ភ្នំពេញ៖ប្រធានគណបក្សប្រជាជនកម្ពុជាសម្តេច ហ៊ុន សែន បានបង្គាប់ឲ្យតំណាងរាស្ដ្ររបស់ខ្លួនស្នើច្បាប់ទប់ស្កាត់បុគ្គលដែលជាប់ពិរុទ្ធមិនឲ្យដឹកនាំបក្សនយោបាយ។
ថ្លែងទៅកាន់ក្រុមនិស្សិតក្នុងពិធីចែកសញ្ញាបត្រមួយក្នុងទីក្រុងភ្នំពេញនៅព្រឹកថ្ងៃព្រហស្បតិ៍ទី០២ ខែកុម្ភៈ ឆ្នាំ២០១៧នេះ សម្តេច ហ៊ុន សែន ស្នើឲ្យមានកិច្ចប្រជុំនិងសម្រេចលើសំណើនេះក្នុងថ្ងៃដដែលនេះ។ «វាមិនដែលឱ្យអាណា អ្នកទោសយកមកធ្វើប្រធានគណបក្សទេ។ ម្សិលមិញចុះហត្ថលេខាបង្កើតអាដហុកមួយរបស់គណបក្សប្រជាជន ថ្ងៃនេះប្រជុំខ្ញុំស្នើសុំប្រជុំតែមួយល្ងាចហ្នឹងបានហើយកុំប្រជុំយូរពេក មើលឱ្យហើយសម្រេចទៅ»។
សំណើររបស់សម្តេចនាយករដ្ឋមន្ត្រីធ្វើឡើងស្របពេលដែលមេដឹកនាំគណបក្សប្រឆាំងលោក សម រង្ស៊ី ត្រូវតុលាការក្រុងភ្នំពេញសម្រេចផ្តន្ទាទោសកាលពីពេលថ្មីៗនេះ។ ហើយលោក សម រង្ស៊ី ក៏កំពុងជាប់បណ្តឹងជុំទិសផងដែរ។ លោក សម រង្ស៊ី បច្ចុប្បន្នកំពុងស្ថិតនៅនិរទេសដោយស្មគ្រ័ចិត្តនៅក្រៅប្រទេស។
ជាមួយគ្នានេះ សម្តេចក៏ចង់អនុវត្តន៍ច្បាប់ដូចនៅប្រទេសថៃ គឺចំពោះគណបក្សណាខុសធ្ងន់នឹងរំលាយបក្សចោល ហើយរាល់អ្នកនយោបាយដែលជាសមាជិកគណៈកម្មានាយកនៃគណបក្សដែលត្រូវបានរំលាយនោះ នឹងហាមមិនឱ្យធ្វើនយោបាយរយៈពេល៥ឆ្នាំ។
អ្នកនាំពាក្យគណបក្សសង្គ្រោះជាតិនិងតំណាងរាស្ដ្រផ្សេងទៀតរបស់គណបក្សនេះមិនអាចទាក់ទងបានទេនៅថ្ងៃនេះដោយសារទូរស័ព្ទរបស់ពួកគាត់រោទិ៍ដោយគ្មានអ្នកទទួល។ ជុំវិញបញ្ហានេះ លោក សម គន្ធាមី នាយកប្រតិបត្តិអង្គការនិកហ្វិច មានប្រសាសន៍ថា ការធ្វើនយោបាយឬដឹកនាំនយោបាយគឺជាសិទ្ធិរបស់ពលរដ្ឋ។ «ឆន្ទះរបស់គេ យើងអត់អាចហាមឃាត់គេបានទេ អាហ្នឹងសិទ្ធិរបស់គេ គេគាំទ្រអ្នកណាក៏ដោយ ទោះទណ្ឌិតក្តី បើគេនៅស្រលាញ់ នៅគាំទ្រ ហ្នឹងជារឿងរបស់គេ យើងទៅហាមគេមិនបានទេ»។
លោក សម គន្ធាមី បន្តថា ចេតនាណាមួយចង់រំលាយគណបក្សនយោបាយដូចប្រទេសថៃ «គឺជារឿងគ្រោះថ្នាក់មួយ និងអយុត្តិធម៌បំផុត» សម្រាប់គណបក្សនយោបាយដែលមានកំហុស។ យោងតាមរដ្ឋធម្មនុញ្ញនៃព្រះរាជាណាចក្រកម្ពុជា ប្រជាពលរដ្ឋខ្មែរទាំងពីរភេទ «មានសិទ្ធិបោះឆ្នោត និងអាចឈរឈ្មោះឲ្យគេបោះឆ្នោត» បាន៕
