តម្លៃសំបុត្រសំរាប់ចូលទស្សនាប្រាសាទអង្គរដ៏ល្បីល្បាញរបស់កម្ពុជាសំរាប់ជនបរទេសនឹងត្រូវតម្លើងថ្លៃចាប់ពីថ្ងៃពុធទី១ខែកុម្ភៈ ឆ្នាំ២០១៧នេះតទៅ។
លោកឡុង កុសល្យ អ្នកនាំពាក្យនិងជានាយករងនាយកដ្ឋានទំនាក់ទំនងរបស់អជ្ញាធរអប្សារាមានប្រសាសន៍ថាតម្លៃសំបុត្រចូលទស្សនាសំរាប់មួយថ្ងៃកាលពីមុនថ្លៃត្រឹម២០ដុល្លារអាមេរិកនឹងត្រូវតម្លើងដល់៣៧ដុល្លារ។
ដោយឡែកតម្លៃសំបុត្រចូលទស្សនារយៈពេលបីថ្ងៃត្រូវឡើងពី៤០ដុល្លារទៅ៦២ដុល្លារនិងសំបុត្រសំរាប់ចូលទស្សនាប្រាសាទបុរាណខ្មែរក្នុងរយៈពេលមួយសប្តាហ៍នឹងត្រូវឡើងថ្លៃពី៦០ដុល្លារដល់៧២ដុល្លារ។ ប៉ុន្តែប្រជាពលរដ្ឋកម្ពុជានិងជនបរទេសដែលមានអាយុក្រោម១២ឆ្នាំនឹងមិនត្រូវយកលុយថ្លៃសំបុត្រចូលទស្សនាប្រាសាទអង្គរទេ។
កាលពីឆ្នាំ២០១៦ មានជនបរទេសចូលទស្សនាប្រាសាទអង្គរវត្តចំនួន២លាន ២សែននាក់ ហើយចំណូលពីការលក់សំបុត្រចូលទស្សនាប្រាសាទអង្គរបានកើនដល់៦២លាន ៥សែនដុល្លារ៕
