ប្រទេសម៉ាឡេស៊ី ប្រកាសទទួលយកជនភៀសខ្លួន Rohingya មកធ្វើការនៅក្នុងប្រទេសនេះ គឺចាប់ពីថ្ងៃទី ០១ មីនា ខែក្រោយនេះ ក្នុងគោលបំណងជួយទប់ស្កាត់វិបត្តិជនភៀសខ្លួនរបស់សហគមន៍មួយនេះ ។
នៅក្នុងសេចក្ដីថ្លែងការណ៍មួយដែលបានចុះផ្សាយកាលពីថ្ងៃព្រហស្បតិ៍ ទី២ កុម្ភៈ ដែលស្រង់សម្ដីឧបកនាយករដ្ឋមន្ដ្រី Ahmad Zahid Hamidi បានឱ្យដឹងថា ការសម្រេចដូចនេះធ្វើឡើងបន្ទាប់ពីមានកិច្ចប្រជុំជាមួយអង្គការសហប្រជាជាតិផ្នែកជនភៀសខ្លួន ដែលក្នុងកិច្ចប្រជុំនេះ បានឈានដល់ការព្រមព្រៀងគ្នា ដើម្បីជួយសង្គ្រោះជនភៀសខ្លួនសហគមន៍រ៉ូហ៊ឹងយ៉ា ។
តាមលោកឧបនាយករដ្ឋមន្ដ្រីសហគមន៍រ៉ូហ៊ឹងយ៉ាដែលទៅដល់ប្រទេសម៉ាឡេស៊ីនឹងអនុញ្ញាតឱ្យទៅធ្វើការនៅតំបន់កៅស៊ូ និងឧស្សាហកម្មនៅតំបន់នោះ។
លោកឧបនាយករដ្ឋមន្ដ្រីបានបញ្ជាក់ថា ផែនការនេះ អាចកាត់បន្ថយបាននូវការជំនួញជួញដូរមនុស្ស និងការកេងប្រវ័ញ្ចផ្សេងៗលើសហគមន៍រ៉ូហ៊ឹងយ៉ា ។
សហគមន៍ ជាពលរដ្ឋរត់ចេញពីតំបន់រាក់ឃីននៃប្រទេសភូមា បានរងការធ្វើទុក្ខបុកម្នេញដោយការរើសអើងជាតិសាសន៍ ដែលពួកគាត់បានរត់ចេញតំបន់នេះ ទៅនៅប្រទេសបង់ក្លាដេស និងប្រទេសម៉ាឡេស៊ី ឥណ្ឌូនេស៊ី ប្រមាណជា ៣ម៉ឺននាក់ មកហើយរយៈពេល ១ឆ្នាំចុងក្រោយនេះ ។ប្រភព:CNA
