ភ្នំពេញ៖បើទោះជាមិនមានការយល់ព្រមពីសមាជិកមកពីគណបក្សប្រឆាំង គណៈកម្មាធិការអចិន្ត្រៃយ៍នៃរដ្ឋសភាបានសម្រេចដាក់ការធ្វើវិសោធនកម្មប្រការ ៤៨ថ្មី(បួន) ទៅក្នុងរបៀបវារៈនៃកិច្ចប្រជុំសភាវិសមញ្ញនៅចុងខែមករានេះ។
គណបក្សប្រឆាំងយល់ថាការធ្វើវិសោធនកម្មប្រការនេះនឹងធ្វើឲ្យប៉ះពាល់ដល់វប្បធម៌សន្ទនា។ ប៉ុន្តែគណបក្សកាន់អំណាចការពារការធ្វើវិសោធនកម្មនេះ។
គណកម្មាធិការអចិន្ត្រៃយ៍នៃរដ្ឋសភាបានសម្រេចជាផ្លូវការនៅថ្ងៃព្រហស្បតិ៍ ទី២៦ ខែមករានេះ ដាក់បញ្ចូលរបៀបវារៈស្តីពីវិសោធនកម្មប្រការ ៤៨ថ្មី(៣) នៃបទបញ្ជាផ្ទៃក្នុងដ៏ចម្រូងចម្រាស់ក្នុងកិច្ចប្រជុំវិសាមញ្ញ។ កិច្ចប្រជុំដែលគ្រោងនឹងប្រព្រឹត្តិទៅនៅថ្ងៃទី៣១ ខែមករានេះ។ តែទោះជាយ៉ាងណាគណបក្សប្រឆាំងជំទាស់នឹងការធ្វើវិសោធនកម្មនេះ។
លោកឈាង វុន អ្នកនាំពាក្យរដ្ឋសភាមកពីគណបក្សប្រជាជនកម្ពុជា បានប្រាប់ក្រុមអ្នកសារព័ត៌មានក្រោយកិច្ចប្រជុំគណកម្មាធិការអចិន្ត្រៃយ៍នៅព្រឹកថ្ងៃទី២៦ មករា ឆ្នាំ២០១៧នេះថា ការធ្វើវិសោធនកម្មប្រការ៤៨ថ្មី (៣) នេះគឺដើម្បីកែតម្រូវនិងបង្កើតប្រការថ្មីគឺប្រការ៤៨ថ្មី៤ នៃបទបញ្ជាផ្ទៃក្នុងរបស់រដ្ឋសភា។ ហើយការកែសម្រួលនេះគឺដើម្បីចៀសវាងកុំឲ្យគណបក្សប្រឆាំងប្រើប្រាស់ប្រការខ្លះដែលប៉ះពាល់ដល់វប្បធម៌សន្ទនានិងរំលោភដល់អំណាចតុលាការ។ «ហើយការមិនស្មោះត្រង់គ្នានេះហើយដែលធ្វើឱ្យយើងយល់ថាមិនអាចទៅមុខបាន ហើយជាពិសេសចុងក្រោយនេះ យើងមានការសោកស្តាយខ្លាំង គិតបើយើងយកយន្តការនេះទៅស្នើសុំឱ្យអង្គការនិតិប្រតិបត្តិ ឱ្យគណបក្សប្រជាជនទៅដោះលែងអ្នកទោស ទៅដោះស្រាយបញ្ហាមនុស្សដែលជាប់ពិរទ្ធពន្ធនាគារ។ល។ ដោយប្រពឹត្តិអំពើព្រហ្មទណ្ឌ គឺជារឿងដែលយើងមិនអាចទទួលយកបាន»។
កាលពីពេលថ្មីនេះ សម្តេចនាយករដ្ឋមន្ត្រី ហ៊ុន សែន បានប្រកាសឱ្យមានការធ្វើវិសោធនកម្មលើមាត្រា៤៨ថ្មី (បី) នៃបទបញ្ជាផ្ទៃក្នុងរដ្ឋសភា ពាក់ព័ន្ធនឹងការលុបចោលក្រុមសំលេងភាគតិច និងសំលេងភាគច្រើននៃរដ្ឋសភា។
ប្រការ៤៨ថ្មី (៣) ចែងថា «ប្រធានក្រុមតំណាងរាស្ត្រ នៃគណបក្សនយោបាយក្រៅរាជរដ្ឋាភិបាល ដែលមានអាសនៈក្នុងរដ្ឋសភា ចាប់ពី២៥%ឡើងទៅ មានឈ្មោះហៅថា ជាប្រធានក្រុមមតិភាគតិចនៅរដ្ឋសភា។ ប្រធានក្រុមមតិភាគតិច ជាគូសន្ទនាជាមួយនឹងប្រមុខរាជរដ្ឋាភិបាល ទាក់ទងទៅនឹងបញ្ហាប្រទេសជាតិ។ ប្រធានក្រុមមតិភាគតិចមានឋានៈស្មើនាយករដ្ឋមន្ត្រី»។
ជុំវិញបញ្ហានេះលោក ហូ វ៉ាន់ ដែលបានចូលរួមប្រជុំជាគណៈកម្មាធិការអចិន្ត្រៃយ៍នៅថ្ងៃនេះ បានឱ្យដឹងថា លោកមានការសោកស្តាយដែលសភាធ្វើវិសោធនកម្មលើប្រការ៤៨(បី)នេះ។ លោកយល់ថា ការលុបចោល ឬការធ្វើវិសោធនកម្មមាត្រា៤៨ថ្មី៣ នឹងធ្វើឱ្យប៉ះពាល់ដល់វប្បធម៌សន្ទា។ លោកបន្តថា មាត្រា ៤៨ថ្មី(បី)នេះហើយ ដែលធានាដោយផ្លូវច្បាប់ បើកផ្លូវឱ្យគណបក្សទាំងពីរ ជជែកគ្នាពីបញ្ហាជាតិ។ «យន្តការនេះបង្កើតមិនទាន់បានពីរឆ្នាំស្រួលបួលផង ឥលូវលុបទៅវិញហើយអញ្ចឹងឃើញថាអ្វីដែលយើងសម្រេចចិត្តហើយបែរទៅជាលុបចោលភ្លាម អញ្ចឹងអនេះគឺថាមើលសូម ប្រជាជាពលរដ្ឋមើលទៅ អ្នកកាសែតក៏អាចមើលបានដែរថាហ្នឹងជាភាពទន់ខ្សោយរបស់រដ្ឋសភាយើង»។
តែយ៉ាងណាក៏ដោយលោក ឈាង វុន បកស្រាយថា ការធ្វើវិសោធនកម្មប្រការ៤៨ថ្មី(៣)នេះ នឹងមិនប៉ះពាល់វប្បធម៌សន្ទនានោះទេ គឺគណបក្សប្រជាជនកម្ពុជា នឹងនៅតែបបន្តរក្សវប្បធម៌សន្ទនាជាមួយគណបក្សប្រឆាំង៕
