ភ្នំពេញ ៖ តុលាការក្រុងភ្នំពេញ បានប្រកាសពន្យាពេល សវនាការ ករណីអ្នកស្រី ទេព វន្នី ដោយសារតែអវត្តមាន សាក្សី និងជនរងគ្រោះ ដើមបណ្ដឹង។នេះបើតាមអ្នកស្រី បូ ឆវី តំណាងសហគមន៍ស្ដ្រីបឹងកក់ដែលបានផ្ដល់បទសម្ភាសន៍ឱ្យវិទ្យុស្ដ្រីFM 102 នៅរសៀលនេះ ។
អ្នកស្រី បូ ឆវី ជាសាក្សីខាងចុងចោទរបស់អ្នកស្រីទេពវន្នីផងនោះ បានឱ្យដឹងបន្ដថា សវសវនាការដែលមិនមានវត្តមានសាក្សី និងជនរងគ្រោះ ខាងដើមបណ្ដឹង គឺ ត្រូវបានផ្អាកនៅប្រហែលជាម៉ោង ៤រសៀលនេះ ។ អ្នកស្រី បូ ឆវី បានហៅសវនាការនៅថ្ងៃនេះ ជារឿងអយុត្ដិធម៌។
សូមស្ដាប់បទសម្ភាសន៍ខ្លីជុំវិញរឿងនេះ៖
យ៉ាងវិទ្យុស្ត្រីមិនអាច សុំ ការឆ្លើយតបពី អ្នកនាំពាក្យតុលាការរាជធានីភ្នំពេញបានទេនៅថ្ងៃនេះ ចំពោះការ បរិហាររិះគន់របស់ អ្នកស្រី បូ ឆវី។
អ្នកស្រី ទេព វន្នី ត្រូវបានសមត្ថកិច្ចចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ ពោលគឺភ្លាមៗបន្ទាប់ពីសមត្ថកិច្ចចូលទៅបង្ក្រាបក្រុមស្ដ្រី សហគមន៍បឹងកក់ដែលនាំគ្នាធ្វើពិធីថ្ងៃចន្ទពណ៌ខ្មៅ ទាមទារឲ្យដោះលែងមន្ដ្រីសិទ្ធិមនុស្ស អាដហុក និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត។
អ្នកស្រី ត្រូវបានតុលាការក្រុងភ្នំពេញចោទប្រកាន់ពីបទហិង្សាដោយចេតនាមានស្ថានទម្ងន់ទោស ប្រព្រឹត្ដនៅក្បែរវិមានឯករាជ្យ កាលពីថ្ងៃទី១៣ ខែមីនា ឆ្នាំ២០១៣ ក្បែរផ្ទះសម្ដេចនាយករដ្ឋមន្ដ្រី ហ៊ុន សែន។
ករណីនេះ តុលាការចោទប្រកាន់ស្ត្រីសហគមន៍បឹងកក់រូបនេះចំនួនពីរបទល្មើស ករណីទី១ ពីបទហិង្សាដោយចេតនាមានស្ថានទម្ងន់ទោស និងករណីទីពីរ ជាប់ចោទពីបទប្រមាថ អ្នករាជការសាធារណៈ និងប្រឆាំងអ្នករាជការសាធារណៈមានស្ថានទម្ងន់ទោស៕
