ភ្នំពេញ ៖ នៅក្នុងពិធីចុះអនុស្សរណយោគយល់គ្នា រវាងសមាគមសហគ្រិនវ័យក្មេងកម្ពុជា (YEC) ជាមួយ អង្គភាពក្រុមសហគ្រិនវ័យក្មេងនៃសភាពាណិជ្ជកម្មប្រទេសជប៉ុន (YEG) ដែលធ្វើឡើងកាលពីរសៀល ថ្ងៃទី០១ ខែកុម្ភៈ ឆ្នាំ២០១៧ លោក ប៉ាន សូរស័ក្តិ រដ្ឋមន្ត្រីក្រសួងពាណិ ជ្ជកម្ម មានប្រសាសន៍ថា កម្ពុជា នៅក្នុងក្រសែភ្នែករបស់វិនិយោគិនជប៉ុន គឺជាទីផ្សារដែលមានសក្តានុពលសម្រាប់វិស័យសេវាកម្មជាក់ ស្តែងដូចជាការរវិនិយោគរបស់ផ្សារទំនើប អ៊ីអន សាខាទី១ និងទី២ ការបើកឲ្យមានជើងហោះ ហើរត្រង់ របស់អាកាសចរណ៍ជប៉ុន ANA ពីតូក្យូ មករាជធានីភ្នំពេញ និងការបើកដំណើរការភោជនីយដ្ឋានជប៉ុន នៅក្នុងតំបន់សេដ្ឋកិច្ចពិសេសភ្នំពេញជាដើម។
លោករដ្ឋមន្ត្រីបន្តទៀតថា ការចុះអនុស្សរណៈនេះ គឺជាវឌ្ឍនភាពថ្មីមួយទៀត សម្រាប់ទំនាក់ទំនង ពាណិជ្ជកម្មទ្វេភាគីរវាងកម្ពុជា និងជប៉ុន ខណៈដែលទំហំពាណិជ្ជកម្មនៃប្រទេសទាំងពីរ បានកើនឡើង ជាលំដាប់ក្នុងរយៈពេលបីឆ្នាំចុងក្រោយនេះ។ លោក ប៉ាន សូរស័ក្តិ ៖«ខ្ញុំសង្ឃឹមថាសហ គ្រិនវ័យក្មេង នៃប្រទេសទាំងពីរ នឹងមានឱកាសធ្វើការផ្លាស់ប្តូរបទពិសោធន៍គ្នាទៅវិញទៅមក លើកិច្ចការប្រកបធុរកិច្ច ដើម្បីឈានទៅសហការវិនិយោគលើវិស័យដ៏មានសក្តានុពលផ្សេងៗ សំដៅបង្កើតប្រាក់ចំណេញ និង ឱកាសការងារជូនប្រជាជន ក៏ដូចជារួមចំណែកជំរុញកំណើនសេដ្ឋ កិច្ច ជាមួយរាជរដ្ឋាភិបាលកម្ពុជា»។
លោក ហ៊ិដេហ៊ីសា អូរីនូឈិ ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា មានប្រសាសន៍ថា កំណើនសេដ្ឋកិច្ចដ៏ឆាប់រហ័សរបស់កម្ពុជា និងស្ថិរភាពនយោបាយ គឺជាកត្តាទាក់ទាញដល់សហគ្រិន ជប៉ុនជាច្រើន។លោក ហ៊ិដេហ៊ីសា អូរីនូឈិ៖«ខ្ញុំជឿថាពិធីចុះ MoU ថ្ងៃនេះ នឹងជួយបង្កើនទំនាក់ទំនង ឈ្នះៗ រវាងសហគ្រិនវ័យក្មេងរបស់ជប៉ុន និងកម្ពុជា»។
យោងតាមទិន្ន័យផ្តល់ដោយមជ្ឈមណ្ឌលពាណិជ្ជកម្មអន្តរជាតិ (ITC) ទំហំពាណិជ្ជកម្មរវាងកម្ពុជា និង ជប៉ុន នៅក្នុងឆ្នាំ ២០១៣ មានចំនួន ១៧៣ លានដុល្លារ ។ នៅឆ្នាំ២០១៤ មានចំនួន ៥១៦លានដុល្លារ និងឆ្នាំ២០១៥ បានកើនដល់ចំនួន ៦៦៦លានដុល្លារ។ ទន្ទឹមគ្នានេះ ក្នុងទឹកប្រាក់វិនិ យោគដោយផ្ទាល់ ពីបរទេស (FDI) លើវិស័យអចលនទ្រព្យដែលមានទំហំ ៧.២ពាន់លានដុល្លារ សម្រាប់រយៈពេល ៨ខែ នៃឆ្នាំ ២០១៦ ប្រទេសជប៉ុន បានឈរនៅក្នុងលំដាប់ទីបី ខណៈដែលប្រទេសចិន ឈរនៅក្នុងលំដាប់ទី១ ហើយប្រទេសកូរ៉េខាងត្បូង ឈរក្នុងលំដាប់ទី ២៕
