ហ្គាំបៀ៖ប្រធានាធិបតីថ្មីនៃប្រទេសហ្គាំបៀលោក Adama Barrow ដែលបានចូលកាន់តំណែងតាមរយៈការអន្ដរាគមន៍របស់អង្គការសហប្រជាជាតិបានប្រកាសរក្សាទុកឧត្ដមសេនីយ៍មួយចំនួនដែលមិនបានសហការ ជួយការពារអំណាចរបស់ជនផ្ដាច់ការ ចាមេស។
លោក បារ៉ូ បានថ្លែងដូចនេះនៅចំពោះមុខអ្នកសារព័ត៌មាននៅទីក្រុងបាយ៉ុល កាលពីថ្ងៃចន្ទ ទី៣០ ខែមករា នៅពេលលោកដើរចូលទៅកាន់វិមានប្រធានាធិបតី។ លោកបានបញ្ជាក់ថា ឧត្ដមសេនីយ៍មួយចំនួនមិនត្រូវបានដកហូតតំណែងឬបញ្ចប់តួនាទីអ្វីឡើយ ក្នុងនោះរួមមានទាំង អគ្គមេបញ្ជាការកងទ័ព ឧត្ដមសេនីយ៍ Ousmane Badjie ផងដែរ។ ឧត្ដមសេនីយ៍រូបនេះបានប្រកាសទទួលស្គាល់លទ្ធផលបោះឆ្នោតហើយបានបញ្ជាឲ្យកងទ័ពទាំងអស់ស្ថិតក្នុងបន្ទាយមិនត្រូវប៉ះទង្គិចជាមួយកងទ័ពអាហ្វ្រិកខាង លិចដែលគាំទ្រដោយអង្គការសហ ប្រជា ជាតិអំឡុងពេលទ័ពចម្រុះជាតិសាសន៍នេះចូលលុកលុយប្រទេសហ្គាំបៀ ដើម្បីបង្ខំលោក ចាមេស ចាកចេញពីវិមានប្រធានាធិបតី។ រយៈពេលដែលោក ចាមេស ក្រាញអំណាចមានឧត្ដមសេនីយ៍ជាច្រើនបានរត់ចោលប្រទេសបោះបង់ភាពស្មោះត្រង់ចំពោះលោក ចាមេស។
លោក អាដាម៉ា បារ៉ូ បានបញ្ជាក់ថា ៖«វាជាការមិនយោគយល់គ្នារឿងនយោបាយដែលនាំឲ្យមានរឿងកើតឡើងដូចនេះ។ សម្រាប់ខ្ញុំគ្មានដំណោះស្រាយយោធាទេ ទាក់ទងរឿងនយោបាយ។ យើងសូមនិយាយថាកងទ័ពមិនមែនជាឧបករណ៍អ្នកនយោបាយទេ ទោះខ្ញុំស្រឡាញ់កងទ័ពក៏ដោយ។ សម្រាប់ខ្ញុំ គឺខ្ញុំស្រ ឡាញ់ជនរួមជាតិរបស់ខ្ញុំទេ។ ដូច្នេះយើងនៅបន្ដរក្សាឧត្ដមសេនីយ៍មួយចំនួនកាន់តំណែងរបស់ពួកគេដដែល។»
ជាមួយគ្នានេះប្រធានាធិបតីថ្មីប្រទេស ហ្គាំបៀ ដែលបានឈ្នះឆ្នោតតាមរយៈការបោះឆ្នោតថ្ងៃទី០១ ធ្នូ បានអំពាវនាវឲ្យប្រជាជនហ្គាំបៀ ក៏ដូចជាជនរួមជាតិរបស់លោក ដែលបានរត់ភៀសខ្លួនទៅក្រៅប្រទេ ស ឲ្យត្រឡប់មកជួយអភិវឌ្ឍន៍ប្រទេសជាតិឡើងវិញព្រោះប្រទេសជាតិត្រូវការអ្នកទាំងនោះ។ នៅខណៈនេះកងទ័ពអាហ្វ្រិកខាងលិចដែលចូលលុកលុយប្រទេសហ្គាំបៀកាលពីថ្ងៃទី២០ មករា បានរក្សាទុកវត្ដមានរបស់ខ្លួនរយៈពេល៦ ខែទៀត ប្រយោជន៍ដើម្បីជួយស្ដារសន្ដិសុខ និងសន្ដិភាពរបស់ប្រទេសហ្គាំបៀ។ ប្រជាជនហ្គាំបៀបានសម្ដែងការសប្បាយចិត្ដយ៉ាងខ្លាំង នៅពេលដែលលោក អាដាម៉ា បារ៉ូ បានចូលកាន់តំណែងជាប្រធានាធិបតីស្របច្បាប់។ ប្រភព៖DW
