ភ្នំពេញ ៖ អ្នកនាំពាក្យក្រសួងបរិស្ថាន និងសង្គមស៊ីវិលដែលធ្វើការងារផ្នែកបរិស្ថាន សាទរបណ្តេញសហគមន៍ព្រៃឡង់ ដែលបានទទួលពាន រង្វាន់ កិច្ចសហការអន្តរជាតិអ្នកការពារព្រៃឈើតំបន់ត្រូពិច ឆ្នាំ២០១៧ និងទឹកប្រាក់ ៣០០០ដុល្លារអាមេរិក ពីសាកលវិទ្យាល័យយែល សហ រដ្ឋអាមេរិក។
មន្ត្រីរដ្ឋាភិបាល និងសង្គមស៊ីវិលថា ពានរង្វាន់នេះជាមោទភាពជាតិមួយដែលបង្ហាញពីការចូលរួមរបស់សហគមន៍ព្រៃឈើកម្ពុជាក្នុងការការ ពារព្រៃឈើនៅលើពិភពលោក។
នេះជាពានរង្វាន់ដែលទទួលបានក្រោយពីតំណាងសហគមន៍ព្រៃឡង់ លោក ផៃ ប៊ុនលាង បានចូលរួមធ្វើបទបង្ហាញពីការងារ និងសមិទ្ធផលនៃកិច្ចការពារព្រៃឈើនាពេលកន្លងមក។
អ្នកនាំពាក្យក្រសួងបរិស្ថានលោក សៅ សុភាព បានប្រាប់វិទ្យុស្ត្រីនៅថ្ងៃទី៣០ មករានេះថា លោកអបអរសាទរដល់សហគមន៍ព្រៃឡង់ដែលបានទទួលពានរង្វាន់ពីសហរដ្ឋអាមេរិក ដែលពានរង្វាន់នេះលោកថា ជាមោទនភាពជាតិមួយសម្រាប់កម្ពុជា។
លោកថា សហគមន៍ព្រៃឡង់កន្លងមក បានសហការយ៉ាងល្អជាមួយអាជ្ញាធរពាក់ព័ន្ធក្នុងការការពារព្រៃឈើ ពិសេសគឺព្រៃឡង់។ លោក សៅ សុភាព៖«កន្លងមកជា មួយបណ្តាញសហគមន៍ព្រៃឡង់ យើងបានធ្វើការយ៉ាងជិតស្និត ជាពិសេសគឺសម្រាប់ការការពារព្រៃឡង់ហ្នឹង គឺយើងធ្វើការងារការពារនិងអភិរក្សជាមួយគ្នា។ អញ្ចឹង!ការទទួលបានពានរង្វាន់ហ្នឹងជាសញ្ញាមួយ ដែលទទួលស្គាល់ការខិតខំប្រឹងប្រែងរបស់សហគមន៍មូលដ្ឋាន ជាពិសេសគឺបណ្តាញសហគមន៍ព្រៃឡង់»។
លោក ផៃ ប៊ុនលាង ដែលទើបទទួលបានពានរង្វាន់ថ្មីចុងក្រោយនេះបានបង្ហាញចំណាប់អារម្មណ៍ ដែលត្រូវបានមើលឃើញក្នុងទំព័រហ្វេសប៊ុកសហគមន៍ព្រៃឡង់បានលើកឡើងថា មុនទទួលរង្វាន់នេះ លោកបានធ្វើការងារការពារព្រៃឈើនេះរយៈពេល ១៦ ឆ្នាំមកហើយ ដោយលោកត្រូវប្រឈមមុខនឹងបញ្ហាជាច្រើន ព្រោះក្រុមអ្នកកាប់ឈើខុសច្បាប់តែងតែមានអាវុធ ដែលអាចបង្កគ្រោះថ្នាក់ដល់ជីវិត។
លោកថា រដ្ឋាភិបាលគួរលើកទឹកចិត្តដល់អ្នកដែលសកម្មក្នុងការការពារព្រៃឈើ ដោយជៀសវាងការធ្វើទុក្ខបុកម្នេញសកម្មជនការពារបរិស្ថាន ជាក់ស្តែងដូចករណីយុជន សាន ម៉ាឡា ទ្រី សុវិគា ជាដើមដែលកំពុងជាប់ក្តីក្តាំងករណីប្រឆាំងនឹងការបូមខ្សាច់នៅខេត្តកោះកុង។ លោក ជាង សុខា៖«ថ្មីហ្នឹងពេលដែលគាត់ចូលរួមសកម្មនៅក្នុងការការពារធនធានធម្មជាតិ ដូចជានៅខាងអារ៉ែង ខាងកោះកុង មានការគម្រាមកំហែង ខ្ញុំមើលទៅវាបានធ្វើឱ្យប៉ះពាល់ដល់អារម្មណ៍យុវជនខ្លះដែរ តែទោះបីជាយ៉ាងណាក៏ដោយអ្នកដែលគាត់ទទួលបានពានរង្វាន់ហ្នឹង ខ្ញុំចង់ឱ្យគាត់បន្តសកម្មភាពកាន់តែសកម្មថែមទៀត ព្រោះវាអាចលើកទឹកចិត្តដល់យុវជនបានចូលរួមយ៉ាងសកម្មជាមួយក្រុកគាត់ដែរ»។
សូមបញ្ជាក់ថា ពានរង្វាន់កិច្ចសហការអន្តរជាតិអ្នកការពារព្រៃឈើតំបន់ត្រូពិច ឆ្នាំ២០១៧ ជាពានរង្វាន់លើកទី៣ ហើយសម្រាប់បណ្តាញសហ គមន៍ព្រៃឡង់ ក្រោយពីទទួលបានពានរង្វាន់ ពីមូលនិធិអាឡិចស៊ែនឌ័រស័រោះ (Alexander Soros Foundation) ២០១៣ និងអេក្វទ័រប្រាយរបស់អង្គការ UNDP (UNDP Equator Initiative Prize) កាលពីឆ្នាំ២០១៥។
តែយ៉ាងណាក៏ដោយ អង្កការណាសាអាមេរិក រកឃើញព្រៃឈើប្រទេសកម្ពុជាត្រូវបានបំផ្លាញលឿនជាង ប្រទេសលើពីពលោក ដែលអង្គការនេះព្រមានពីការរលាយហិចហោចយ៉ាងធ្ងន់ធ្ងរ៕
