អ្នកស្រី ប៉ូវ សោភា តំណាងសហគមន៍ដីធ្លីតំបន់បឹងកក់ប្រាប់វិទ្យុស្ត្រីនៅថ្ងៃទី ២៩ មករា នេះថា សហគមន៍បឹងកក់ បុរីកីឡា និងសហគមន៍ SOS ជាដើម នឹងគ្រោងដើរដាក់ញត្តិតាមស្ថានទូតមួយចំនួននៅរាជធានីភ្នំពេញ ដើម្បីស្នើដល់ស្ថានទូតទាំងនោះចូលរួមតាមដានដំណើរការកាត់ក្តីរបស់អ្នកស្រី ទេព វន្នី នៅថ្ងៃទី០៣ កុម្ភៈខាងមុខនេះ។
ដោយឡែកយុទ្ធនាការថ្ងៃច័ន្ទពណ៌ខ្មៅវិញ អ្នកស្រី ប៉ូវ សោភា ថានឹងផ្អាកមួយសប្តាហ៍ ព្រោះរវល់កិច្ចរកទទួលទាន។
សូមរំលឹកថា សកម្មជនដីធ្លីដ៏មានប្រជាប្រិយភាពអ្នកស្រី ទេព វន្នី ត្រូវបានតុលាការចោទប្រកាន់ក្នុងអំពើហិង្សាក្បែរផ្ទះលោកនាយករដ្ឋមន្ត្រី កាល ពីឆ្នាំ ២០១៣។ ក្រៅពីនេះ អ្នកស្រី ទេព វន្នី ក៏នៅមានសំណុំរឿងដទៃទៀត ដែលតុលាការកំពុងបន្តនីតិវិធីនៅឡើយ។
កាលពីថ្ងៃទី២៥ មករា ឆ្នាំ២០១៧ តុលាការកំពូលបានច្រានចោលបណ្តឹងសុំនៅក្រៅឃុំរបស់អ្នកស្រី ទេវ វន្នី ដោយប្រធានក្រុមប្រឹក្សាជំនុំជម្រះ អ្នកស្រី គឹម សុថាវី ចាត់ទុកថា សាលក្រមរបស់តុលាការក្រុងភ្នំពេញ មានលក្ខណៈគ្រប់គ្រាន់ដែលអាចពិចារណាច្រានចោលបានបណ្តឹងសុំនៅក្រៅឃុំនេះបាន។
នៅថ្ងៃដែលតុលាការកំពូលទាត់ចោលបណ្តឹងសុំនៅក្រៅឃុំ អ្នកស្រី ទេព វន្នី ដែលស្ថិតក្នុងសំលៀកបំពាក់អ្នកទោស និងដៃជាប់ឃ្នោះផងនោះ បានស្រែកថា សម្លាប់អ្នកស្រីដូចលោក កែម ឡី ចុះ បើសិនស្អប់អ្នកស្រីដល់ថ្នាក់នេះ៕
