តុលាការក្រុងភ្នំពេញ បើកវនាការរឿងអ្នកស្រីទេព វន្នី នៅវេលាម៉ោង ២រសៀល នៅថ្ងៃទី៣កុម្ភៈនេះ ករណីពាក់ព័ន្ធនឹងបទល្មើសហិង្សាដោយចេតនាមានស្ថានទម្ងន់ទោស។ នេះបើតាមសេចក្ដីជូនដំណឹងរបស់ សហគមន៍ស្ដ្រីបឹងកក់។
តាមសេចក្ដីជូនដំណឹងរបស់សហគមន៍ស្ដ្រីសបឹងកក់ សវនាការដែលដឹកនាំដោយ ឡុង កេសភីរម្យ ជាចៅក្រមជំនុំជម្រះ និង លោក សៀង សុខ ជាតំណាងអយ្យការ ក៏មានការចូលរួមពីតំណាងសហគមន៍ស្ដ្រីបឹងកក់ ៣រូប គឺ អ្នកស្រី ង៉ែត ឃុន ហៅយាយម៉ាមី អ្នកស្រី គង់ ចន្ថា និង អ្នកស្រី បូ ឆវី គឺជាសាក្សីដោះបន្ទុក។
កាលពីថ្ងៃទី ២៥ មករា តុលាការកំពូល បានសម្រេចបន្ដឃុំខ្លួនអ្នកស្រី ទេព វន្នី ក្នុងពន្ធនាគារដដែល ដោយទុកលទ្ធភាពឲ្យតុលាការក្រុងភ្នំពេញបន្ដនីតិវិធីលើអ្នកស្រីបន្ដទៀត។
សូមជម្រាបដែរថា អ្នកស្រី ទេព វន្នី តំណាងសហគមន៍បឹងកក់ត្រូវបានតុលាការក្រុងភ្នំពេញចោទប្រកាន់ពីបទហិង្សាដោយចេតនាមានស្ថានទម្ងន់ទោស ប្រព្រឹត្ដនៅក្បែរវិមានឯករាជ្យ កាលពីថ្ងៃទី១៣ ខែមីនា ឆ្នាំ២០១៣ ក្បែរផ្ទះសម្ដេចនាយករដ្ឋមន្ដ្រី ហ៊ុន សែន។
អ្នកស្រីត្រូវបានតុលាការចោទប្រកាន់ចំនួនពីរបទល្មើស ករណីទី១ ពីបទហិង្សាដោយចេតនាមានស្ថានទម្ងន់ទោស និងករណីទីពីរ ជាប់ចោទពីបទប្រមាថ អ្នករាជការសាធារណៈ និងប្រឆាំងអ្នករាជការសាធារណៈមានស្ថានទម្ងន់ទោស។
អ្នកស្រី ទេព វន្នី ត្រូវបានសមត្ថកិច្ចចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ ពោលគឺភ្លាមៗបន្ទាប់ពីសមត្ថកិច្ចចូលទៅបង្ក្រាបក្រុមស្ដ្រី សហគមន៍បឹងកក់ដែលនាំគ្នាធ្វើពិធីថ្ងៃចន្ទពណ៌ខ្មៅ ទាមទារឲ្យដោះលែងមន្ដ្រីសិទ្ធិមនុស្ស អាដហុក និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត៕
