាព្រំដែនហើយដើម្បីយល់ចិត្តរាស្ត្រ ពីព្រោះការកាលគេនិយាយពីការបោះឆ្នោត គឺគេនិយាយទៅលើការគ្រាំទ្ររបស់ប្រជារាស្ត្រ ដូច្នេះហើយយើងមើលចំណុចចុងក្រោយគាត់មិនបានធ្វើអ្វីដែលទៅយកចិត្តរាស្ត្រទេ បានន័យថាគាត់មិនបានត្រៀមទៅការបោះឆ្នោតទេ គាត់ត្រៀមក្នុងយុទ្ធធិករបែបណាមួយក្នុងនយោបាយ ដើម្បីរកទិសដៅនៃការបន្តអំណាចតែប៉ុណ្ណឹង»។
ជុំវិញការធ្វើវិសោធនកម្មច្បាប់ស្តីពីគណបក្សនយោបាយនេះ គណបក្សនយោបាយមួយចំនួនដែលត្រៀមប្រកួតប្រជែងដណ្តើមកៅអីតំណាង រាស្ត្រនៅសភាខាងមុខនេះ មិនគាំទ្រឱ្យបក្សកាន់អំណាចធ្វើវិសោធនកម្មច្បាប់ដើម្បីដាក់ជនជាប់ពិរុទ្ធឲ្យនៅក្រៅការដឹកនាំនយោបាយនោះទ្បើយ ខណៈបក្សប្រជាជនកំពុងតាក់តែងឯកសារធ្វើវិសោធន កម្មច្បាប់បានមួយចំនួនហើយ។ បើតាមអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានឱ្យដឹងថា យ៉ាងយូរនៅអំទ្បុងខែមេសា ខាងមុខនេះសេចក្តីព្រាងវិសោធនកម្មច្បាប់ស្តីពីគណបក្សនយោបាយនឹងធ្លាក់ដល់ដៃរដ្ឋសភា។
