ភ្នំពេញ ៖ ប្រធានគណបក្សប្រជាជនកម្ពុជាសម្តេចហ៊ុន សែន បានបកស្រាយនយោបាយកាប់ឈើ ក៥ ក្នុងសម័យរដ្ឋកម្ពុជា ដោយបានហៅផែនការនោះថា ជានយោបាយទប់ទល់នឹងពួកខ្មែរក្រហម។ ការបកស្រាយនេះធ្វើឡើងបន្ទាប់ពីមានការរិះគន់ពីមេដឹកនាំគណបក្សសង្គ្រោះជាតិ។ កញ្ញា ច្រឹក ស្រីអូន រាយការណ៍៖
នៅថ្ងៃព្រហស្បត្តិ៍នេះសម្ដេច ហ៊ុន សែន នាយករដ្ឋមន្ដ្រីនៃប្រទេសកម្ពុជាបានថ្លែងការពារនយោបាយ ក៥ឬការកេណ្ឌពលករឲ្យកាប់ព្រៃក្នុងទសវត្សឆ្នាំ១៩៨០ដោយអះអាងថានោះជានយោបាយការពារប្រទេស។
ការបកស្រាយនេះ ធ្វើឡើងបន្ទាប់ពីមានការរិះគន់ ពី ប្រធានគណបក្សប្រឆាំង លោក សម រង្ស៊ី។ លោកសម រង្ស៊ី កាលពីថ្ងៃទី ២៧ កមរា ឆ្នាំ២០១៧ បានលើកក្នុងទំព័រហ្វេសប៊ុករបស់ខ្លួនថា ផែនការក៥ក្នុងការដឹកនាំរបស់សម្ដេច ហេង សំរិន បានសម្លាប់ពលរដ្ឋស្លូត រាប់ម៉ឺនរាប់សែននាក់។
សម្ដេច ហេង សំរិន បច្ចុប្បន្នជា ប្រធានកិត្តិយសបក្សប្រជាជនកម្ពុជានិងធ្លាប់ជាប្រមុខរដ្ឋក្នុងសម័យសាធារណៈរដ្ឋប្រជាមនិតកម្ពុជា។
សម្ដេច ហ៊ុន សែន បានបកស្រាយថា ផែនការក៥ គឺដើម្បីការពាររារាំងពួកខ្មែរក្រហមមិនឲ្យវិលត្រឡប់មកកាប់សម្លាប់ពលរដ្ឋកម្ពុជាសាជាថ្មី។សម្តេច ហ៊ុន សែន បកស្រាយថាផែនការ ក៥នេះ គឺ ជានយោបាយការពារជាតិប្រឆាំងនឹងពួកខ្មែរក្រហម។
លោក សំបូរ មាណ្ណារ៉ា សាស្ត្រចារ្យប្រវត្តិសាស្ត្រ មានប្រសាសន៍ថា ផែនការក៥ធ្វើឡើងក្នុងអំឡុងពេលដែលប្រទេសកម្ពុជាមិនទាន់មានស្ថេរភាពនៅឡើយទេ។ លោកបន្តថា ថ្វីបើផែនការនេះបណ្តាលឲ្យបាត់បង់ជីវិតប្រជាពលរដ្ឋមួយចំនួន ប៉ុន្តែវាជាផែនការការពារជាតិបែបជាតិនិយមខណៈដែលកម្ពុជាមិនទាន់រឹងមាំនៅឡើយ។
លោក សំបូរ មាណ្ណារ៉ា ៖ « ចលនានេះបង្ហាញពីជាតិនិយមរបស់រដ្ឋាភិបាលក្នុងសម័យនោះក្នុងការប្រឹងប្រែងធ្វើអ្វីដោយខ្លួនឯង
យកកំលាំងដែលមានស្រាប់ និងមានដោយខ្លួនឯង ដោយគឺយើងមិនគួរពឹងបរទេសឡើយ»។
ផែនការ ក៥ ធ្វើឡើងចន្លោះ ឆ្នាំ ១៩៨៤ ដល់ឆ្នាំ ១៩៨៨៕
