ប្រធានាធិបតីថ្មីនៃប្រទេស Gambia លោក Adama Barrow ដែលបានចូលកាន់តំណែងនៅដើមសប្ដាហ៍នេះ បាននិយាយថា ឃ្លាំងប្រាក់របស់រដ្ឋគ្មានសេសសល់អ្វីទេ ខណៈដែលប្រទេសក្រីក្រមួយនេះ ជាប់បំណុលយ៉ាងធ្ងន់ធ្ងរ ។
លោក Adama Barrow បានអះអាងដូចនេះ តាមរយៈការស្រង់សម្ដី ជំនួយការរបស់លោកម្នាក់ដែលបាននិយាយប្រាប់ សារព័ត៌មាន Freedom News Paper កាលពីថ្ងៃអង្គារ៍ ទី៣១ មករា ។
តាមសារព័ត៌មាននេះ ប្រាក់ដែលនៅសេសសល់ក្នុងឃ្លាំងប្រាក់របស់រដ្ឋ ឬគេហៅថា រតនាគារ ត្រូវបានរដ្ឋការរបស់លោកប្រធានាធិបតីចាញ់ឆ្នោត Yahya Jammeh កើបប្រមូលយកទៅបាត់ ។ ចំណែកឯលោក Jammeh ត្រូវគេចោទថា បានលួចលុយចេញពីរតនាគាររបស់រដ្ឋនេះ ប្រមាណជា ១១លាន ៤សែនដុល្លារអាមេរិក ។
យ៉ាងណាក៏ដោយលោក Adama Barrow បានបង្កើតគណៈកម្មាធិការស្រាវជ្រាវមួយ ដើម្បីប្រមូលប្រាក់ដែលបាត់នោះត្រឡប់មកវិញ ហើយព្រមានថា ជនណាដែលបានចូលលួចលុយទាំងនោះ នឹងទទួលទោសទៀតផង ៕ Freedom News Paper
