អតីតនាយករដ្ឋមន្ដ្រីថៃ លោកស្រី Yingluck Shinawatra បានទទូចឱ្យរដ្ឋាភិបាល លោក ប្រាយុទ្ធ ចាន់អូចា និងតុលាការរដ្ឋបាល លុបចោលដីកាបង្គាប់ឱ្យ រឹបអូសទ្រព្យសម្បត្តិរបស់លោកស្រី នូវទឹកប្រាក់ ៣៥ ពាន់លានបាត ដោយសារតែលោកស្រី ត្រូវបានចោទពីបទបណ្ដោយអោយមានរឿងអាស្រូវពុករលួយ។
លោក ស្រីYingluck Shinawatra ត្រូវបានតុលាកាកំពូលចាប់កំហុសករណីធ្វើឱ្យបាត់បង់លុយរបស់រដ្ឋ ១៧៥ ពាន់លានបាត ខណៈលោកស្រី គឺជា នាយករដ្ឋមន្ដ្រី ឆ្នាំ ២០១៤ ហើយកំហុសនេះ ដោយសារតែអំពើពុករលួយក្នុងការទិញស្រូវស្តុកទុក ហើយធ្វើឱ្យខាតបង់ប្រាក់រាប់លានបាត។ ក្នុងទឹកប្រាក់ ១៧៥ ពាន់លានបាតនេះ តុលាការបានសម្រេចឱ្យលោកស្រី បង់ចំណាយ ២០ភាគរយ ស្មើនឹង ៣៥ពាន់លានបាត។
លោកស្រី បានសម្ដែងការសោកស្ដាយដូចនេះ ថា ៖ «ប្រសិនបើទ្រព្យសម្បត្តិរបស់ខ្ញុំត្រូវបានរឹបអូស ខ្ញុំឈឺចាប់បំផុត ។ វាធ្វើឱ្យខ្ញុំជំពាក់បំណុលហើយសងគេអស់មួយជីវិត ។ រឿងនេះខ្ញុំ ឈឺចាប់ណាស់ មិនអាចថ្លែងពន្យល់បានទេ ហើយគ្រួសាររបស់ខ្ញុំកាន់តែឈឺចាប់ថែមទៀត»។
លោកស្រី Yingluck Shinawatra ត្រូវបានទម្លាក់ពីអំណាច ជានាយករដ្ឋមន្ដ្រី កាលពីឆ្នាំ ២០១៤ ដោយតុលាការរដ្ឋធម្មនុញ្ញ ករណីរឿងអាស្រូវដូចនេះហើយក្រោយមកគណៈរដ្ឋមន្ត្រីរបស់លោកស្រី ត្រូវបានរំលាយដោយការធ្វើរដ្ឋប្រហារ៕ប្រភព:The Nation
