ភ្នំពេញ៖ រដ្ឋសភានឹងធ្វើការស៊ើបអង្កេតរឿងអាស្រូវផ្លូវភេទ ស្នេហាលួចលាក់ដែលទំនងជាប់ពាក់ព័ន្ធនឹងតំណាងរាស្ត្រគណបក្សប្រឆាំងលោក យ៉ែម បុញ្ញាឬទ្ធិ ជាមួយលេខាផ្ទាល់ខ្លួនរបស់លោក។
លោក ឡេង ប៉េងឡុង អ្នកនាំពាក្យរដ្ឋសភា បានឱ្យដឹងនៅថ្ងៃពុធ ទី១ ខែកុម្ភៈ នេះថា លោកកំពុងធ្វើការស្រាវជ្រាវពីរឿងរ៉ាវស្នេហានេះ។ លោកបញ្ជាក់ថា មូលហេតុនៃការស្រាវជ្រាវនេះគឺ ដោយសារខ្មែរមានជំនឿថា នៅពេលមានការធ្វើអាណាចារនៅក្នុងបន្ទប់ធ្វើការនោះនឹងនាំរឿងចង្រៃ។
ទោះជាយ៉ាងណាមន្ត្រីអ្នកនាំពាក្យដដែលបញ្ជាក់ថា នឹងមិនមានវិធានការអ្វីទាំងអស់ប្រឆាំងនឹងតំណា ងរាស្ដ្រ និងជាប្រធានគណៈកម្មាការទី៧ នៃរដ្ឋសភាដែលកំពុងស្ថិតក្រោមការសង្ស័យនេះទេ។ ប៉ុន្តែនឹងមានពិធីសូត្រមន្តសែនព្រេនតាមរបៀបសាសនាប៉ុណ្ណោះ។
កាលពីថ្ងៃទី៣១ មករា ម្សិលមិញ សម្តេចនាយករដ្ឋមន្ត្រី ហ៊ុន សែន បានថ្លែងដោយយោងលើព័ត៌មានលើទំព័រហ្វេសប៊ុក របស់ឈ្មោះ សីហា ដែលលើកពីអ្វីដែលគេសង្ស័យថា ជាទំនាក់ទំនងស្នេហាលួយលាក់នោះ។ ទំព័រហ្វេសប៊ុក ឈ្មោះ សីហា បានទម្លាយរឿងអាស្រូវស្នេហាដែលលោកអះអាងថា ជាប់ពាក់ពន្ធ័ជាមួយលោក យ៉ែម បុញ្ញាឬទ្ធិ។ ហើយដំណាលគ្នានោះម្ចាស់ទំព័រហ្វេសប៊ុកដដែលបានទម្លាយអាថ៌កំបាំងដែលគេថា ជារឿងអាស្រូវស្នេហាលួចលាក់របស់មន្ត្រីជាន់ខ្ពស់គណបក្សសង្គ្រោះជាតិដទៃទៀតផងដែរ។ របស់លោក យ៉ែម ប៉ុញ្ញាឬទ្ធិ មិនអាចទាក់ទងបានទេនៅថ្ងៃនេះ៕
