ភ្នំពេញ៖ក្រុមប្រឹក្សាធម្មនុញ្ញដែលជាស្ថាប័នកំពូលបានសម្រេចតម្កល់សាលដីការបស់គណៈ កម្មាធិការជាតិរៀបចំការបោះឆ្នោត (គជប) នៅថ្ងៃពុធ ទី១ ខែកុម្ភៈ នេះ ដោយមិនលុបឈ្មោះជន ដែលគេសង្ស័យថាជាជនបរទេសឡើយ។
ជនបរទេសដែលចំនួន ៤៩២នាក់ ត្រូវគណបក្សប្រឆាំងប្តឹងឱ្យលុបឈ្មោះចេញពីបញ្ជីឈ្មោះអ្នកបោះឆ្នោតដោយសំអាងថា ពួកគេមិនមានសញ្ជាតិខ្មែរ។
យោងតាមសចក្តីជូនដំណឹងរបស់ គ.ជ.ប ក្រុមប្រឹក្សាធម្មនុញ្ញបានសំរេចនៅថ្ងៃទី៣១ ខែមករា ឆ្នាំ២០១៧ ដោយតម្កល់ទុកសេចក្តីសម្រេចចំនួន៦ របស់គណៈកម្មាធិការជាតិរៀបចំការបោះឆ្នោត ទុកជាបានការទាំងមូល។ ក្រុមប្រឹក្សាធម្មនុញ្ញយល់ឃើញថា ការប្តឹងទាស់លើសេចក្តីសម្រេចរបស់ គ.ជ.ប ក្នុងការសុំលុបឈ្មោះជនបរទេសពីសំណាក់គណបក្សសង្គ្រោះជាតិ ពុំមានឯកសារឬភស្តុតាងជាលាយ លក្ខណ៍អក្សរដែលអាចឱ្យក្រុមប្រឹក្សាធម្មនុញ្ញ បដិសេធសេចក្តីសម្រេច របស់ គ.ជ.ប បានឡើយ។ ហើយការបញ្ជាក់ពីធាតុពិតនៃអត្តសញ្ញាណរបស់បុគ្គលណាម្នាក់ «មិនមែនជាសមត្ថកិច្ចរបស់ក្រុមប្រឹក្សាធម្មនុញ្ញឡើយ»។
សូមបញ្ជាក់ថា ក្រុមប្រឹក្សាធម្មនុញ្ញ បានផ្តើមបើកសវនាការជាសាធារណៈលើបណ្តឹងរបស់គណបក្សសង្គ្រោះជាតិរយៈពេលបីថ្ងៃដោយគិតចាប់ពីថ្ងៃទី៣០ ដល់ថ្ងៃទី១ កុម្ភៈ។ មានសំណុំរឿងចំនួន១១ ដែលក្រុមប្រឹក្សាធម្មនុញ្ញនឹងដោះស្រាយក្នុងរយៈពេលបីថ្ងៃនេះ។ បណ្តឹងដែលបានប្តឹងភាគច្រើន គឺប្តឹងឱ្យលុបឈ្មោះជនដែលគេ សង្ស័យថា ជាជនវៀតណាមចំនួន ៥៨៧នាក់ពីបញ្ជីបោះឆ្នោត។ ក្រៅពីនេះមានបណ្តឹង២ឬ៣ប៉ុណ្ណោះ ដែលជាបណ្តឹងស្តីពីភាពមិនប្រក្រតីនៃលំនៅដ្ឋាននិងថ្ងៃខែឆ្នាំកំណើត៕
