ភ្នំពេញ៖អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលគេហៅថា សាលាក្ដីខ្មែរក្រហម ឱ្យដឹងថាគម្រោងកែថវិកាកែសម្រួលសម្រាប់ឆ្នាំ ២០១៦-២០១៧ កើនឡើងចំនួន ១,៩៤លានដុល្លារអាមេរិក សម្រាប់ទាំងពីរភាគី គឺភាគីជាតិ និងអន្តរជាតិ។
គម្រោងថវិកាសម្រាប់ឆ្នាំ ២០១៦ត្រូវបានកែសម្រួលនៃការចំណាយសរុបចំនួន ៣០,៦១ លានដុល្លារ ដែលក្នុងនោះភាគីអន្តរជាតិចំណាយថវិកាអស់ចំនួន ២៤,០៦ លានដុល្លារអាមេរិក និងភាគីជាតិចំណាយថវិកា ៦,៦៤ លានដុល្លារអាមេរិក។
គម្រោងថវិកាកែសម្រួលសម្រាប់ឆ្នាំ ២០១៧ នេះ មានទឹកប្រាក់សរុបចំនួន ៣០,១៣ លានដុល្លារអាមេរិក ដែលក្នុងនោះភាគីអន្តរជាតិ គ្រោងចំណាយចំនួន ២៣,៧៦ លានដុល្លារអាមេរិក និង ភាគីជាតិ គ្រោងចំណាយចំនួន ៦,៣៧ លានដុល្លារអាមេរិក។
សាលាក្ដីខ្មែរក្រហម ឬអង្គជំនុំជម្រះវិសាមញ្ញក្នុងតុលាការកម្ពុជា បានបង្កើតឡើងនៅឆ្នាំ២០០៦ ដោយក្រោមកិច្ចសហប្រតិបត្តិការ និងគាំទ្រដោយអង្គការសហប្រជាជាតិ។
សាលាក្ដីនេះបានកាត់ទោសលោក កាំងហ្កិច អ៊ាវ ហៅឌុច អតីតប្រធានគុកទទួលស្លែង ឱ្យមានទោស អស់មួយជីវិត ហើយ ចំណែកលោក ខៀវ សំផន អតីតប្រមុខរដ្ឋនិង លោក នួន ជា អតីតប្រធានរដ្ឋសភានៃរបបកម្ពុជា ក៏ត្រូវបានកាត់ទោស អស់មួយជីវិតដែរក្នុងសំណុំរឿង ០០២/១។ ទាំងលោក ខៀវ សំផន និង នួន ជា កំពុងត្រូវរង់ចាំ ទទួលសាលក្រម ០០២/២ មួយលើកទៀត ៕
