ក្រុមស្រាវជ្រាវបញ្ហាព្រំដែននៅរាជបណ្ឌិត្យសភាកម្ពុជា នឹងធ្វើការផ្ទៀងផ្ទាត់ផែនទីដែលខ្លួនទទួលបានទាំងអស់នៅថ្ងៃសុក្រ ទី១៤ ខែសីហា ឆ្នាំ ២០១៥ ខាងមុខនេះ នៅរាជបណ្ឌិត្យសភាកម្ពុជា នាវេលាម៉ោងវេលាម៉ោង ៩ ព្រឹក។
ប្រធានក្រុមស្រាវជ្រាវបញ្ហាព្រំដែននៅរាជបណ្ឌិត្យសភាលោក សុខ ទូច មានប្រសាសន៍ថា ការធ្វើការផ្ទៀងផ្ទាត់នេះ គឺដើម្បីឲ្យភាគីពាក់ព័ន្ធទាំងអស់ ទាំងអ្នកនយោបាយ ទាំងអង្គការសង្គមស៊ីវិល ប្រជាពលរដ្ឋ ក៏ដូចជាអ្នកសារព័ត៌មាន បានដឹងនូវអ្វីដែលក្រុមការងាររបស់លោកទទួលបាន។
ការប្រកាសរបស់ក្រុមស្រាវជ្រាវបញ្ហាព្រំដែននៅរាជបណ្ឌិត្យសភាកម្ពុជានេះ ធ្វើឡើងក្រោយពេលគណបក្សសង្គ្រោះជាតិ បានប្រគល់ផែនទីទៅឲ្យខ្លួនកាលពីថ្ងៃទី ១០ ខែសីហាកន្លងមកនេះ ហើយថា ខ្លួនបានទទួលផែនទីពីគ្រប់ភាគីពាក់ព័ន្ធរួចហើយ នៅឡើយតែផែនទីដែលសម្ដេច នរោត្ត សីហនុ យកទៅតម្កល់នៅអង្គការសហប្រជាជាតិប៉ុណ្ណោះ៕
