ភ្នំពេញ ៖ រថយន្តក្រុងសារធារណៈនឹងភ្ជាប់ផ្លូវរត់ពីរាជធានីភ្នំពេញទៅកាន់ខេត្ត កំពង់ស្ពឺ ក្នុងអំឡុងខែមេសា ខាងមុខ។
អាជ្ញាធរខេត្តកំពង់ស្ពឺ ទើបតែបានចុះហត្ថលេខាលើកិច្ចព្រមព្រាងជាមួយក្រុមហ៊ុន ប្រ៊ីកស្តុន ខេមបូឌា កាលពីថ្ងៃពុធទី ២៥ មករា។ ហើយគឺជាខេត្ត ទី១ ដែលមានរថយន្តក្រុងសាធារណៈបន្ទាប់ពីរាជធានីភ្នំពេញ។ លោក វៃ សំណាង អភិបាលខេត្តកំពង់ស្ពឺ មានប្រសាសន៍ថា រថយន្តក្រុងចំនួន ២០គ្រឿងនឹងត្រូវដាក់ឲ្យប្រើប្រាស់សាកល្បងក្នុងជំហានដំបូង។
លោកតាមលោកអភិបាលខេត្តផ្លូវរត់នៃរថយន្តក្រុងសាធារណៈជាដំបូងនឹងចេញដំណើរពីទីប្រជុំជនខេត្តមកកាន់សង្កាត់ចោមចៅ ជាយក្រុងភ្នំពេញ។ រថយន្តក្រុងសាធារណៈត្រូវបង្កើតឡើងក្នុងជំហានសាកល្បងនៅក្នុងរាជធានីភ្នំពេញ ក្រោមការជួយជ្រោមជ្រែងពីអង្គការ ចាយកា(JICA)របស់ជប៉ុន។ គោលដៅគឺដើម្បីជួយកាត់បន្ថយការកកស្ទះចរាចរណ៍ ជួយកាត់បន្ថយគ្រោះថ្នាក់ចរាចរណ៍ និងកាត់បន្ថយការចំណាយរបស់ប្រជា ពលរដ្ឋក្នុងការធ្វើដំណើរ។
ក្នុងរយៈពេល ១១ខែ ឆ្នាំ២០១៦ មានអ្នកដំណើរប្រើប្រាស់សេវារថយន្តក្រុងសាធារណៈ ជិត ២,២លាននាក់។ក្នុងចំណោមនោះជនពិការ និងសិស្សានុសិស្សត្រូវអនុញ្ញាតិឲ្យធ្វើដំណើរតាមរថយន្តក្រុងសាធាណៈដោយឥតគិតថ្លៃ៕
