ភ្នំពេញ៖សាលារាជធានីភ្នំពេញបានតម្រូវឱ្យអ្នកដំណើរទាំងអស់ដែលកំពុងចរាចរណ៍លើផ្លូវជាតិលេខ១ ចន្លោះពីស្ពានព្រះមុនីវង្សដែលគេស្គាល់ថា ជាស្ពានច្បារអំពៅដល់វត្តក្តីតាកុយ ត្រូវធ្វើដំណើរវាងតាមផ្លូវក្រវ៉ាត់ក្រុងវិញ ដើម្បីពន្លឿននៃការដ្ឋានសាងសងផ្លូវឱ្យឆាប់ចប់តាមផែនការ។
សេចក្តីជូនដំណឹងរបស់សាលារាជធានីភ្នំពេញ នៅថ្ងៃ២៦ ខែមករា ឆ្នាំ២០១៧នេះ បានឱ្យដឹងថា គិតត្រឹមថ្ងៃទី២៦ មករានេះ ដំណើរការនៃការសាងសង់កំណាត់ផ្លូវជាតិលេខ១ ចាប់ពីគល់ស្ពានព្រះមុនីវង្ស ដល់វត្តក្តីតាកុយ សម្រេចបានលទ្ធផល ៨០%ហើយ ក្នុងពេលនេះដំណើរការនៃការដ្ឋានសាងសង់មកដល់ចំណុចទីប្រជុំជនផ្សារច្បារអំពៅដែលជាចំណុចមានការកកស្ទះចរាចរណ៍ខ្លាំងស្ទើរគ្រប់ពេលវេលាដែលជាហេតុត្រូវពន្លឿនការសាងសង់។ ដើម្បីកាត់បន្ថយការកកស្ទះចរាចរណ៍ និងពន្លឿននៃការដ្ឋានសាងសង់ ឱ្យបានឆាប់តាមផែនការ ដែលបានកំណត់នៅថ្ងៃទី៣១ ខែមីនា ឆ្នាំ២០១៧ ខាងមុខ សាលារាជធានីភ្នំពេញបានតម្រូវឱ្យធ្វើការ ពង្វាងចរាចរណ៍យានយន្ត ដឹកទំនិញគ្រប់ប្រភេទ និងម្ចាស់យានយន្តដឹកអ្នកដំណើរចេញចូលរាជធានីភ្នំពេញ ដោយមិនត្រូវឆ្លងកាត់កំណាត់ផ្លូវដែលកំពុងសាងសង់ខាងលើនេះឡើយ។
សាលារាជធានីភ្នំពេញបានតម្រូវឱ្យអ្នកធ្វើដំណើរអស់ត្រូវវាងតាមការកំណត់ដូចខាងក្រោម៖
-ចំពោះយានយន្តធ្វើដំណើរចូលមករាជធានីភ្នំពេញ តាមផ្លូវជាតិលេខ១ ត្រូវវាងតាមផ្លូវក្រវ៉ាត់ក្រុងទី២ ពីផ្លូវជាតិលេខ១ ឆ្លងកាត់មុខរោងចក្រស្រាបៀរថៃហ្គ័រឆ្ពោះទៅស្ពានសំរោងតាមច្រកតាខ្មៅ។
- ចំពោះយានយន្តធ្វើដំណើរចេញមករាជធានីភ្នំពេញ តាមផ្លូវមុនីវង្ស មហាវិថីព្រះនរោត្តម ត្រូវពង្វាងតាមផ្លូវជាតិលេខ២ ចាក់អង្រែឆ្ពោះទៅស្ពានសំរោងតាខ្មៅ រួចធ្វើដំណើរតាមផ្លូវក្រវ៉ាត់ក្រុងទី២ ដោយមិនអនុញ្ញាឱ្យឆ្លងកាត់ស្ពានព្រះមុនីវង្សថ្មីឡើយ៕
